អន្តរជាតិ
រដ្ឋមន្ត្រីឥណ្ឌា៖ ឪពុកម្ដាយមិនបញ្ជួនកូនទៅរៀនប្រឈមមុខទោសប្រហារជីវិត
× រដ្ឋមន្ត្រីឥណ្ឌាម្នាក់មកពីរដ្ឋ Uttar Pradesh បានព្រមានចាត់វិធានការម៉ឺងម៉ាត់លើឪពុកម្ដាយទាំងឡាយណាដែលមិនព្រមបញ្ជូនកូនៗរបស់ខ្លួនទៅកាន់សាលារៀន។ វិធានការទាំងនោះអាចជាការជាប់ឃុំនៅប៉ុស្តិ៍ប៉ូលិសក្នុងរយៈពេលណាមួយ ឬក៏ជាប់ទោសទណ្ឌធ្ងន់ធ្ងរដល់ថ្នាក់ប្រហារជីវិតទៅទៀត។ វិធានការតឹងរ៉ឹងបែបនេះ ត្រូវគេមើលឃើញថាជាការជំរុញការអប់រំនៅក្នុងរដ្ឋ Uttar Pradesh ដែលសម្បូរដោយកុមារ។
តាមរយៈវីដេអូដែលបង្ហោះលើបណ្ដាញសង្គមនៅឥណ្ឌា លោក Om Prakash Rajbhar រដ្ឋមន្ត្រីមកពីរដ្ឋ Uttar Pradesh ភាគខាងជើងប្រទេស និយាយថា លោកនឹងចាប់ប្រមូលឪពុកម្ដាយក្រីក្រទាំងអស់ដាក់ក្នុងគុក បើពួកគេមិនព្រមឲ្យកូនៗរបស់ពួកគេចូលសាលារៀនរបស់រដ្ឋទេនោះ។ លោក Rajbhar ក៏គំរាមបង្កើតច្បាប់តាមចិត្តចង់របស់លោកដើម្បីបង្ខំឲ្យឪពុកម្ដាយទាំងអស់បញ្ជូនកូនទៅទទួលការអប់រំទាំងអស់គ្នា។
បើតាមសារព័ត៌មានឥណ្ឌា Times of India លោក Rajbhar ដែលទទួលបន្ទុកកិច្ចការជនពិការបាននិយាយក្នងពិធីជួបជុំមួយកាលពីចុងសប្ដាហ៍មុនថា ប្រសិនបើក្មេងៗក្រីក្រមិនបានទៅសាលារៀននោះ ឪពុកម្ដាយពួកគេនឹងត្រូវបង្ខំឲ្យអង្គុយក្នុងប៉ុស្តិ៍៥ថ្ងៃ ដោយគ្មានបាយគ្មានទឹកអ្វីទាំងអស់។ លោកបន្តថា ប៉ូលិសនឹងទៅរកពួកគេដល់ផ្ទះផងដែរ ហើយថ្នាក់ដឹកនាំទាំងអស់បានប្រឹងប្រែងពន្យល់ពួកគេឲ្យយល់ពីបញ្ហានេះផងដែរ។
«ប្រសិនបើឪពុកម្ដាយទាំងអស់នៅតែមិនយកចិត្តទុកដាក់ទៀត ខ្ញុំនឹងធ្វើឲ្យអ្នកទាំងអស់គ្នាស្ថិតក្នុងកន្លែងឃុំឃាំងរយៈពេល៦ខែបន្តទៀត។ ខ្ញុំក៏ត្រៀមរួចហើយសម្រាប់ការដាក់ទោសប្រហារជីវិតចំពោះករណីនេះ»។ នេះជាការបញ្ជាក់របស់លោក Rajbhar ដែលត្រៀមអនុវត្តទោសធ្ងន់ធ្ងរលើឪពុកម្ដាយដែលមិនចង់ឲ្យកូនចូលសាលារៀន។
ក្រោយវីដេអូល្បីសុះសាយ រដ្ឋមន្ត្រីរូបនេះបញ្ជាក់ថា លោកមិនចោលសម្ដីនេះទេ តែចោទជាសំណួរថាហេតុអ្វីមិនឲ្យកូនទៅរៀន បើរដ្ឋាភិបាលផ្ដល់ការអប់រំគ្រប់យ៉ាងឲ្យសោះ?
សូមបញ្ជាក់ថា កុមារជាច្រើនក្នុងរដ្ឋ Uttar Pradesh មិនបានចូលរៀនទៀងទាត់ឡើយ។ របាយការណ៍របស់រដ្ឋាភិបាលក្នុងឆ្នាំ២០១៤ បង្ហាញថា មានកុមារតែ៥៥ភាគរយដែលបានចុះឈ្មោះចូលរៀន បានបង្ហាញខ្លួនក្នុងថ្នាក់ទៀងទាត់។ មួយភាគបួននៃប្រជាជនរដ្ឋ Uttar Pradesh សរុបចំនួន២០០លាននាក់ គឺជាកុមារ ប៉ុន្តែរដ្ឋមួយនេះមានអត្រាគ្រូបង្រៀនទាបបំផុត បើប្រៀបធៀបចំនួនកុមារទាំងអស់៕
Tag:
ឥណ្ឌា
Uttar Pradesh
Om Prakash Rajbhar
© រក្សាសិទ្ធិដោយ thmeythmey.com