របាយការណ៍៖ នុយក្លេអ៊ែរកូរ៉េខាងជើងអាចសម្លាប់មនុស្សច្រើនជាងពីរលាននាក់នៅសេអ៊ូលនិងតូក្យូ

អន្តរជាតិ

របាយការណ៍៖ នុយក្លេអ៊ែរកូរ៉េខាងជើងអាចសម្លាប់មនុស្សច្រើនជាងពីរលាននាក់នៅសេអ៊ូលនិងតូក្យូ

05, Oct 2017 , 10:37 am

រូបភាព

ដោយ: តន ចាន់រិទ្ធារ៉ា

ការផ្លោងពាក្យសម្ដីគំរាមគ្នាទៅវិញទៅមករវាងមេដឹកនាំអាមេរិក និងកូរ៉េខាងជើង ធ្វើឲ្យគេឯងបារម្ភថា ជម្លោះប្រដាប់អាវុធអាចផ្ទុះឡើងដោយចៀសមិនផុតនៅឧបទ្វីបកូរ៉េ។ ក្នុងករណីមានសង្គ្រាមកើតឡើងមែន មនុស្សច្រើនជាងពីរលាននាក់នៅទីក្រុងសេអ៊ូល និងទីក្រុងតូក្យូ នឹងត្រូវស្លាប់ដោយសារការវាយប្រហារនុយក្លេអ៊ែរពីសំណាក់កូរ៉េខាងជើង។ នេះបើតាមការគណនារបស់គេហទំព័រ 38 North នៅថ្ងៃទី៥ ខែតុលា។

គេហទំព័រ 38 North ដែលតាមដានស្ថានការណ៍នៅកូរ៉េខាងជើង បានចេញផ្សាយរបាយការណ៍មួយនៅថ្ងៃទី៥ ខែតុលា ជុំវិញការគណនាចំនួនជនរងគ្រោះនៅកូរ៉េខាងត្បូង និងជប៉ុនពីការវាយប្រហារដោយនុយក្លេអ៊ែររបស់កូរ៉េខាងជើង។ របាយការណ៍នេះចេញផ្សាយចំពេលដែលស្ថានការណ៍នៅឧបទ្វីបឡើងកម្ដៅខ្លាំងដោយសារការសាកល្បងនុយក្លេអ៊ែរបស់កូរ៉េខាងជើង និងសង្គ្រាមសម្ដីរបស់ប្រធានាធិបតី ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន ។

បើតាមទីភ្នាក់ងារព័ត៌មាន Yonhap លោក Michael J. Zagurek Jr. ដែលជាសរសេររបាយការណ៍នេះនិយាយថា ដោយគណនាតាមអានុភាពនុយក្លេអ៊ែរដែលកូរ៉េខាងជើងមានសព្វថ្ងៃ ការបំផ្ទុះនុយក្លេអ៊ែរនៅសេអ៊ូល និងតូក្យូអាចឆក់យកជីវិតមនុស្សច្រើនជាងពីរលាននាក់ឯណោះ។ ក្រៅពីមនុស្សស្លាប់ដ៏ច្រើននេះ ចំនួនអ្នករងរបួសដោយសារអាវុធប្រល័យលោកនេះអាចមានដល់ទៅច្រើនជាង៧លាននាក់ទៀតផង។

របាយការណ៍ដដែលនេះបញ្ជាក់ថា ចំនួនជនរងគ្រោះដ៏សន្ធឹកសន្ធាប់នេះត្រូវបានគណនាដោយមានការសន្មត់ថា កូរ៉េខាងជើងនឹងប្រើប្រាស់នុយក្លេអ៊ែរក្នុងឃ្លាំងទាំង២៥ លើទីក្រុងធំទាំងពីរនេះ ដោយសេអ៊ូលមានប្រជាជនជាង២៤លាននាក់ និងតូក្យូមានប្រជាជនជិត៣៨លាននាក់។ ក្នុងករណីនេះ អានុភាពនៃក្បាលនុយក្លេអ៊ែររបស់កូរ៉េខាងជើងអាចមានទំហំចាប់ពី១៥គីឡូតោន ទៅដល់២៥០គីឡូតោនឯណោះ។

អ្វីគួរឲ្យចាប់អារម្មណ៍នោះ ការគណនាចំនួនជនរងគ្រោះនេះធ្វើឡើងតមរយៈការកំណត់អត្រាផ្ទុះក្បាលគ្រាប់ចំនួនបីប្រភេទ គឺការផ្ទុះ២០ភាគរយ ៥០ភាគរយ និង៨០ភាគរយ។ ការកំណត់ការផ្ទុះបែបនេះ ក៏ព្រោះតែការរួមបញ្វូលការចាត់វិធានការការពារខ្លួនរបស់កូរ៉េខាងត្បូង និងជប៉ុនដែរ។ ជាការពិត បើកូរ៉េខាងជើងប្រើប្រាស់នុយក្លេអ៊ែរមែន កូរ៉េខាងត្បូងប្រាកដជាប្រើប្រព័ន្ធការពារ THAAD មិនខាន ខណៈជប៉ុនវិញក៏មានពង្រាយប្រព័ន្ធការពារ Patriot ឬក៏ប្រព័ន្ធការពារ Aegis ដែរ។

យ៉ាងណាមិញ តួលេខនៃជនរងគ្រោះខ្ទង់លាននាក់បែបនេះ ជាសញ្ញាបង្ហាញថា ប្រព័ន្ធការពារមីស៊ីលនៅកូរ៉េខាងត្បូង និងជប៉ុន មិនអាចទប់់ស្កាត់មីស៊ីលបំពាក់ក្បាលគ្រាប់នុយក្លេអ៊ែររបស់កូរ៉េខាងជើងបានទេ។ ដោយសារមហន្តរាយបែបនេះ ការចរចានៅតែជាជម្រើសដំបូងសម្រាប់ការបញ្ចប់កម្មវិធីនុយក្លេអ៊ែរកូរ៉េខាងជើង ទោះជាអាមេរិកចង់ប្រើធម៌ក្ដៅដោយប្រើយោធា ជាជាងវិធីសាស្ត្រសន្តិភាពដែលអន្តរជាតិចង់បាននោះ៕