ជាតិ
អ្នកស្និទ្ធ៖ លោកតា ម៉ូលីវណ្ណ បានទុកស្នាដៃ និងកិត្តិយសច្រើនជូនកម្ពុជា ពីឆ្វេងទៅស្តាំ៖ លោក អាំង ជូលាន លោក ហង់ ពៅ និងលោក តាំង សុចិត្តវិទូ
× មរណភាពរបស់បិតាស្ថាបត្យករខ្មែរ វណ្ណ ម៉ូលីវណ្ណ បានបន្សល់ភាពសោកស្តាយខ្លាំងពីពលរដ្ឋកម្ពុជា។ ពិធីបុណ្យសពត្រូវរៀបចំដោយគណៈកម្មាធិការបុណ្យជាតិ នៅគេហដ្ឋានរបស់លោក វណ្ណ ម៉ូលីវណ្ណ នៅក្នុងភូមិមណ្ឌល៣ សង្កាត់ស្លក្រាម ក្រុងសៀមរាប។ អ្នកសិ្នទ្ធស្នាល អតីតសហការី និងសាស្ត្រាចារ្យស្ថាបត្យកម្មបានរៀបរាប់អំពីអារម្មណ៍របស់ពួកគេចំពោះមរណភាពរបស់លោក វណ្ណ ម៉ូលីវណ្ណ ដូចតទៅ៖
លោក អាំង ជូលាន អតីតសហការី និងជាអ្នកស្និទ្ធ៖ ខ្ញុំយល់ច្បាស់ថា មនុស្សគ្រប់គ្នា មិនមែនតែខ្ញុំទេ ដែលសោកស្តាយចំពោះការបាត់បង់លោកតា វណ្ណ ម៉ូលីវណ្ណ។ លោកតា វណ្ណ ម៉ូលីវណ្ណ ត្រូវបានគេស្គាល់ដោយក្តីគោរព។ លោកតាមិនត្រឹមតែទុកស្នាដៃផ្នែកស្ថាបត្យកម្មជាច្រើនឲ្យមនុស្សជំនាន់ក្រោយទេ ប៉ុន្តែលោកតាបានទុកកិត្តិយសជូនជាតិកម្ពុជាទៀតផង តាមរយៈស្នាដៃរបស់គាត់។ ខ្ញុំចាំបានថាលោក លី ក្វាន់យូរ អតីតនាយករដ្ឋមន្ត្រីសិង្ហបុរី ដែលបានមកទស្សនកិច្ចនៅកម្ពុជា បាននិយាយថា ភ្នំពេញគឺជាគំរូនៃអាស៊ីអាគ្នេយ៍ក្នុងវិស័យស្ថាបត្យកម្ម។
លោក ហង់ ពៅ អគ្គនាយករងនៃអាជ្ញាធរជាតិអប្សរា៖ ពិតជាការបាត់បង់ និងការសោកស្តាយដ៏ធំធេងរបស់ខ្មែរយើង។ អ្នកណាក៏ស្គាល់លោកតាថាជាស្ថាបត្យករខ្មែរដែលប្រើប្រាស់ធម្មជាតិនៅក្នុងសំណង់របស់លោកតា។ លោកតា វណ្ណ ម៉ូលីវណ្ណ មិនមែនជាបុគ្គលល្បីល្បាញតែក្នុងប្រទេសទេ តែកិត្តិនាមគាត់ល្បីរន្ទឺជាអន្តរជាតិ។ លោកតា បានបន្សល់ទុកស្នាដៃរបស់គាត់បានច្រើនសម្រាប់វិស័យស្ថាបត្យកម្មខ្មែរ ហើយជាងនេះទៀតលោកក៏បានសរសេរសៀវភៅថែមទៀតដើម្បីទុកឲ្យខ្មែរជំនាន់ក្រោយ។
លោក តាំង សុចិត្តវិទូ សាស្ត្រាចារ្យស្ថាបត្យកម្ម៖ លោកតា វណ្ណ ម៉ូលីវណ្ណ គឺជាវីរបុរសស្ថាបត្យករខ្មែរក្នុងសម័យទំនើប។ ទស្សនវិទ្យា ឬគោលការណ៍ស្ថាបត្យកម្មដែលគេទើបតែចាប់ផ្តើមនិយាយក្នុងពេលបច្ចុប្បន្ននេះ ដូចជាស្ថាបតយ្យកម្មបៃតង ស្ថាបត្យកម្មប្រកបដោយចីរភាព ត្រូវបានលោកតា វណ្ណ ម៉ូលីវណ្ណ បង្កើតឡើងតាំងពី៦០ ឬ៧០ឆ្នាំមុននៅកម្ពុជាយើង។ គោលការណ៍ប្រើប្រាស់ពន្លឺធម្មជាតិ ខ្យល់ធម្មជាតិ សុទ្ធតែមាននៅក្នុងសំណង់របស់លោកតា។ យើងសោកស្តាយចំពោះការបាត់បង់លោកតា ហើយសូមវិញ្ញាណក្ខន្ធលោកតាទៅកាន់សុគតិភព៕
© រក្សាសិទ្ធិដោយ thmeythmey.com