អន្តរជាតិ
អ៊ីស្រាអែលស្នើអាមេរិកបង្កើនសកម្មភាពនៅស៊ីរីដើម្បីទប់ទល់ឥទ្ធិពលរុស្ស៊ី អ៊ីរ៉ង់ និងតួកគី រដ្ឋមន្រ្តីការពារជាតិអ៊ីស្រាអែល Avigdor Lieberman (រូបភាព៖ Xinhua)
× រដ្ឋមន្ត្រីការពារជាតិអ៊ីស្រាអែល Avigdor Lieberman បានស្នើឲ្យអាមេរិកបង្កើនសកម្មភាពរបស់ខ្លួននៅស៊ីរី ដើម្បីទប់ទល់ឥទ្ធិពលរបស់រុស្ស៊ី អ៊ីរ៉ង់ និងតួកគី ដែលកំពុងកើនឡើងខ្លាំង។ លោក Lieberman សារភាពថា អ៊ីស្រាអែលប្រឹងប្រែងយ៉ាងខ្លាំងក្នុងការប្រឈមមុខជាមួយប្រទេសទាំងនេះ ដែលបានពង្រឹងវត្តមានពួកគេក្នុងតំបន់មជ្ឈិមបូព៌ាតាមរយៈការលូកចូលជម្លោះនៅស៊ីរី និងឈានអាចបង្កការគំរាមកំហែងសន្តិសុខអ៊ីស្រាអែលនៅពេលខាងមុខ។
ស្ថានការណ៍នៅស៊ីរីសព្វថ្ងៃដែលកម្លាំងរដ្ឋាភិបាលស៊ីរីដណ្ដើមទឹកដីបានមកវិញយ៉ាងច្រើន ក្រោមជំនួយរបស់រុស្ស៊ី អ៊ីរ៉ង់ និងចលនា Hezbollah កំពុងធ្វើឲ្យអ៊ីស្រាអែលព្រួយបារម្ភយ៉ាងខ្លាំង។ ជោគជ័យរបស់ប្រធានាធិបតី Bashar al-Assad ធ្វើឲ្យគូប្រជែងរបស់អ៊ីស្រាអែលពង្រីកឥទ្ធិពលយ៉ាងរឹងមាំក្នុងតំបន់ រហូតស្នើឲ្យសម្ព័ន្ធមិត្តរបស់ខ្លួន គឺអាមេរិក ពង្រឹងតួនាទីរបស់ខ្លួនថែមទៀតដើម្បីជួយទប់ទល់វត្តមានរុស្ស៊ី និងអ៊ីរ៉ង់។
សារព័ត៌មាន RT ផ្សាយថា រដ្ឋមន្ត្រីការពារជាតិអ៊ីស្រាអែល Avigdor Lieberman នៅថ្ងៃទី៣ ខែតុលា បានអំពាវនាវឲ្យអាមេរិកបង្កើនសកម្មភាពទាំងនៅស៊ីរី និងនៅក្នុងតំបន់មជ្ឈិមបូព៌ាទាំងមូលផង។ ចំពោះករណីស៊ីរី អាមេរិកបានត្រឹមពង្រាយទាហានប៉ុន្មានសិបនាក់ដើម្បីតែផ្ដល់ប្រឹក្សា និងការបណ្ដុះបណ្ដាលឲ្យកម្លាំងឧទ្ទាមប្រឆាំងលោក Assad ប៉ុណ្ណោះ។ ខុសពីអាមេរិក រុស្ស៊ីបានធ្វើប្រតិបត្តិការដោយផ្ទាល់នៅស៊ីរី និងជួយឲ្យលោក Assad ដណ្ដើមបានទឹកដីដែលបាត់បង់ជាច្រើនផង។
ដោយចង់សំដៅជម្លោះស៊ីរី ប្រមុខការពារជាតិអ៊ីស្រាអែលរូបនេះបញ្ជាក់ថា អ៊ីស្រាលអែលកំពុងប្រឈមមុខជាមួយរុស្ស៊ី អ៊ីរ៉ង់ តួកគី និងក្រុម Hezbollah គឺ២៤ម៉ោងក្នុងថ្ងៃ និង៧ថ្ងៃក្នុងមួយសប្ដាហ៍។ លើសពីនោះ លោកក៏អះអាងថា របបលោក Assad កំពុងមានជ័យជម្នះលើសមរភូមិហើយ ទោះជាកន្លងមកអាមេរិកព្យាយាមជួយក្រុមឧទ្ទាមប្រឆាំងផ្ដួលរំលំលោកក៏ដោយ ខណៈប្រទេសលោកខាងលិចខ្លះក៏នាំគ្នាបោះដៃទៅរកលោក Assad ដែរ។
ជាមួយនឹងស្ថានភាពអំណោយផលសម្រាប់លោក Assad បែបនេះ មន្ត្រីជាន់ខ្ពស់អ៊ីស្រាអែលចាត់ទុកនេះជាដំណើរឆ្ពោះទៅកាន់ការពង្រីកឥទ្ធិពលរបស់អ៊ីរ៉ង់ ដែលជាសត្រូវចាស់របស់អ៊ីស្រាអែល។ ស្ថានភាពបែបនេះ ក៏នឹងជួយអ៊ីរ៉ង់ និងក្រុម Hezbollah របស់់លីបង់អាចឈរជើងកាន់តែរឹងមាំលើទឹកដីស៊ីរីផងដែរ។ មូលហេតុនេះហើយទើបអ៊ីស្រាអែលមិនសប្បាយចិត្ត ព្រោះស៊ីរីអាចក្លាយជាមូលដ្ឋាននៃការគំរាមកំហែងអ៊ីស្រាអែលនៅពេលខាងមុខ។
ទោះជាមិនបានចូលរួមក្នុងយុទ្ធនាការនៅស៊ីរីក្ដី ជាញឹកញយកម្លាំងយោធាអ៊ីស្រាអែលតែងវាយប្រហារលើគោលដៅយោធាមួយចំនួនលើទឹកដីស៊ីរី ជាការឆ្លើយតបការបាញ់រ៉ុក្កែតឆ្លងចូលទឹកដីរបស់ខ្លួននោះ។ កម្លាំងអាកាសអ៊ីស្រាអែលក៏ដាក់គោលដៅក្បួនយោធាស៊ីរី ដោយចោទថាបានដឹកអាវុធរបស់ក្រុម Hezbollah ។ រដ្ឋាភិបាលស៊ីរីរិះគន់ខ្លាំងសកម្មភាពយោធាអ៊ីស្រាអែល និងចាត់ទុកជាការបំពានអធិបតេយ្យទៀតផង៕
Tag:
អ៊ីស្រាអែល
អាមេរិក
រុស្ស៊ី
អ៊ីរ៉ង់
តួកគី
© រក្សាសិទ្ធិដោយ thmeythmey.com