អន្តរជាតិ
អ៊ីរ៉ង់៖ ត្រាំ គិតថាអ៊ីរ៉ង់ជាប្រទេសផ្ដាច់ការ តែសម្ព័ន្ធមិត្តខ្លួនមិនដែលបានឃើញហឹបឆ្នោតម្ដងផង រដ្ឋមន្រ្តីការបរទេសអ៊ីរ៉ង់ Mohammad Javad Zarif (រូបភាព៖ Xinhua)
× រដ្ឋមន្ត្រីការបរទេសអ៊ីរ៉ង់ Mohammad Javad Zarif បាននិយាយការពារប្រព័ន្ធដឹកនាំក្រុងតេហេរ៉ង់ ដែលធ្លាប់ត្រូវបានអាមេរិកចាត់ទុកជារបបផ្ដាច់ការ។ លោក Zarif និយាយថា របបដឹកនាំអ៊ីរ៉ង់កើតចេញពីឆន្ទះរបស់ប្រជាជន មិនមែនដូចសម្ព័ន្ធមិត្តរបស់អាមេរិកខ្លះនៅមជ្ឈិមបូព៌ា ដែលរក្សាអំណាចរបស់ខ្លួនតាមរយៈការប្រើប្រាស់អាវុធស្អាតៗរបស់អាមេរិកឡើយ។
ក្នុងកិច្ចសម្ភាសជាមួយអង្គការ Asia Society ដែលមានមូលដ្ឋាននៅអាមេរិក ប្រមុខការទូតអ៊ីរ៉ង់ Mohammad Javad Zarif បាននិយាយលើដំណើរការនយោបាយនៅអ៊ីរ៉ង់ និងទិសដៅរបសើមហាអំណាចមជ្ឈិមបូព៌ាមួយនេះផង។ ឆ្លៀតពេលនោះ លោក Zarif ក៏បានលើកឡើងពីរបបនយោបាយអ៊ីរ៉ង់ ដែលទទួលបានទំនុកចិត្តពីប្រជាជនតាមរយៈការបោះឆ្នោត មិនដូចដៃគូក្នុងតំបន់របស់អាមេរិកឡើយ។
ទាក់ទងសំណួរជុំវិញនយោបាយអ៊ីរ៉ង់ លោក Zarif និយាយសំដៅប្រធានាធិបតីអាមេរិក ដូណាល់ ត្រាំ ថា៖ «លោក ត្រាំ ចូលចិត្តគិតថា អ៊ីរ៉ង់ជារបបដឹកនាំផ្ដាច់ការ។ ប៉ុន្តែអ្វីដែលគួរឲ្យចាប់អារម្មណ៍ គឺសម្ព័ន្ធមិត្តរបស់លោកទាំងអស់នៅមជ្ឈិមបូព៌ាមិនដែលបានឃើញប្រអប់ឆ្នោតសូម្បីម្ដងផងក្នុងប្រទេសពួកគេ។ ហើយពួកគេទំនងជាអញ្ចឹងរហូតទៅ»។ លោកបន្តថា រដ្ឋាភិបាលអ៊ីរ៉ង់ទទួលបានភាពស្របច្បាប់ពីប្រជាជន ដែលខុសពីប្រទេសខ្លះប្រើអាវុធអាមេរិកដើម្បីការពារអំណាច។
រដ្ឋមន្ត្រីការបរទេសអ៊ីរ៉ង់ទំនងជាចង់ដៀមដាមគូប្រជែងឥទ្ធិពលរបស់ខ្លួន គឺអារ៉ាប៊ីសាអូឌីត ដែលទើបចុះកិច្ចព្រមព្រៀងទិញអាវុធពីអាមេរិក។ ទាំងក្រុងតេហេរ៉ង់ ទាំងក្រុងរីយ៉ាដ សុទ្ធព្យាយាមពង្រីកអំណាចរបស់ខ្លួនក្នុងតំបន់ ហើយជាញឹកញាប់តែងគាំទ្រគូជម្លោះខុសគ្នាផងដែរដូចជានៅស៊ីរី យេម៉ែន និងកាតាជាដើម។ ទោះជាមានរឿងជូរចត់នឹងគ្នាមិនអស់មិនហើយក្ដី លោក Zarif សង្ឃឹមថា ប្រទេសទាំងពីរអាចចាប់ដៃគ្នាដើម្បីកសាងសន្តិសុខ និងសន្តិភាពនៅតំបន់មជ្ឈិមបូព៌ាបាន។
បើតាមសម្ដីមន្ត្រីការទូតអ៊ីរ៉ង់រូបនេះ អារ៉ាប៊ីសាអូឌីតមិនអាចកាត់ផ្ដាច់ចេញពីមជ្ឈិមបូព៌ាបានទេ តែប្រទេសនេះគឺជាតួអង្គយ៉ាងសំខាន់ក្នុងការដោះស្រាយបញ្ហាដែលកើតឡើង ហើយតួនាទីអារ៉ាប៊ីសាអូឌីតត្រូវតែទទួលបានការគោរពដាច់ខាត។ យ៉ាងណាក្ដី លោក Zarif ក៏ស្នើឲ្យអារ៉ាប៊ីសាអូឌីតទទួលស្គាល់តួនាទីអ៊ីរ៉ង់វិញដែរ។ ពោល គឺភាគីទាំងពីរត្រូវគោរពគ្នាទៅវិញទៅមក ដើម្បីស្វែងរកច្រកចេញក្នុងនាមជាមហាអំណាចតំបន់។
សូមបញ្ជាក់ថា អ៊ីរ៉ង់ មិនសូវត្រូវខ្សែគ្នាជាមួយអាមេរិក និងអារ៉ាប៊ីសាអូឌីតឡើយ តាំងពីសម័យបដិវត្តន៍១៩៧៩ មក ដែលបានផ្លាស់ប្រព័ន្ធដឹកនាំអ៊ីរ៉ង់ទាំងស្រុង។ ទោះជាមានការបោះឆ្នោតជ្រើសរើសប្រធានាធិបតី និងសភាក្ដី អំណាចកំពូលស្ថិតក្នុងកណ្ដាប់ដៃលោក Ayatollah Ali Khamenei ឯណោះ។ អាមេរិក និងអ៊ីរ៉ង់កាន់តែមិនត្រូវគ្នារឿងកម្មវិធីនុយក្លេអ៊ែរ តែក្រោយមកក៏ធូរស្រាលវិញក្រោយមានកិច្ចព្រមព្រៀងឆ្នាំ២០១៥ ៕
Tag:
អ៊ីរ៉ង់
អាមេរិក
ដូណាល់ ត្រាំ
Mohammad Javad Zarif
© រក្សាសិទ្ធិដោយ thmeythmey.com