មហាសន្និបាតបក្សកុម្មុយនីស្តចិន៖ គ្មានអាហារសមុទ្រ ឬម្ហូបថ្លៃៗសម្រាប់ទទួលប្រតិភូបក្សឡើយ

អន្តរជាតិ

មហាសន្និបាតបក្សកុម្មុយនីស្តចិន៖ គ្មានអាហារសមុទ្រ ឬម្ហូបថ្លៃៗសម្រាប់ទទួលប្រតិភូបក្សឡើយ

18, Oct 2017 , 10:28 am

រូបភាព

ដោយ: តន ចាន់រិទ្ធារ៉ា

ប៉េកាំង៖ ខុសពីមហាសន្និបាតលើកមុនៗ ប្រតិភូដែលចូលមហាសន្និបាតបក្សកុម្មុយនីស្តចិនលើកទី១៩ ដែលចាប់ផ្ដើមនៅថ្ងៃទី១៨ ខែតុលា នឹងមិនមានអាហារថ្លៃៗ ឬសមុទ្រសម្រាប់ទទួលពួកគេឡើយ។ នេះគឺជាផ្នែកមួយនៃគោលនយោបាយរបស់អគ្គលេខាធិការបក្សកុម្មុយនីស្តចិនលោក ស៊ី ជិនភីង ក្នុងការកាត់បន្ថយការចាយវាយថវិកាលើការចំណាយដែលមិនចាំបាច់។

គ្មានផ្លែឈើក្នុងបន្ទប់សណ្ឋាគារ គ្មានការកាត់សក់ដោយសេរី និងគ្មានបង្កងសម្រាប់ទទួលប្រតិភូចំនួន២២៨០នាក់ដែលចូលរួមមហាសន្និបាតលើកទី១៩ នេះឡើយ។ នេះជាគោលការណ៍កំណត់ដោយលោក ស៊ី ជិនភីង ផ្ទាល់ បន្ទាប់ពីកាន់អំណាចក្នុងឆ្នាំ២០១២ សំដៅកាត់បន្ថយការចំណាយថវិការដ្ឋខ្ជះខ្ជាយ និងដើម្បីប្រយុទ្ធប្រឆាំងអំពើពុករលួយ។

ចំណាត់ការបែបនេះត្រូវបានដាក់ចេញ ដើម្បីធានាថា គ្មានមន្ត្រីណាបំពានអំណាចរបស់ខ្លួនក្នុងការចាយវាយមិនចាំបាច់ ព្រោះកន្លងមក មានករណីមន្ត្រីបក្សកុម្មុយនីស្តចិនជាច្រើនបានរំលោភអំណាចរបស់ខ្លួន ដែលធ្វើឲ្យប្រជាជនចិនថ្នាំងថ្នាក់ចិត្តចំពោះបក្សកុម្មុយនីស្តចិន។ បើតាមទីភ្នាក់ងារព័ត៌មាន Reuters លោក Wang Lilian ដែលធ្លាប់មើលការខុសត្រូវផ្នែកបដិសណ្ឋារកិច្ចមហាសន្និបាតបក្សបីលើកកន្លងមកនិយាយថា មហាសន្និបាតបក្សលើកនេះខុសពីសន្និបាតរាល់ដង។

ខុសប្លែកត្រង់ថា ក្នុងមហាសន្និបាតលើកទី១៩ នៅតាមបន្ទប់សណ្ឋាគារមិនមានផ្លែឈើទទួលប្រតិភូដូចមុនឡើយ។ ចំណែកឯម្ហូបអាហារវិញក៏ត្រូវរៀបចំសាមញ្ញ ដោយគ្មានអាហារសមទ្រថ្លៃៗ ឬក៏បង្កងឡើយ។ លើសពីនោះ ប្រតិភូទាំងអស់ក៏មិនទទួលបានសេវាកម្មកាត់សក់ដោយមិនអស់ថ្លៃ ឬក៏សេវាកម្មរក្សាសម្ផស្សអ្វីដែរ។

សូមបញ្ជាក់ថា ក្រោយការឡើងកាន់តំណែងអគ្គលេខាធិការបក្សភ្លាមៗក្នុងឆ្នាំ២០១២ លោក ស៊ី ជិនភីង ក៏បានដាក់គោលដៅប្រឆាំងអំពើពុករលួយ និងការចំណាយខ្ជះខ្ជាយភ្លាមដែរ។ បក្សកុម្មុយនីស្តចិនបានដាក់គោលការណ៍៨ចំណុចសម្រាប់សមាជិកបក្ស និងមន្ត្រីទាំងអស់ឲ្យអនុវត្តតាម ដោយបង្គាប់ឲ្យមានការរឹតត្បិតការចំណាយ និងលុបចោលការងារដែលមិនចាំបាច់ដូចជាការិយាធិបតេយ្យ និងភាពហ៊ឺហាជាដើម។

មហាសន្និបាតបក្សកុម្មុយនីស្តចិនចេញផ្សាយរបាយការណ៍ជាភាសាវៀតណាម និងភាសាឡាវ

មហាសន្និបាតបក្សកុម្មុយនីស្តចិនរយៈពេលមួយសប្ដាហ៍ដែលចាប់ផ្ដើមនៅថ្ងៃទី១៨ ខែតុលា នឹងបញ្ចប់នៅថ្ងៃទី២៤ ខែតុលា។ កិច្ចប្រជុំជាច្រើននឹងរៀបចំឡើង ខណៈមហាសន្និបាតក៏បានបង្កើតមជ្ឈមណ្ឌលព័ត៌មានមួយដើម្បីផ្ដល់ព័ត៌មានទាក់ទងកិច្ចប្រជុំ និងផ្សព្វផ្សាយរបាយការណ៍ដែលជាលទ្ធផលនៃមហាសន្និបាតលើកនេះផងដែរ។

របាយការណ៍នៃមហាសន្និបាតលើកទី១៩ ត្រូវផ្សព្វផ្សាយចំនួន១២ភាសា។ «មជ្ឈមណ្ឌលព័ត៌មាននឹងបង្កើតតុចែកចាយឯកសារនៅជាន់ទីពីរនៃមហាសាលប្រជាជន និងផ្ដល់របាយការណ៍នៃកិច្ចមហាសន្និបាតលើកទី១៩ នៃបក្សកុម្មុយនីស្តចិន ជាភាសាចិន អង់គ្លេស បារាំង អេស្ប៉ាញ ជប៉ុន រុស្ស៊ី អាល្លឺម៉ង់ អារ៉ាប់ ព័រទុយហ្កាល់ កូរ៉េ វៀតណាម និងឡាវ»។ នេះបើតាមសៀវភៅណែនាំសម្រាប់អ្នកសារព័ត៌មានដែលបោះពុម្ភដោយមជ្ឈមណ្ឌលព័ត៌មាន៕