អន្តរជាតិ
ស៊ី ជិនភីង៖ ចិននឹងមានកងទ័ពលំដាប់ពិភពលោកនៅពាក់កណ្ដាលសតវត្សរ៍ទី២១
× ប៉េកាំង៖ អគ្គលេខាធិការកុម្មុយនីស្តចិនលោក ស៊ី ជិនភីង បាននិយាយថា ចិននឹងមានកងទ័ពលំដាប់ពិភពលោកនៅពាក់កណ្ដាលសតវត្សរ៍ទី២១ ហើយលោកប្រកាសបន្តការកែទម្រង់វិស័យយោធាដើម្បី ឲ្យចិនមានកងទ័ពដ៏ខ្លាំងក្លា។ លោក ស៊ី ជិនភីង និយាយបែបនេះក្នុងពិធីបើកមហាសន្និបាតបក្សកុម្មុយនីស្តចិននៅថ្ងៃទី១៨ ខែតុលា នៅវិមានប្រជាជនចិនក្នុងរដ្ឋធានីប៉េកាំង។
មិនយូរទៀតឡើយ មហាយក្សចិននឹងមានកងទ័ពស្តង់ដាពិភពលោក មិនថាកងទ័ពជើងគោក ជើងទឹក និងជើងអាកាសឡើយ។ អគ្គលេខាធិការបក្សកុម្មុយនីស្តចិនលោក ស៊ី ជិនភីង លើកឡើងថា ចិននឹងបន្តកសាងកងទ័ពរបស់ខ្លួនឲ្យបានខ្លាំងពូកែ និងធ្វើទំនើបកម្មវិស័យការពារជាតិ និងយោធា ព្រោះចិនបានដើរមកដល់ចំណុចចាប់ផ្ដើមថ្មីមួយទៀតហើយ គឺការប្រែប្រួលក្នុងវិស័យសន្តិសុខជាតិ និងភាពចាំបាច់ដើម្បីមានកងទ័ពលំដាប់ពិភពលោក។
ថ្លែងក្នុងកិច្ចប្រជុំមហាសន្និបាតបក្សលើកទី១៩ លោក ស៊ី ជិនភីង និយាយថា បក្សកុម្មុយនីស្តចិនព្យាយាមសម្រេចឲ្យគោលដៅខាងលើ ដោយអនុវត្តឲ្យបានពេញលេញគំនិតនយោបាយរបស់ខ្លួនក្នុងការពង្រឹងកងទ័ពក្នុងយុគសម័យថ្មីនេះ សម្របយុទ្ធសាស្ត្រយោធាក្នុងលក្ខខណ្ឌថ្មី ក៏ដូចជាសាងសង់យោធាមួយដែលខ្លាំង និងមានទំនើបបំផុត។ បើតាមលោក ស៊ី ការពង្រឹងសមត្ថភាពប្រយុទ្ធ គឺជាគោលដៅសំខាន់បំផុត។
អគ្គលេខាធិការបក្សរូបនេះបន្តថា នៅឆ្នាំ២០២០ ការធ្វើយន្តកម្មផ្នែកយោធានឹងត្រូវបញ្ចប់ ខណៈដែលប្រព័ន្ធបច្ចេកវិទ្យាកងទ័ពក៏ត្រូវបានពង្រឹង ហើយសមត្ថភាពយុទ្ធសាស្ត្រក៏រីកចម្រើនដែរនោះ។ ដោយឡែកទំនើបកម្មយោធាវិញត្រូវផ្ដោតលើគ្រប់មុខសញ្ញាទាំងការអភិវឌ្ឍទ្រឹស្តី រចនាសម្ព័ន្ធចាត់តាំង ទាហាន និងសព្វាវុធជាដើម។ ពោល គឺនៅឆ្នាំ២០៣៥ ទំនើបកម្មវិស័យការពារជាតិនឹងត្រូវបញ្ចប់ ហើយនៅពាក់កណ្ដាលសតវត្សរ៍ទី២១ យោធាចិនពិតជាក្លាយជាកងទ័ពលំដាប់អន្តរជាតិ។
អ្វីគួរឲ្យកត់សម្គាល់នោះ លោក ស៊ី ជិនភីង បានប្រាប់សមាជិកបក្សកុម្មុយនីស្តចិនថា កងទ័ពកសាងឡើងដើម្បីប្រយុទ្ធ ហើយឈ្នះ។ លោកបានសង្កត់ធ្ងន់ថា សមត្ថភាពប្រយុទ្ធ គឺជារឿងសំខាន់សម្រាប់យោធា និងត្រូវផ្ដោតសំខាន់លើវិធីសាស្ត្រទទួលជោគជ័យក្នុងពេលប្រយុទ្ធ។ ក្នុងន័៍យយនេះ លោក ស៊ី ជិនភីង ក៏ប្រកាសផែនការក្នុងការអភិវឌ្ឍកម្លាំងប្រយុទ្ធ និងកម្លាំងគាំទ្រថ្មី ការហ្វឹកហាត់ក្នុងលក្ខខណ្ឌប្រយុទ្ធ ព្រមទាំងការពង្រឹងប្រព័ន្ធបច្ចេកវិទ្យាក្នុងការបញ្ជាកងទ័ពទៀតផង។
សូមរម្លឹកដែរថា តាំងពីការឡើងកាន់តំណែងអគ្គលេខាធិកាបក្សនៅឆ្នាំ២០១២ មកនោះ លោក ស៊ី ជិនភីង បានផ្លាស់ប្ដូរមុខមាត់កងទ័ពចិនយ៉ាងខ្លាំង ដោយផ្ដោតសំខាន់លើការពង្រឹងសមត្ថភាពកងទ័ពគ្រប់រូប និងការកែសម្រួលរចនាសម្ព័ន្ធតែម្ដង។ ក្រៅពីផែនការកាត់បន្ថយកងទ័ពចំនួនបីសែននាក់នោះ យោធាចិនបានផ្លាស់ប្ដូរប្រព័ន្ធចាត់តាំងយ៉ាងច្រើន តាំងពីថ្នាក់កំពូល ដល់ថ្នាក់ទាប ហើយអំណាចបញ្ជាទាំងអស់ធ្លាក់ដល់ដៃគណៈកម្មការយោធាមជ្ឈិម ដែលលោក ស៊ី ជិនភីង ផ្ទាល់អង្គុយកៅអីប្រធាន៕
Tag:
19thCPC
មហាសន្និបាតទី ១៩
ចិន
ស៊ី ជិនភីង
© រក្សាសិទ្ធិដោយ thmeythmey.com