អន្តរជាតិ
ប្រមុខការទូតកូរ៉េខាងជើង៖ មានអ្នកជិតខាងដូចកូរ៉េខាងជើង ជារឿងល្អសម្រាប់រុស្ស៊ីទប់ទល់អាមេរិក រដ្ឋមន្រ្តីការបរទេសកូរ៉េខាងជើង រី យ៉ុងហូ (រូបភាព៖ AP)
× រដ្ឋមន្ត្រីការបរទេសកូរ៉េខាងជើង រី យ៉ុងហូ នៅថ្ងៃទី១១ ខែតុលា បានប្រាប់ទីភ្នាក់ងារព័ត៌មានរុស្ស៊ី TASS ថា កូរ៉េខាងជើងកំពុងដើរតួនាទីកូនជញ្ជីងដ៏មានតម្លៃដើម្បីថ្លឺងថ្លែងឥទ្ធិពលរបស់អាមេរិក ដែលតែងចាត់ទុកខ្លួនឯងជាមហាអំណាចតែមួយលើលោក។ បើតាមលោក រី យ៉ុងហូ ការណ៍មានអ្នកជិតខាងដូចកូរ៉េខាងជើង ពិតជាសមស្របនឹងផលប្រយោជន៍របស់រុស្ស៊ី ដែលកំពុងរងទណ្ឌកម្មអាមេរិកដូចកូរ៉េខាងជើងដែរ។
ថ្ងៃទី១២ ខែតុលា ជាខួបលើកទី៦៩នៃការបង្កើតទំនាក់ទំនងការទូតរវាងកូរ៉េខាងជើង និងរុស្ស៊ី។ ប៉ុន្តែប្រមុខការទូតកូរ៉េខាងជើង រី យ៉ុងហូ និយាយថា ចំណងការទូតទ្វេភាគីមិនសូវល្អឡើងនាពេលបច្ចុប្បន្ន ព្រោះមានកត្តាខាងក្នុង និងខាងក្រៅ មករារាំង ក៏ដូចជាការមានជំហរខុសគ្នាលើបញ្ហាជាច្រើន។ លោក រី យ៉ុងហូ សង្ឃឹមថា ទំនាក់ទំនងប្រវត្តិសាស្ត្រនេះ នឹងល្អប្រសើរឡើងវិញព្រោះមានចំណុចដូចគ្នាជាច្រើនដូចគ្នាដែរ។
ដោយសំដៅដល់កម្មវិធីអភិវឌ្ឍនុយក្លេអ៊ែរ លោក រី យ៉ុងហូ បញ្ជាក់ថា កូរ៉េខាងជើងកំពុងមានជោគជ័យ និងដើរតួជាកម្លាំងចលករដ៏សំខាន់ក្នុងការទប់ទល់មហាអំណាចអាមេរិក។ រដ្ឋមន្ត្រីការបរទេសកូរ៉េខាងជើងរូបនេះជឿថា មានអ្នកជិតខាងខ្លាំងពូកែនៅក្បែរខ្លួន គឺជារឿងល្អសម្រាប់រុស្ស៊ី។ នេះក៏ដោយសារតែទាំងរុស្ស៊ី ទាំងកូរ៉េខាងជើង កំពុងស្ថិតក្រោមនយោបាយទណ្ឌកម្មរបស់អាមេរិកដូចគ្នា ហើយវ៉ាស៊ីនតោនព្យាយាមបង្កការយល់ច្រឡំរវាងមូស្គូ និងព្យុងយ៉ាងទៀតផង។
ជាញឹកញាប់ ក្រុងមូស្គូបានបង្ហាញជំហរប្រឆាំងការដាក់ទណ្ឌកម្មប្រឆាំងក្រុងព្យុងយ៉ាងដើម្បីបង្ខំឲ្យបញ្ចប់កម្មវិធីនុយក្លេអ៊ែរនោះ ព្រោះវាជារឿងគ្មានន័យអ្វីឡើយ និងមិនអាចជួយដោះស្រាយបញ្ហាបានទេ តែនឹងធ្វើឲ្យស្ថានការណ៍កាន់តែស្មុគស្មាញទៅទៀត។ ប្រធានាធិបតី វ្ល៉ាឌីមៀ ពូទីន ធ្លាប់និយាយហើយថា កូរ៉េខាងជើងសុខចិត្តយកស្មៅធ្វើជាអាហារ ក៏មិនព្រមបោះបង់កម្មវិធីនុយក្លេអ៊ែរដែរ ដរាបណាពួកគេនៅតែព្រួយបារម្ភពីសុវត្ថិភាព។
ក្នុងកិច្ចសម្ភាសជាមួយទីភ្នាក់ងារព័ត៌មាន TASS មន្ត្រីការទូតកូរ៉េខាងជើងដដែលនេះបានបញ្ជាក់ជំហរច្បាស់ថា ព្យុងយ៉ាងមិនបោះបង់កម្មវិធីនុយក្លេអ៊ែររបស់ខ្លួនទេ ទោះក្នុងលក្ខខណ្ឌណាក៏ដោយ ហើយក៏មិនចរចាលើកម្មវិធីនេះដែរ។ លោក រី យ៉ុងហូ ដែលទើបឡើងតំណែងក្នុងជួរបក្សពលករកូរ៉េបន្ថែមថា នុយក្លេអ៊ែរជាប្រដាប់ការពារអធិបតេយ្យកូរ៉េខាងជើងពីការគំរាមកំហែងរបស់ប្រទេសផ្សេង ហើយកូរ៉េខាងជើងក៏មានសិទ្ធិអភិវឌ្ឍអាវុធប្រភេទនេះដែរ។
ឆ្លើយតបការគំរាមកំហែងម្ដងហើយម្ដងទៀតពីសំណាក់ប្រធានាធិបតី ដូណាល់ ត្រាំ លោក រី យ៉ុងហូ ចាត់ទុកពាក្យសម្ដីទាំងនោះជាការជាន់ឆ្នួនបញ្ឆេះសង្គ្រាម ដែលត្រូវតែតបបវិញដាច់ខាត។ ជុំវិញលទ្ធភាពចរចាវិញ ប្រមុខការទូតកូរ៉េខាងជើងបានប្រាប់ឲ្យអាមេរិកបញ្ឈប់នយោបាយបង្ករឿងខ្លួន ទើបការចរចាអាចទៅមុខបាន៕
Tag:
កូរ៉េខាងជើង
រុស្ស៊ី
អាមេរិក
Ri Yongho
© រក្សាសិទ្ធិដោយ thmeythmey.com