លោក ពូទីន ថា ប្រទេសជាច្រើនចង់រកស៊ីជាមួយរុស្ស៊ី ព្រោះមិនចេះអនុវត្តស្តង់ដាពីរជាន់

អន្តរជាតិ

លោក ពូទីន ថា ប្រទេសជាច្រើនចង់រកស៊ីជាមួយរុស្ស៊ី ព្រោះមិនចេះអនុវត្តស្តង់ដាពីរជាន់

05, Oct 2017 , 9:39 pm

រូបភាព

ដោយ: តន ចាន់រិទ្ធារ៉ា

មហាក្សត្រអារ៉ាប៊ីសាអូឌីត Salman bin Abdulaziz Al Saud បានទៅដល់ក្រុងមូស្គូនៅយប់ថ្ងៃទី៤ ខែតុលា ក្នុងដំណើរទស្សនកិច្ចផ្លូវការនៅរុស្ស៊ី។ វត្តមានព្រះចៅអារ៉ាប៊ីសាអូឌីតដែលជាសម្ព័ន្ធមិត្តរឹងមាំរបស់អាមេរិកនៅរុស្ស៊ី ធ្វើឲ្យមានការលើកឡើងថា ក្រុងរីយ៉ាដចង់ប្រើប្រាស់មូស្គូដើម្បីប្រយោជន៍ផ្ទាល់ខ្លួន។ យ៉ាងណាមិញ ប្រធានាធិបតីរុស្ស៊ី វ្ល៉ាឌីមៀ ពូទីន យល់ថា នេះមិនមែនជាបញ្ហាទេ តែវាបង្ហាញពីភាពទាក់ទាញរបស់រុស្ស៊ី។

នាឱកាសចូលរួមសន្និសីទថាមពលក្នុងរដ្ឋធានីមូស្គូនៅថ្ងៃទី៤ ខែតុលា មេដឹកនាំរុស្ស៊ី វ្ល៉ាឌីមៀ ពូទីន ត្រូវបានសួរដោយអ្នកសម្របសម្រួលម្នាក់ជុំវិញទស្សនកិច្ចរបស់ព្រះចៅ Salman bin Abdulaziz Al Saud នៃអារ៉ាប៊ីសាអូឌីតនៅរុស្ស៊ី។ លោក John Fraher ជាអ្នកសម្របសម្រួលបានសួរប្រធានាធិបតីរុស្ស៊ីថាមានការព្រួយបារម្ភអ្វីទេ បើអារ៉ាប៊ីសាអូឌីតយកទស្សនកិច្ចលើកនេះដើម្បីបំពេញប្រយោជន៍របស់ខ្លួននោះ។

ជាការឆ្លើយតប លោកប្រធានាធិបតី ពូទីន ហាក់មិនព្រួយបារម្ភនឹងបញ្ហានេះទេ ដោយលោកនិយាយអួតថា រុស្ស៊ីមានចំណុចទាក់ទាញប្រទេសផ្សេងក្នុងការធ្វើពាណិជ្ជកម្មជាមួយគ្នា នោះគឺភាពស្មោះត្រង់ និងការមិនអនុវត្តស្តង់ដាពីរជាន់។ បើតាមសម្ដីលោក ពូទីន អត្តចរិតស្មោះត្រង់នេះហើយ គឺជាចំណុចទាក់ទាញរបស់រុស្ស៊ីក្នុងក្រសែភ្នែកប្រទេសដទៃ ទោះបីជារុស្ស៊ីត្រូវហ៊ុមព័ទ្ធដោយទណ្ឌកម្មសេដ្ឋកិច្ចក៏ដោយចុះ។ នេះបើតាមការផ្សាយរបស់សារព័ត៌មាន RT ។

«គុណសម្បត្តិដែលយើងមាន គឺយើងមិនដែលបោកបញ្ឆោតឡើយ។ យើងតែងតែស្មោះត្រង់ជាមួយដៃគូរបស់យើងជានិច្ច ហើយយើងតែងតែបើកចំហជំហរដែរ។» នេះជាការបញ្ជាក់របស់លោក ពូទីន ដែលបន្តថា ភាពស្មោះត្រង់នេះធ្វើឲ្យរុស្ស៊ីក្លាយជាដៃគូដែលគួរឲ្យទុកចិត្តជាងប្រទេសដទៃ មិនមែនដោយសារសព្វាវុធទេ។ ចម្លើយរបស់លោក ពូទីន គឺជាដៀមដាមអាមេរិកដែលទើបលក់អាវុធតម្លៃរាប់ពាន់លានដុល្លារទៅឲ្យអារ៉ាប៊ីសាអូឌីត។

ទាក់ទងទស្សនកិច្ចរបស់មហាក្សត្រ Salman ប្រធានាធិបតីរុស្ស៊ីចាត់ទុកជាការអនុវត្តនយោបាយការបរទេសរបស់រដ្ឋមួយប៉ុណ្ណោះ ហើយសម្ព័ន្ធភាពរវាងអាមេរិក និងអារ៉ាប៊ីសាអូឌីត មិនមែនជាឧបសគ្គក្នុងការពង្រឹងទំនាក់ទំនងមូស្គូ និងរីយ៉ាដដែរ។ លោក ពូទីន បានព្រលយពាក្យថា គ្មានអ្វីអចិន្ត្រៃយ៍ឡើយលើពិភពលោកនេះ ហើយអ្វីៗគ្រប់យ៉ាងតែងផ្លាស់ប្ដូរ។

ដំណើរទស្សនកិច្ចលើកទីមួយរបស់មហាក្សត្រអារ៉ាប៊ីសាអូឌីត ដែលបញ្ចប់នៅថ្ងៃទី៧ ខែតុលា គឺជារឿងប្រវត្តិសាស្ត្រមួយ។ ក្រៅពីការពង្រឹងទំនាក់ទំនងទ្វេភាគី កិច្ចព្រមព្រៀងជាច្រើននឹងត្រូវចុះហត្ថលេខា ជាពិសេសកិច្ចព្រមព្រៀងលើការវិនិយោគវិស័យបច្ចេកវិទ្យា និងថាមពលដែលមានតម្លៃពីរពាន់លានដុល្លារ។ វិបត្តិស៊ីរី ការកាត់បន្ថយផលិតកម្មប្រេង ក៏ជាប្រធានបទសំខាន់ក្នុងជំនួបរវាងលោក ពូទីន និងមហាក្សត្រ Salman ដែរ៕