អន្តរជាតិ
ថៃសន្យាផ្ដល់ជំនួយហិរញ្ញវត្ថុឲ្យអាមេរិកដែលរងគ្រោះដោយសារព្យុះសង្ឃរា
× នាយករដ្ឋមន្ត្រីថៃ ប្រាយុទ្ធ ចន្ទអូចា បានចូលរួមរំលែកទុក្ខជាមួយប្រធានាធិបតី ដូណាល់ ត្រាំ ជុំវិញការវាយប្រហារដោយគ្រោះធម្មជាតិនាពេលថ្មីៗនេះទាំងនៅអាមេរិក និងនៅព័រតូរីកូ ដែលបំផ្លាញទ្រព្យសម្បត្តិអស់រាប់ពាន់លានដុល្លារ។ ក្នុងជំនួបនៅសេតវិមាននៅថ្ងៃទី២ ខែតុលា លោក ប្រាយុទ្ធ ក៏សន្យាផ្ដល់ជំនួយហិរញ្ញវត្ថុឲ្យអាមេរិកដែរ ក្នុងនាមជាសម្ព័ន្ធមិត្តជិតពីររយឆ្នាំនោះ។
មេដឹកនាំរបបសឹកថៃ ឧត្តមសេនីយ៍ ប្រាយុទ្ធ ចន្ទអូចា និងភរិយា ត្រូវបានទទួលស្វាគមន៍យ៉ាងរាក់ទាក់ពីសំណាក់ប្រធានាធិបតីអាមេរិក ដូណាល់ ត្រាំ និងស្ត្រីទីមួយអាមេរិកនៅឯសេតវិមាន។ ជំនួបទល់មុខលើកដំបូងនេះ គឺជាសញ្ញានៃការវិលត្រឡប់ទៅរកប្រក្រតីឡើងវិញនៃទំនាក់ទំនងការទូតថៃ និងអាមេរិក ដែលល្អក់កករដោយសារការធ្លាក់ចុះស្ថានភាពសិទ្ធិមនុស្សនៅថៃក្រោមការដឹកនាំរបស់ក្រុមឧត្តមសេនីយ៍។
ថ្លែងមុនជំនួបទ្វេភាគីថ្ងៃទី២ ខែតុលា លោកប្រធានាធិបតី ត្រាំ បានរំឭកពីប្រវត្តិសាស្ត្រយូរអង្វែងនៃទំនាក់ទំនងរវាងប្រទេសទាំងពីរ ដែលអតីតប្រធានាធិបតី អាន់ឌ្រូ ជែកសាន់ ជាអ្នកពូនជ្រំ។ លោក ត្រាំ និយាយថា លោកពិតជាមានកិត្តិយសចំពោះទស្សនកិច្ចរបស់នាយករដ្ឋមន្ត្រីថៃ និងភរិយានៅអាមេរិកពេលនេះ ទោះជាជំនួបនេះធ្វើឡើងចំពេលដែលមានការវាយប្រហារនៅទីក្រុង Las Vegas ក៏ដោយចុះ។
ឆ្លើយតបការលើកឡើងរបស់ប្រធានាធិបតីអាមេរិក ឧត្តមសេនីយ៍ ប្រាយុទ្ធ ក៏បង្ហាញក្ដីរីករាយចំពោះទស្សនកិច្ចរបស់លោក ហើយក៏ឆ្លៀតពេលនេះរំលែកទុក្ខជាមួយលោក ត្រាំ ចំពោះគ្រោះថ្នាក់ធម្មជាតិដែលវាយប្រហារអាមេរិកផ្ទួននាពេលកន្លងមក។ មនុស្សជាច្រើនបានស្លាប់ និងរាប់ពាន់នាក់ទៀតត្រូវជម្លៀសចេញពីផ្ទះ ខណៈដែលការខូចខាតមានទំហំរាប់ពាន់លានដុល្លារឯណោះ។ លោក ប្រាយុទ្ធ និយាយថា រដ្ឋាភិបាល និងវិស័យឯកជនថៃ សន្យាផ្ដល់ជំនួយហិរញ្ញវត្ថុឲ្យអាមេរិកដើម្បីកសាងប្រទេសឡើងវិញ។
ទស្សនកិច្ចរបស់មេដឹកនាំរដ្ឋប្រហារយោធាថៃនៅសេតវិមាន ពិតជាកាយវិការផ្លាស់ប្ដូររបស់រដ្ឋបាលក្រុងវ៉ាស៊ិនតោនចំពោះសម្ព័ន្ធមិត្តចាស់ឆ្នាំមួយនេះ។ ដូចរដ្ឋបាលលោក បារ៉ាក់ អូបាម៉ា ដែរ រដ្ឋបាលលោក ត្រាំ តែងស្នើឲ្យមានការផ្លាស់ប្ដូរទៅរករបបប្រជាធិបតេយ្យនៅថៃវិញ មុននឹងអាមេរិកពង្រឹងទំនាក់ទំនងឡើងវិញ។ ប៉ុន្តែការអនុវត្តនយោបាយ «America First» ធ្វើឲ្យអាមេរិកផ្តោការយកចិត្តទុកដាក់លើផលប្រយោជន៍អាមេរិក ជាងបញ្ហសិទ្ធិមនុស្ស និងប្រជាធិបតេយ្យ។
តាមពិតទៅ វាក៏មិនមែនជារឿងចំឡែកអ្វីដែរពេលដែលលោក ត្រាំ ទទួលមេដឹកនាំឡើងកាន់អំណាចតាមផ្លូវយោធា ឬមេដឹកនាំមិនសូវគោរពសិទ្ធិមនុស្សនោះ។ ចំពោះករណីថៃវិញ អាមេរិក និងថៃ គឺជាមានចំណងមិត្តភាពរយៈពេល១៨៤ឆ្នាំមកហើយ ដែលជាសម្ព័ន្ធមិត្តចាស់វស្សាមួយនៅអាស៊ីអាគ្នេយ៍។ អាមេរិកពិតជាត្រូវការថៃជាចាំបាច់ក្នុងការទប់ទល់ឥទ្ធិពលរបស់ចិនក្នុងតំបន់ ដូចនេះអាមេរិកត្រូវទុកបញ្ហាសិទ្ធិមនុស្សដោយឡែកសិនហើយ៕
Tag:
ថៃ
អាមេរិក
ប្រាយុទ្ធ ចន្ទអូចា
ដូណាល់ ត្រាំ
© រក្សាសិទ្ធិដោយ thmeythmey.com