អន្តរជាតិ
លី សៀនឡុង៖«រដ្ឋបាលត្រាំ កំពុងពិនិត្យនយោបាយខ្លួនឡើងវិញ ប៉ុន្តែមិនដកខ្លួនពីអាស៊ីឡើយ»
× ក្នុងដំណើរទស្សនកិច្ចផ្លូវនៅអាមេរិក នាយករដ្ឋមន្ត្រីសិង្ហបុរី លោក លី សៀនឡុង បានលើកឡើងថា សហរដ្ឋអាមេរិកពិតជាកំពុងត្រួតពិនិត្យឡើងវិញនូវគោលនយោបាយការបរទេសនិងសេដ្ឋកិច្ចជាមួយតំបន់អាស៊ីពិតមែន។ ប៉ុន្តែលោកមិនបានលឺមន្ត្រីអាមេរិចណាមួយនិយាយពីរឿង«អាមេរិកដកខ្លួនចេញពីតំបន់»ដូចគេបារម្ភឡើយ។
ក្នុងពេលផ្តល់បឋកថាសាធារណៈផ្តោតលើទំនាក់ទំនងអាមេរិក និងសិង្ហបុរី រួមជាមួយបញ្ហាយុទ្ធសាស្ត្រតំបន់អាស៊ីប៉ាស៊ីហ្វិកនៅក្រុមប្រឹក្សាទំនាក់ទំនងអន្តរជាតិ (Council on Foreign Relations) នាយករដ្ឋមន្ត្រីសិង្ហបុរីលោក លី សៀនឡុង ពន្យល់ថា អាមេរិកគ្មានចេតនាដកខ្លួនចេញពីតំបន់អាស៊ីឡើយ។
លោកអះអាងថា លោក បានជួបពិភាក្សាជាមួយប្រធានាធិបតី ដូណាល់ ត្រាំ អនុប្រធានាធិបតី Mike Pence រដ្ឋមន្ត្រីការបរទេស រិច ធីល័រសិន រដ្ឋមន្ត្រីការពារជាតិ ជេម ម៉ាទីស រួមទាំងទីប្រឹក្សាសន្តិសុខជាតិH.R. McMaster ផងដែរ។ មន្ត្រីជាន់ខ្ពស់នៃរដ្ឋបាលលោក ត្រាំ សុទ្ធតែបានអះអាងថា អាមេរិកកំពុងត្រួតពិនិត្យឡើងវិញនូវយុទ្ធសាស្ត្រនិងគោលនយោបាយរបស់ខ្លួនមកកាន់តំបន់អាស៊ី ប៉ុន្តែគ្មានការដកខ្លួនចេញពីតំបន់ដូចគេធ្លាប់បារម្ភឡើយ។
ក្នុងវីដេអូក្រុមប្រឹក្សាទំនាក់ទំនងអន្តរជាតិ នាយករដ្ឋមន្ត្រីសិង្ហបុរីបានឆ្លើយតបសំណួរអ្នកចូលរួមទាក់ទងគោលនយោបាអាមេរិកនៅអាស៊ីដូច្នេះ៖ «ខ្ញុំគិតថា រដ្ឋបាលលោក ត្រាំ កំពុងបន្តអភិវឌ្ឍគោលនយោបាយនិងយុទ្ធសាស្ត្រខ្លួនមកកាន់តំបន់អាស៊ី ដូចជានយោបាយការបរទេសទៅកាន់តំបន់ផ្សេងទៀតដែរ។ ប៉ុន្តែខ្ញុំបានជួបជាមួយរដ្ឋមន្ត្រីរបស់អ្នក ហើយពួកគេបាននិយាយថា អាមេរិកមិនដកខ្លួនចេញពីតំបន់ឡើយ។ ហើយវាក៏ជាសារមួយដ៏សំខាន់ដែរ»។
នាយករដ្ឋមន្ត្រីសិង្ហបុរីខាងលើបានបន្ថែមថា មន្ត្រីក្រុងវ៉ាស៊ីនតោនភាគច្រើនបានប្រាប់លោកពីការបន្តផ្សាភ្ជាប់ទំនាក់ទំនងជាមួយតំបន់អាស៊ី ប៉ុន្តែគេចង់មានការកែសម្រួលគោលនយោបាយទាំងនោះដើម្បីឲ្យស្របតាមការផ្លាស់ប្តូរនៃបរិបទតំបន់។
បន្ថែមពីនេះ លោក លី សៀនឡុង បានបង្ហើបផងដែរថា រដ្ឋបាលអាមេរិកយល់ច្បាស់ពីសារសំខាន់នៃទំនាក់ទំនងជាមួយប្រទេសដទៃទូទាំងពិភពលោក។ មន្ត្រីជាន់ខ្ពស់អាមេរិកដឹងច្បាស់ថា ជោគវាសនារបស់អាមេរិកពឹងផ្អែកសំខាន់លើប្រទេសផ្សេងទៀតដែលជាមិត្ត ជាដៃគូ និងសម្ព័ន្ធមិត្តផង។ ដូច្នេះហើយ វាសមហេតុផលដែលលោក ត្រាំ នឹងបន្តប្រឹងប្រែងលើកស្ទួយទំនាក់ទំនងជាមួយតំបន់អាស៊ីទាំងក្រោមក្របខណ្ឌសេដ្ឋកិច្ច នយោបាយ សន្តិសុខ និងការទូត។
លោក លី កត់សម្គាល់ដូច្នេះ៖«ខ្ញុំគិតថា ពួកគេដឹងច្បាស់ថា ដោយសារគោលជំហរបើកចំហរ និងមានឆន្ទៈល្អ អាមេរិកអាចរក្សាបាននូវស្ថិរភាព និងវិបុលភាពនៅលើពិភពលោក ដែលវាជាអ្វីដែលគ្រប់គ្នាអាចទាញយកជាប្រយោជន៍បាន ហើយអាមេរិកខ្លួនឯងក៏ដូច្នោះដែរ»៕
Tag:
ដូណាល់ ត្រាំ
លី សៀនឡុង
អាមេរិក
Mike Pence
© រក្សាសិទ្ធិដោយ thmeythmey.com