កីឡាជាតិ
ជាតិ
ជើងឯកសិស្សមធ្យមសិក្សា៖ រាជធានីភ្នំពេញឈ្នះមេដាយច្រើនជាងគេ
× រាជធានីភ្នំពេញបានជាប់ចំណាត់ថ្នាក់លេខ១ប្រចាំព្រឹត្តិការណ៍ប្រកួតជើងឯកសិស្សមធ្យមសិក្សាទូទាំងប្រទេសប្រចាំឆ្នាំ២០១៧ ក្រោយដណ្តើមបានមេដាយច្រើនជាងគេក្នុងចំណោមរាជធានី-ខេត្តទាំង២៥។ ហើយក្នុងចំណោមរាជធានី-ខេត្តទាំង២៥ គឺមានខេត្តចំនួន៥ដែលមិនទទួលបានមេដាយពីការប្រកួតនេះផងដែរ។ ព្រឹត្តិការណ៍ប្រចាំឆ្នាំរៀបចំដោយក្រសួងអប់រំយុវជន និងកីឡាដែលធ្វើឡើងនៅទីរួមខេត្តកំពង់ចាមបានបញ្ចប់យ៉ាងជោគជ័យកាលពីថ្ងៃទី៤ តុលា ឆ្នាំ២០១៧។
ក្រោយឆ្លងកាត់ការប្រកួតអស់រយៈពេលជាច្រើនថ្ងៃ ពោលគឺចាប់ពីថ្ងៃទី២៤ កញ្ញា ដល់ថ្ងៃទី៤ ខែតុលា តាមប្រភេទកីឡានីមួយៗលើទីលានផ្សេងៗគ្នាក្នុងទីរួមខេត្តកំពង់ចាមក្រុមអត្តពលិកជាសិស្សមកពីរាជធានីភ្នំពេញបានឈ្នះមេដាយមាស១០ ប្រាក់៣ និងសំរឹទ្ធ២។ ជ័យជម្នះដ៏ធំធេងនេះ បានជួយឲ្យក្រុមអត្តពលិករាជធានីភ្នំពេញឈរចំណាត់ថ្នាក់លេខ១ក្នុងចំណោមរាជធានី-ខេត្តទាំង២៥ ដែលតាមពីក្រោយជាបន្តបន្ទាប់ដោយខេត្តឧត្តរមានជ័យបន្ទាប់ពីដណ្តើមមបានមេដាយមាស៣ ប្រាក់៣ និងសៀមរាបក្រោយឈ្នះមាស៣ ប្រាក់២ និងសំរឹទ្ធ៤។
ជាមួយគ្នានេះខេត្តកណ្តាលដណ្តើមបានមេដាយមាស២ ប្រាក់៣ និងសំរឹទ្ធ, កំពតមាស២ ប្រាក់២ សំរឹទ្ធ៤, ពោធិ៍សាត់មាស២ ប្រាក់១, ត្បូងឃ្មុំ្មមាស២ សំរឹទ្ធ៤, តាកែវមាស១ ប្រាក់៤ សំរឹទ្ធ១, បាត់ដំបងមាស១ ប្រាក់២ សំរឹទ្ធ២, ស្វាយរៀងមាស១ ប្រាក់២ សំរឹទ្ធ១, ស្ទឹងត្រែងមាស១ ប្រាក់១, កែបមាស១ សំរឹទ្ធ២, កំពង់ធំប្រាក់៤ សំរឹទ្ធ១, កំពង់ឆ្នាំងប្រាក់១ សំរឹទ្ធ២ និងបន្ទាយមានជ័យបានប្រាក់១។ ចំណែកខេត្តរតនៈគីរី ម្ចាស់ផ្ទះកំពង់ចាម មណ្ឌលគីរី ព្រៃវែង និងខេត្តកំពង់ស្ពឺបានមេដាយសំរឹទ្ធម្នាក់១ ខណៈព្រះវិហារ ព្រះសីហនុ ក្រចេះ កោះកុង និងខេត្តប៉ៃលិនមិនទទួលបានមេដាយនោះទេ។
រូបភាពទាំងអស់ពីហ្វេសប៊ុកអគ្គនាយកដ្ឋានកីឡា
គួរបញ្ជាក់ថា ការប្រកួតកីឡាជ្រើសរើសជើងឯកសិស្សមធ្យមសិក្សាទូទាំងប្រទេសឆ្នាំនេះ មានអត្តពលិកចំនួន២,៥៦៥នាក់(ស្រី១,០៦០នាក់)មកពីសាលាទូទាំង២៥រាជធានី-ខេត្តចូលរួម។ អត្តពលិកទាំងនេះប្រកួតប្រជែងលើ៦ប្រភេទកីឡារួមមាន បាល់ទាត់ បាល់ទះ បាល់បោះ ប៉េតង់ អត្តពលកម្ម និងវាយកូនឃ្លីលើតុ៕
Tag:
ជើងឯកសិស្សមធ្យមសិក្សាទូទាំងប្រទេស
© រក្សាសិទ្ធិដោយ thmeythmey.com