ធីល័រសិន៖ «អាមេរិកនឹងបន្តវិធានការទូតជាមួយកូរ៉េខាងជើង រហូល់ទាល់គ្រាប់បែកទីមួយធ្លាក់ចុះសិន »

អន្តរជាតិ

ធីល័រសិន៖ «អាមេរិកនឹងបន្តវិធានការទូតជាមួយកូរ៉េខាងជើង រហូល់ទាល់គ្រាប់បែកទីមួយធ្លាក់ចុះសិន »

16, Oct 2017 , 10:36 am

រូបភាព

ដោយ: សៅ ផលនិស្ស័យ (Sao Phal Niseiy)

ដរាបណាគ្រាប់បែកទីមួយរបស់កូរ៉េខាងជើងមិនធ្លាក់ចុះទេ អាមេរិកនឹងនៅបន្តប្រើប្រាស់នយោបាយការទូតដើម្បីដោះស្រាយបញ្ហាកូរ៉េខាងជើងជានិច្ច ហើយនេះជាបញ្ជារបស់ប្រធានាធិបតី។ នេះជាការបញ្ជាក់របស់ប្រមុខការទូតអាមេរិកនៅចុងសប្តាហ៍កន្លងទៅក្នុងកម្មវិធីជជែកពិភាក្សា State of the Union ដែលរៀបចំដោយសារព័ត៌មាន CNN។

រដ្ឋមន្ត្រីការបរទេសអាមេរិកលោក រិចធីល័រសិន បានបញ្ជាក់ជាថ្មីថា ប្រធានាធិបតីដូណាល់ ត្រាំ បានណែនាំលោកលោកឲ្យបន្តប្រើប្រាស់ «មធ្យោបាយការទូត»ជាមួយកូរ៉េខាងជើងរហូតទាល់តែគ្រាប់បែកទីមួយធ្លាក់ចុះមកសិន»។

លោក ធីល័រសិន បានបញ្ជាក់ដូច្នេះ៖ ប្រធានាធិបតីត្រាំ បានបញ្ជាក់ច្បាស់មកកាន់ខ្ញុំហើយថា ឲ្យខ្ញុំបន្តការប្រឹងប្រែងប្រើប្រាស់មធ្យោបាយការទូតទៀតចំពោះបញ្ហាកូរ៉េខាងជើង។ គាត់បានប្រាប់ខ្ញុំច្បាស់ហើយថា វិធានការការទូតនឹងបន្តរហូតដល់គ្រាប់បែកទីមួយធ្លាក់ចុះមកសិន។»។

យ៉ាងណាមិញ ការលើកឡើងបែបនេះ វាហាក់បីដូចជាផ្ទុយពីជំហររបស់ប្រធានាធិបតី ដូណាល់ ត្រាំ ដែលបន្តប្រើប្រាស់សម្តីធ្ងន់ៗព្រមានកូរ៉េខាងជើងនោះ។ ប៉ុន្តែប្រមុខការទូតអាមេរិករូបនេះទំនងជាព្យាយាមបន្ធូរបន្ថយភាពក្តីបារម្ភ និងភាពតានតឹងដែលកើតឡើងកន្លងមកដោយការប្រឈមមុខដាក់គ្នារវាងអាមេរិកនិងកូរ៉េខាងជើងនោះ។

ក្នុងកម្មវិធីពិភាក្សារបស់ទូរទស្សន៍ CNN ដដែល រដ្ឋមន្ត្រីការបរទេសអាមេរិកខាងលើបានអះអាងថា ការប្រឹងប្រែងរបស់អាមេរិកក្នុងការជំរុញឲ្យក្រុងព្យុងយ៉ាងចូលកៀកកាន់តែជិតនឹងតុចរចាកំពុងតែមានផ្លែផ្កា។

លោក ធីល័រសិនបន្តដូច្នេះ៖ «ខ្ញុំគិតថា ទាក់ទិនបញ្ហាកូរ៉េខាងជើង យើងបានបង្រួបបង្រួមសហគមន៍អន្តរជាតិទាំងមូល។ ប្រធានាធិបតី ត្រាំ ក៏ផ្តល់សារមួយដ៏ម៉ឺងម៉ាត់ទៅកាន់កូរ៉េខាងជើងឲ្យបានដឹងថា អ្នកត្រូវចូលមកជជែកជាមួយយើងដើម្បីដោះស្រាយបញ្ហា ព្រោះថាយើងមិនអនុញ្ញាតឲ្យអ្នកមានអាវុធនុយក្លេអ៊ែរឡើយ»។

ប៉ុន្មានសប្តាហ៍ចុងក្រោយនេះ កូរ៉េខាងជើងមិនបានបង្កបញ្ហាដោយបាញ់សាកល្បងមីស៊ីលជាថ្មីឡើយសូម្បីតែក្នុងពីធីបុណ្យខួបលើកទី ៧២ នៃការបង្កើតបក្សពលកររបស់ខ្លួនកាលពីសប្តាហ៍មុននោះ។ នេះបង្ហាញឲ្យឃើញពីសញ្ញាវិជ្ជមានខ្លះៗចំពោះការបន្តប្រើប្រាស់មធ្យោបាយការទូតដើម្បីដោះស្រាយវិបត្តិ ហើយលោកលើកឡើងពីការចូលរួមរបស់ចិន និងរុស្ស៊ីដែលជាខ្នងបង្អែកការទូតដ៏ធំរបស់កូរ៉េខាងជើងក្នុងការចាត់វិធានការក្តៅដាក់គំនាបលើកូរ៉េខាងជើងផង។

បច្ចុប្បន្ននេះក្រុងវ៉ាស៊ីនតោនបន្តទំនាក់ទំនងជាមួយក្រុងប៉េកាំងដើម្បីពិភាក្សាគ្នា និងស្វែងរកដំណោះស្រាយដើម្បីបញ្ឈប់វិបត្តិនុយក្លេអ៊ែរ និងរក្សាសន្តិភាពក្នុងតំបន់ផងដែរ។ បើតាមសម្តីរបស់លោក ធីល័រសិន ចិនយល់ច្បាស់ពីគោលជំហររបស់អាមេរិកក្នុងការដោះស្រាយបញ្ហាកូរ៉េខាងជើង ហើយទំនាក់ទំនងជិតស្និទ្ធរវាងក្រុងវ៉ាស៊ីនតោន និងក្រុងប៉េកាំងនឹងជួយឲ្យការស្វែងរកដំណោះស្រាយកាន់តែមានប្រសិទ្ធភាពផង។