អន្តរជាតិ
ប្រាយុទ្ធ ចេញបញ្ជាពង្រឹងសន្តិសុខ ក្រោយមានការគំរាមអុកឡុកថ្ងៃថ្វាយព្រះភ្លើងស្ដេចភូមិបុល រូបភាព៖ The Nation
× នាយករដ្ឋមន្ត្រីថៃ ប្រាយុទ្ធ ចន្ទអូចា បានចេញបញ្ជាពង្រឹងសន្តិសុខថែមទៀតនៅមុន និងអំឡុងពេលពិធីថ្វាយព្រះភ្លើងអតីតមហាក្សត្រ ភូមិបុល អាឌុលយ៉ាដេត នៅចុងខែតុលានេះ។ ប្រភពពីក្នុងរដ្ឋាភិបាលថៃនិយាយថា ការចេញបញ្ជានេះធ្វើឡើងក្រោយភ្នាក់ងារសម្ងាត់ថៃរាយការណ៍ពីលទ្ធភាពដែលក្រុមប្រឆាំងធ្វើសកម្មភាពអុកឡុកក្នុងពិធីដ៏ធំមួយនេះ។
នៅសល់តែ២៣ថ្ងៃទៀតប៉ុណ្ណោះ ពិធីបុណ្យថ្វាយព្រះភ្លើងអតីតមហាក្សត្រគ្រងរាជ្យយូរជាងគេលើពិភពលោក ព្រះចៅ ភូមិបុល អាឌុលយ៉ាដេត នឹងមកដល់ ខណៈដែលការសាងសង់ទីព្រះមេរុជិតនឹងសាងសង់ចប់សព្វគ្រប់តាមផែនការដែរ។ ប៉ុន្តែភ្នាក់ងារចារកិច្ចរបស់ថៃបានរាយការណ៍ថា ក្រុមប្រឆាំងខ្លះមានផែនការបង្កបញ្ហារាំងស្ទះដល់ពិធីថ្វាយព្រះភ្លើងអតីតស្ដេចរាមាទី៩ ដែលរៀបចំនៅថ្ងៃទី២៦ ខែតុលា។
ដើម្បីរក្សាសណ្ដាប់ធ្នាប់ ប្រមុខរដ្ឋាភិបាលថៃ ប្រាយុទ្ធ ចន្ទអូចា បានចេញបញ្ជាឲ្យប៉ូលិស ក្រុមប្រឹក្សាសន្តិសុខជាតិ និងអង្គភាពចារកម្មជាតិ ប្រមូលព័ត៌មានឲ្យបាន និងរៀបចំវិធានការឆ្លើយតបវិញ។ នៅថ្ងៃទី២ ខែតុលា ឧបនាយករដ្ឋមន្ត្រី ប្រាវីត វង្សសុវណ្ណ ក៏ដឹកនាំអង្គប្រជុំមួយដើម្បីត្រួតពិនិត្យសន្តិសុខអំឡុងពេលប្រារព្ធពិធី។ លោក ប្រាវីត ក៏បង្ហាញក្ដីព្រួយបារម្ភចំពោះលទ្ធភាពនៃការកើតឡើងចលាចល ព្រោះមនុស្សជាច្រើននឹងចូលរួមពិធីកម្រមួយនេះ។
បើតាមកាសែត The Nation មន្ត្រីសន្តិសុខថៃចាប់បានសញ្ញាតាមបណ្ដាញសង្គមពីផែនការបង្កអសណ្ដាប់ធ្នាប់ក្នុងពេលប្រារព្ធពិធីនេះ និងបានចេញការព្រមានអ្នកដែលគំនិតមិនល្អដែរ។ មេបញ្ជាការទ័ពជើងគោកថៃ Chalermchai Sitthisart និយាយថា អ្នកដែលមានគោលដៅបង្កការរំខានដល់សាធារណៈ ត្រូវបានចោទប្រកាន់រួចហើយពីបទបំពានច្បាប់ស្ដីពីការប្រមាថចេស្តាមហាក្សត្រ និងពួកគេក៏បានរត់គេចខ្លួនអស់ហើយ។
តាមពិតទៅ ក្រុមបង្កបញ្ហាអសន្តិសុខ និងចលាចលបានធ្វើប្រតិបត្តិការពីបរទេស និងពីខេត្តទាំងបីនៅភាគខាងត្បូងមានយ៉ាឡា ប៉ាតានី និងណារ៉ាធីវ៉ាត់ ហើយក្នុងចំណោមក្រុមនេះក៏មានពួកប្រឆាំងរាជានិយមទៀតផង។ បើតាមលោក Chalermchai មន្ត្រីសន្តិសុខត្រូវបានដាក់ស្ថិតក្រោមការប្រុងប្រយ័ត្នគ្រប់ពេល ប៉ុន្តែក៏មិនមានអ្វីត្រូវបារម្ភដែរ ព្រោះប្រជាជននឹងជួយផ្ដល់ដំណឹងពីផែនការបង្កការរំខានមិនខានឡើយ។
ប៉ូលិសជាច្រើននឹងត្រូវពង្រាយនៅទីលាន Sanam Luang ក្បែរព្រះបរមរាជវាំង ដែលជាទីកន្លែងថ្វាយព្រះភ្លើង ខណៈយោធានឹងជួយផ្នែកប្រមូលព័ត៌មានចារកិច្ច។ មេបញ្ជាការកងទ័ពជើងគោកថៃខាងលើបញ្ជាក់ថា ក្រុមមន្ត្រីសន្តិសុខនឹងផ្ដោតការយកចិត្តទុកដាក់លើគោលដៅដែលកំណត់អត្តសញ្ញាណរួចហើយ។ អាជ្ញាធរក៏ប្ដេជ្ញាចិត្តរៀបចំពិធីថ្វាយព្រះភ្លើងលើកនេះឲ្យល្អឥតខ្ចោះ និងក្លាយជាពិធីបុណ្យអស្ចារ្យលើពិភពលោក៕
Tag:
អាមេរិក
ប្រាយុទ្ធ ចន្ទអូចា
ភូមិបុល អាឌុលយ៉ាដេត
© រក្សាសិទ្ធិដោយ thmeythmey.com