បោះឆ្នោតកេនយ៉ា៖ បេក្ខជនប្រឆាំងធំជាងគេដកខ្លួន ឯបេក្ខជនតូចៗអាចប្រជែងជំនួស

អន្តរជាតិ

បោះឆ្នោតកេនយ៉ា៖ បេក្ខជនប្រឆាំងធំជាងគេដកខ្លួន ឯបេក្ខជនតូចៗអាចប្រជែងជំនួស

11, Oct 2017 , 4:59 pm

រូបភាព

បេក្ខជនប្រឆាំង Raila Odinga (រូបកណ្ដាលកាន់ក្រដាស) ប្រកាសដកខ្លួនពីការបោះឆ្នោតប្រធានាធិបតី (រូបភាព៖ Xinhua)

ដោយ: តន ចាន់រិទ្ធារ៉ា

បេក្ខជនប្រឆាំងធំជាងគេនៅកេនយ៉ា លោក Raila Odinga បានប្រកាសដកខ្លួនពីការបោះឆ្នោតជ្រើសរើសប្រធានាធិបតីឡើងវិញ ដែលគ្រោងធ្វើនៅថ្ងៃទី២៦ ខែតុលា។ ជុំវិញបញ្ហានេះ លោក Odinga ដែលចាញ់លោក Uhuru Kenyatta ក្នុងការបោះឆ្នោតលើកមុន មិនពេញចិត្តនឹងគណៈកម្មាធិការរៀបចំការបោះឆ្នោតដែលមិនកែទម្រង់តាមការចង់បានរបស់ខ្លួន។ ប៉ុន្តែតុលាការជាន់ខ្ពស់កេនយ៉ានិយាយថា បេក្ខជនតូចៗអាចចូលរួមប្រជែងក្នុងការបោះឆ្នោតលើកនេះបាន។

ការទាត់ចោលលទ្ធផលបោះឆ្នោតថ្ងៃទី៨ ខែសីហា ដែលប្រធានាធិបតី Uhuru Kenyatta ផ្ដួលបេក្ខជនបក្សប្រឆាំង Raila Odinga ក្លាយជារឿងភ្ញាក់ផ្អើលបំផុតក្នុងប្រវត្តិសាស្ត្រកេនយ៉ា។ តុលាការកំពូលកេនយ៉ាបានបញ្ជាឲ្យគណៈកម្មាធិការរៀបចំការបោះឆ្នោត រៀបចំការបោះឆ្នោតជ្រើសរើសប្រធានាធិបតីម្ដងទៀតនៅថ្ងៃទី២៦ ខែតុលា។ ប៉ុន្តែបេក្ខជនមកពីបក្សប្រឆាំងធំជាងគេលោក Odinga បានសម្រេចចិត្តមិនចូលរួមប្រជែងឡើយ។

ថ្លែងនៅថ្ងៃទី១០ ខែតុលា លោក Odinga ចាញ់លោក Kenyatta ទាំងមិនអស់ចិត្ត និយយាយថា វាជារឿងល្អបំផុតដែលបក្សរបស់លោកមិនដាក់បេក្ខជនចូលរួមការបោះឆ្នោតនៅថ្ងៃទី២៦ ខែតុលា។ បើតាមលោក Odinga ការណ៍មិនកែទម្រង់គណៈកម្មាធិការរៀបចំការបោះឆ្នោត គឺជាមូលហេតុសំខាន់នៃការដកខ្លួននេះ ដោយលោកអះអាងថា ការបោះឆ្នោតលើកនេះនឹងកាន់តែអាក្រក់ជាងលើកមុន ព្រោះអ្នករៀបចំការបោះឆ្នោតមានមុខដដែលៗ។

ភាពមិនប្រក្រតីក្នុងការបោះឆ្នោតថ្ងៃទី៨ ខែសីហា ជាមូលហេតុដែលតុលាការកំពូលកេនយ៉ាសម្រេចចិត្តរំលាយជ័យជម្នះរបស់លោក Kenyatta តាមបណ្ដឹងរបស់បក្សប្រឆាំងផ្ទាល់។ ការដកខ្លួនរបស់លោក Odinga ពីការបោះឆ្នោតម្ដងទៀតនេះ ធ្វើឲ្យមានការព្រួយបារម្ភខ្លាំង ប៉ុន្តែតុលាការជាន់ខ្ពស់កេនយ៉ាបានប្រកាសថា គណៈកម្មាធិការរៀបចំការបោះឆ្នោតគួរដាក់បេក្ខជនតូចៗផ្សេងទៀតទៅក្នុងការបោះឆ្នោតនេះ។

យោងតាមទីភ្នាក់ងារព័ត៌មាន Reuters លោក John Mativo នៅថ្ងៃទី១១ ខែតុលា បានបញ្ជាឲ្យគណៈកម្មាធិការខាងលើបញ្ចូលឈ្មោះលោក Ekuru Aukot ដែលជាបេក្ខជនទទួលបានសំឡេងមិនដល់មួយភាគរយក្នុងការបោះឆ្នោតលើកមុន ទៅក្នុងសន្លឹកឆ្នោតថ្ងៃទី២៦ ខែតុលា។ ចៅក្រមរូបនេះបញ្ជាក់ថា លោកមើលមិនឃើញពីមុលហេតុដែលត្រូវរារាំងបេក្ខជនផ្សេងពីការប្រជែងតំណែងប្រធានាធិបតីឡើយ។

មកទល់ពេលនេះ លោកប្រធានាធិបតី Kenyatta មិនទាន់និយាយអ្វីជុំវិញការដកខ្លួនរបស់គូប្រជែងសំខាន់របស់លោកទេ តែលោកផ្ទាល់ប្រាកដជាចូលរួមការបោះឆ្នោតលើកនេះហើយ។ ការបញ្ចូលបេក្ខជនមិនសូវមានប្រជាប្រិយភាព ទំនងជាសញ្ញាប្រាប់ថា ការបោះឆ្នោតនឹងត្រូវរៀបចំដាច់ខាត ទោះជាគ្មានវត្តមានបេក្ខជនសំខាន់ក្ដី។ វាក៏ជាឱកាសល្អសម្រាប់លោក Kenyatta ព្រោះលោកអាចទទួលជ័យជម្នះយ៉ាងងាយ៕