អន្តរជាតិ
សិង្ហបុរី និងអាមេរិកពង្រឹងកិច្ចសហប្រតិបត្តិការសន្តិសុខ និងពាណិជ្ជកម្មឲ្យកាន់តែស៊ីជម្រៅ
× នាយករដ្ឋមន្ត្រីសិង្ហបុរី លី សៀនឡុងចាប់ផ្តើមដំណើរទស្សនកិច្ចរបស់ខ្លួនទៅកាន់សហរដ្ឋអាមេរិកជាលើកដំបូងក្នុងអាណត្តិរបស់ប្រធានាធិបតី ដូណាល់ ត្រាំ។ ក្នុងដំណើទស្សនកិច្ចប្រមុខរដ្ឋាភិបាលសិង្ហបុរីនេះ គេឃើញមានការចុះកិច្ចព្រមព្រៀងទ្វេភាគីរវាងអាមេរិក និងសិង្ហបុរីក្នុងការទិញយន្តហោះដឹកអ្នកដំណើរ Boeing ចំនួន ៣៩ គ្រឿងដែលមានតម្លៃរហូតដល់ ១៦ពាន់លានដុល្លារ។ មេដឹកនាំទាំងពីរក៏ប្តេជ្ញាពង្រឹងកិច្ចសហប្រតិបត្តិការទ្វេភាគីជាពិសេសផ្នែកសន្តិសុខ និងសេដ្ឋកិច្ចដើម្បីសម្រេចផលប្រយោជន៍រួម។ អ្វីដែលសំខាន់មេដឹកនាំសិង្ហបុរីក៏បានទទូចឲ្យរដ្ឋបាលអាមេរិកបន្តវត្តមានរបស់ខ្លួន និងកុំបោះបង់ឱកាសក្រសោបតំបន់អាស៊ានឲ្យសោះនៅពេលអនាគត។
ដំណើរទស្សនកិច្ចទៅកាន់សហរដ្ឋអាមេរិករបស់នាយករដ្ឋមន្ត្រីសិង្ហបុរីលោក លី សៀនឡុងចាប់ផ្តើមឡើងនៅថ្ងៃ ២៣ ខែតុលាម្សិលមិញនេះ។ វត្តមានរបស់លោក នៅសហរដ្ឋអាមេរិកបង្ហាញឲ្យឃើញពីទំនាក់ទំនងស្និទ្ធស្នាលរវាងលោក សិង្ហបុរី និងសហរដ្ឋអាមេរិកផង។
លោក លី សៀនឡុង បានជួបពិភាក្សាជាមួយប្រធានាធិបតីអាមេរិក ដូណាល់ ត្រាំ នៅក្នុងការិយាល័យពងក្រពើជាកន្លែងដែលទទួលស្វាគមន៍មេដឹកនាំបរទេសនោះ។ ក្នុងឱកាសនោះ លោក ត្រាំ បានលើកសរសើរលោក លី សៀនឡុង ដែលបានដឹកនាំសិង្ហបុរីឲ្យរីកចម្រើនទៅមុខរៀងរហូតមក ហើយលោកក៏អះអាងថា ទំនាក់ទំនងទ្វេភាគីរវាងអាមេរិកនិងសិង្ហបុរីពេលនេះល្អូកល្អឺនជាពេលណាៗទាំងអស់ដែរ។
អ្វីដែលគួរឲ្យចាប់អារម្មណ៍ មេដឹកនាំទាំងពីរក៏បានធ្វើជាអធិបតីក្នុងការចុះហត្ថលេខាលើកិច្ចព្រមព្រៀងទិញយន្តហោះប៊ូអ៊ីងចំនួន ៣៩ គ្រឿងពីសហរដ្ឋអាមេរិកផងដែរក្នុងទំហំទឹកប្រាក់ ១៦ពាន់លានដុល្លារអាមេរិក។
នៅក្នុងសន្និសីទសារព័ត៌មានរួមគ្នា លោក លី សៀនឡុង ក៏បានពិព៌ណនាពីសម្ព័ន្ធភាពរវាងអាមេរិក និងសិង្ហបុរីបច្ចុប្បន្នដែរ។ ទំនាក់ទំនងរវាងអាមេរិក និងសិង្ហបុរីស្ថិតក្នុងស្ថានភាពស៊ីជម្រៅ និងមានវិសាលភាពធំទូលាយគ្របដណ្តប់លើច្រើនវិស័យទាំងសេដ្ឋកិច្ច សន្តិសុខ និង ការពារជាតិ។
ពាក់ព័ន្ធវិស័យសេដ្ឋកិច្ច លោក លី សៀនឡុងបាន រៀបរាប់អាមេរិកជាដៃគូសេដ្ឋកិច្ចដ៏សំខាន់បំផុតមួយ ដោយទំហំសេដ្ឋកិច្ចទ្វេភាគីរវាងប្រទេសទាំងពីរកើនដល់ច្រើនជាង ៦៨ពាន់លានដុល្លារឯណោះនៅឆ្នាំ ២០១៦ ។ បន្ថែមពីនេះ ទំនិញ និងសេវារបស់អាមេរិកនាំចេញទៅសិង្ហបុរីកើនឡើងច្រើនជាង៤៣ពាន់លានដុល្លាររៀងរាល់ឆ្នាំ។
ក្រៅពីសេដ្ឋកិច្ចទំនាក់ទំនងសន្តិសុខនិងការពារជាតិរវាងសិង្ហបុរី និងសហរដ្ឋអាមេរិកក៏កាន់តែរឹងមាំនិងស៊ីជម្រៅដូចគ្នា។ ដើម្បីពង្រឹងទំនាក់ទំនងនិងកិច្ចសហប្រតិបត្តិការនេះបន្ថែម សិង្ហបុរីក៏បានប្រកាសបន្តចូលរួមប្រតិបត្តិការយោធាជាមួយសម្ព័ន្ធអន្តរជាតិដឹកនាំដោយអាមេរិកដើម្បីកម្ចាត់ក្រុមភេរវជនរដ្ឋឥស្លាមឬដែស្ហនៅមជ្ឈិមបូព៌ាឆ្នាំក្រោយទៀត។
សិង្ហបុរីក្លាយជាប្រទេសក្នុងតំបន់អាស៊ានតែមួយគត់ដែលបានបញ្ជូនកងកម្លាំងរបស់ខ្លួនដើម្បីទៅចូលរួមក្នុងប្រតិបត្តិការកម្ចាត់ក្រុមដែស្ហ។ ហើយចាប់ពីឆ្នាំ ១៩៩០ ប្រទេសនេះបានទទួលកងទ័ពអាកាស និងកងទ័ពជើងទឹកអាមេរិកដែលពង្រាយមកកាន់តំបន់អាស៊ីអាគ្នេយ៍រហូតមក។ ចំណែកអាមេរិកវិញ ក៏ទទួលកងទ័ពសិង្ហបុរីច្រើនជាង ១ពាន់នាក់ឲ្យមកហ្វឹកហ្វឺននៅក្នុងទឹកដីខ្លួនរៀងរាល់ឆ្នាំផងដែរ។
សិង្ហបុរីទទូចឲ្យអាមេរិកយកចិត្តទុកដាក់ចំពោះតំបន់អាស៊ាន
ក្នុងសន្និសីទសារព័ត៌មានរួមគ្នានោះដែរ លោក លី សៀនឡុង បានគូសបញ្ជាក់ពីសារសំខាន់នៃទស្សនកិច្ចរបស់លោក ដូណាល់ ត្រាំ នៅខែក្រោយមកកាន់តំបន់អាស៊ីអាគ្នេយ៍ ដោយលោកនឹងទៅចូលរួមកិច្ចប្រជុំកិច្ចវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅក្នុងប្រទេសវៀតណាម និងកិច្ចប្រជុំអាស៊ាននៅហ្វីលីពីននោះ។
ទូរទស្សន៍សិង្ហបុរី Channel News Asia បានស្រង់សម្តីលោក លី សៀនឡុងដូច្នេះថា៖« វត្តមានរបសើលោក ត្រាំនៅអាស៊ីមានន័យខ្លាំងណាស់ចំពោះមិត្ត និងសម្ព័ន្ធមិត្តរបស់អាមេរិកក្នុងតំបន់ ហើយវាក៏នឹងបើកទ្វារ និងអភិវឌ្ឍទីផ្សារសម្រាប់អាមេរិកក្នុងតំបន់»។
នៅឆ្នាំក្រោយនេះ សិង្ហបុរីដែលនឹងធ្វើជាប្រធានអាស៊ានប្តូរវេននឹងប្រើប្រាស់តួនាទីរបស់ខ្លួនក្នុងនាមជាប្រធានអង្គការតំបន់ពង្រឹងទំនាក់ទំនងប្រទេសតំបន់ជាមួយសហរដ្ឋអាមេរិកឲ្យកាន់តែរឹងមាំថែមទៀត។ ដូចឃើញស្រាប់លោក លី ក៏បានឆ្លៀតឱកាសអំពានាវទៅកាន់មេដឹកនាំអាមេរិកឲ្យយកចិត្តទុកដាក់ចំពោះតំបន់អាស៊ីអាគ្នេយ៍ និងកុំឲ្យបាត់បង់ឱកាសបង្កើនទំនាក់ទំនងជាមួយបណ្តាប្រទេសក្នុងតំបន់ឲ្យសោះ។
យ៉ាងណាមិញ ក្នុងដំណើរទស្សនកិច្ចលើកដំបូងមកអាស៊ីនេះ លោក ត្រាំ មិនបានមកទស្សនកិច្ចនៅសង្ហបុរីឡើយ។ ប៉ុន្តែលោក លី បានអញ្ចើញលោក ត្រាំ ឲ្យមកបំពេញទស្សនកិច្ចនៅសិង្ហបុរីនៅឆ្នាំក្រោយ ហើយលោក ត្រាំក៏ទទួលយកការអញ្ជើញរបស់លោក លី រួចរាល់ដែរ៕
Tag:
សិង្ហបុរី
អាមេរិក
លី សៀនឡុង
ដូណាល់ ត្រាំ
© រក្សាសិទ្ធិដោយ thmeythmey.com