អន្តរជាតិ
មន្ត្រីជាន់ខ្ពស់មីយ៉ាន់ម៉ា៖ ទុកឱកាសឲ្យប្រជាធិបតេយ្យវ័យក្មេងនៅមីយ៉ាន់ម៉ាមានជីវិតផង ទីប្រឹក្សាសន្តិសុខជាតិមីយ៉ាន់ម៉ា Thaung Thun (រូបភាព៖ Xinhua)
× មន្ត្រីជាន់ខ្ពស់មីយ៉ាន់ម៉ា នៅថ្ងៃទី២ ខែតុលា បានអំពាវនាវសហគមន៍អន្តរជាតិឲ្យផ្ដល់ឱកាសឲ្យប្រជាធិបតេយ្យអាចរស់រានបាន ព្រោះជាប្រជាធិបតេយ្យទើបរីកពន្លកចេញប៉ុណ្ណោះ។ ទីប្រឹក្សាសន្តិសុខជាតិ Thaung Thun ស្នើបែបនេះ ខណៈដែលមីយ៉ាន់ម៉ារងការរិះគន់យ៉ាងខ្លាំងជុំវិញប្រតិបត្តិការយោធាប្រកបដោយអំពើហិង្សានៅរដ្ឋ Rakhine ដែលបង្ខំឲ្យជនភាគតិចរ៉ូហ៊ីងយ៉ារាប់សែននាក់ភៀសខ្លួនទៅកាន់បង់ក្លាដែស។
រដ្ឋាភិបាលមីយ៉ាន់ម៉ារបស់ទីប្រឹក្សារដ្ឋ អ៊ុងសាន ស៊ូជី រងការថ្កោលទោសយ៉ាងខ្លាំងពីសំណាក់សហគមន៍អន្តរជាតិចំពោះការមិនចាត់វិធានការឲ្យបានសមស្របដើម្បីដោះស្រាយវិបត្តិជនភាគតិចរ៉ូហ៊ីងយ៉ានៅរដ្ឋ Rakhine ។ ប្រតិបត្តិការរបស់យោធា ដែលឆ្លើយតបនឹងការវាយប្រហាររបស់ក្រុមឧទ្ទាម បង្កជាវិបត្តិមនុស្សធម៌យ៉ាងធំ ដែលអង្គការសហប្រជាជាតិចាត់ទុកជាការបោសសម្អាតពូជសាសន៍ទៅទៀត។
សម្ពាធកាន់តែច្រើនឡើងបានធ្លាក់លើស្មាររដ្ឋាភិបាលស៊ីវិលដែលមានអាយុមួយឆ្នាំកន្លះប៉ុណ្ណោះ។ អាមេរិកបានស្នើឲ្យមានការកាត់ផ្ដាច់ជំនួយយោធាទៅកាន់មីយ៉ាន់់ម៉ា និងថែមទាំងគំរាមអនុវត្តទណ្ឌកម្មលើមីយ៉ាន់ម៉ាឡើងវិញ ក្រោយត្រូវបានផ្អាកដោយអតីតរដ្ឋបាលប្រធានាធិបតី បារ៉ាក់ អូបាម៉ា ផងដែរ។ មន្ត្រីមីយ៉ាន់ម៉ាហាក់ព្រួយបារម្ភខ្លាំងនឹងជំហររបស់អាមេរិក ព្រោះអាចប៉ះពាល់ដល់ដំណើរការប្រជាធិបតេយ្យនៅមីយ៉ាន់ម៉ា។
ទីប្រឹក្សាសន្តិសុខជាតិមីយ៉ាន់ម៉ា Thaung Thun បានប្រាប់ទីភ្នាក់ងារព័ត៌មាន Reuters ថា មីយ៉ាន់ម៉ាត្រូវធានាឲ្យពីការរស់រានរបស់ប្រជាធិបតេយ្យវ័យក្មេង។ នេះក៏ព្រោះតែរដ្ឋាភិបាល និងទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី ទើបចូលកាន់តំណែងរយៈពេល១៨ខែប៉ុណ្ណោះ គឺបន្ទាប់ពីទទួលបានជោគជ័យក្នុងការបោះឆ្នោតទូទៅនៅពាក់កណ្ដាលឆ្នាំ២០១៥ ។ លោក Thaung Thun បានស្នើឲ្យសហគមន៍អន្តរជាតិទុកពេលឲ្យរដ្ឋាភិបាលស៊ីវិលដើម្បីដោះស្រាយបញ្ហាទាំងឡាយ។
«យើងជួបបញ្ហាប្រឈមជាច្រើន ហើយការប្រឈមនេះមិនអាចដោះស្រាយបានក្នុងរយៈពេលមួយថ្ងៃឡើយ។ ទីក្រុងរ៉ូមមិនមែនកសាងត្រឹមមួយថ្ងៃទេ ដូច្នេះយើងមិនអាចដោះស្រាយបញ្ហា៥០ឆ្នាំបានឡើយ»។ នេះជាការបញ្ជាក់របស់មន្ត្រីជាន់ខ្ពស់រូបនេះ ដោយបន្ថែមថា លោកត្រៀមជួបទីប្រឹក្សាសន្តិសុខជាតិអាមេរិក H.R. McMaster ដើម្បីពន្យល់ពីស្ថានការណ៍នៅរដ្ឋ Rakhine ជាក់ស្ដែងឲ្យបានច្បាស់លាស់។
វិបត្តិរ៉ូហ៊ីងយ៉ាដែលធ្វើឲ្យលោកស្រី ស៊ូជី បាក់មុខខ្លាំងលើឆាកអន្តរជាតិ នៅតែមិនទាន់រកដំណោះស្រាយឃើញ ខណៈដែលអង្គការសហប្រជាជាតិអំពាវនាវឲ្យរដ្ឋាភិបាលក្រុងណៃពិដោបញ្ឈប់សកម្មភាពហិង្សាជាបន្ទាន់។ ជាមួយគ្នានោះ អាជ្ញាធរមីយ៉ាន់ម៉ាក៏បានដាក់ទោសមន្ត្រីប៉ូលិសខ្លះដែលបំពានអំណាចក្នុងប្រតិបត្តិការនៅ Rakhine ដែរ។ ឯអង្គការមនុស្សធម៌នានាក៏ស្វែងរកជំនួយបន្ថែមទៀតសម្រាប់ជនភៀសខ្លួនរ៉ូហ៊ីងយ៉ារាប់សែននាក់ដែលកំពុងស្នាក់នៅជំរំនានាក្នុងទឹកដីបង់ក្លាដែស៕
Tag:
មីយ៉ាន់ម៉ា
ប្រជាធិបតេយ្យ
Thaung Thun
© រក្សាសិទ្ធិដោយ thmeythmey.com