អន្តរជាតិ
ត្រាំ ថា មានផ្លូវតែមួយគត់ទើបអាចចាត់ការកូរ៉េខាងជើងបាន
× ពីរថ្ងៃក្រោយជួបជាមួយមេទ័ពកំពូលៗ ប្រធានាធិបតីអាមេរិក ដូណាល់ ត្រាំ បាននិយាយថា ការដោះស្រាយបញ្ហានុយក្លេអ៊ែររបស់កូរ៉េខាងជើង គឺមានផ្លូវតែមួយគត់។ យ៉ាងណាក្ដី លោក ត្រាំ មិនបានបង្ហើបពីមធ្យោបាយតែមួយគត់នោះឡើយ តែលោកបានបញ្ជាក់ថា ការប្រឹងប្រែងរបស់រដ្ឋាភិបាលអាមេរិកមុនៗក្នុងការដោះស្រាយវិបត្តិនុយក្លេអ៊ែរនេះ មិនទទួលបានផ្លែផ្កាអ្វីទេ ខណៈកូរ៉េខាងជើងចេះតែបំពានម្ដងហើយម្ដងទៀត។
ប្រធានាធិបតីអាមេរិក ដូណាល់ ត្រាំ នៅថ្ងៃទី៧ ខែតុលា បានព្រលយពាក្យមួយឃ្លាលើបណ្ដាញសង្គម Twitter ជុំវិញវិបត្តិនុយក្លេអ៊ែរកូរ៉េខាងជើង។ លោក ត្រាំ បានអះអាងថា សម្រាប់បញ្ហាកូរ៉េខាងជើងមានច្រកចេញតែមួយគត់ ព្រោះការព្យាយាមរបស់អតីតប្រធានាធិបតីមុនៗមិនបានសម្រេចអ្វីជាដុំកំភួនឡើយ។ ប៉ុន្តែលោក ត្រាំ បានលាក់បាំងដំណោះស្រាយតែមួយគត់ដែលលោកបានបង្ហើបនោះ។
«ប្រធានាធិបតីមុន និងរដ្ឋបាលពួកគេបានជជែកជាមួយកូរ៉េខាងជើងអស់ពេល២៥ឆ្នាំ ហើយកិច្ចព្រមព្រៀងជាច្រើនលេចជារូបរាង និងលុយជាច្រើនត្រូវបានចំណាយ។ ប៉ុន្តែគ្មានបានផលទេ ឯកិច្ចព្រមព្រៀងត្រូវបានបំពានមុនពេលទឹកខ្មៅស្ងួតទៅទៀត ធ្វើឲ្យអ្នកចរចាអាមេរិកភ្ញាក់ផ្អើលខ្លាំង។ សុំទោស! មានផ្លូវតែមួយគត់ដែលអាចដោះស្រាយបញ្ហាបាន»។ នេះជាសារប្រធានាធិបតីអាមេរិកបង្ហោះលើ Twitter របស់ខ្លួន។
ទោះជាលោក ត្រាំ មិនពន្យល់ឲ្យច្បាស់លាស់ពីច្រកចេញក្ដី គេអាចយល់ថាបាន លោកចង់សំដៅដល់ការប្រើប្រាស់កម្លាំងទ័ពដើម្បីបញ្ចប់បញ្ហារ៉ាំរ៉ៃនេះ។ តាំងពីដើមមកនោះ លោក ត្រាំ តែងគំរាមប្រើធម៌ក្ដៅដាក់កូរ៉េខាងជើង បើរដ្ឋកុម្មុយនីស្តមួយនេះនៅតែបន្តកម្មវិធីនុយក្លេអ៊ែរដើម្បីគំរាមអាមេរិកនោះ។ កាលពីក្នុងកិច្ចប្រជុំមហាសន្និបាតអង្គការសហប្រជាជាតិ លោក ត្រាំ ថែមទាំងគំរាមកម្ទេចកូរ៉េខាងជើងជាចំហទៀតផង។
នៅថ្ងៃទី៥ ខែតុលា លោក ត្រាំ ក៏បានកោះហៅបណ្ដាមេទ័ពកំពូលមកជួបនៅសេតវិមានដើម្បីពិភាក្សា រឿងកូរ៉េខាងជើងនេះ។ លោកប្រធានាធិបតីអាមេរិកចាត់ទុកជំនួបនេះជា «ភាពស្ងប់ស្ងាត់មុនព្យុះមកដល់» ដែលអាចជាជំនួបស្វែងរកច្រកចេញក្នុងវិបត្តិនុយក្លេអ៊ែរជាមួយកូរ៉េខាងជើង។ ឆ្លៀតឱកាសនោះ លោក ត្រាំ ក៏ប្រាប់ឲ្យមន្ត្រីយោធាទាំងអស់ផ្ដល់ជម្រើសផ្នែកយោធាឲ្យទាន់ពេល ក្នុងករណីលោកត្រូវការផងដែរ។
កន្លងមក លោកប្រធានាធិបតី ត្រាំ ធ្លាប់លើកឡើងថា យោធាមិនមែនជាជម្រើសអាទិភាពទីមួយសម្រាប់លោកឡើយ គឺជាជម្រើសទីពីរប៉ុណ្ណោះ ប៉ុន្តែជម្រើសនេះបានត្រៀមរួចស្រេចអស់ហើយ។ ចំពោះលោក ត្រាំ ការដាក់ទណ្ឌកម្មសេដ្ឋកិច្ច នៅតែជាការងារចម្បងរបស់រដ្ឋបាលលោក ទោះជាលោកធ្លាប់សារភាពថា គ្មានប្រសិទ្ធភាពក៏ដោយចុះ។ លោក ត្រាំ ក៏បានគំរាមទុកហើយថា ក្នុងករណីលោកប្រើប្រាស់យោធា កូរ៉េខាងជើងនឹងវិនាសមិនខាន៕
Tag:
អាមេរិក
កូរ៉េខាងជើង
ដូណាល់ ត្រាំ
© រក្សាសិទ្ធិដោយ thmeythmey.com