អន្តរជាតិ
ត្រាំ៖ វិបត្តិនុយក្លេអ៊ែរកូរ៉េកាន់តែស្រួលដោះស្រាយ បើទំនាក់ទំនងអាមេរិកជាមួយរុស្ស៊ីល្អ»
× ប្រធានាធិបតីអាមេរិក បានសង្កត់ធ្ងន់ថា ទំនាក់ទំនងល្អរវាងរុស្ស៊ី អាមេរិកនឹងជួយសម្រួលដល់ការដោះស្រាយវិបត្តិនុយក្លេអ៊ែរកូរ៉េខាងជើង។ ទំនាក់ទំនងរវាងអាមេរិក និងរុស្ស៊ីធ្លាក់ចុះខ្លាំងក្នុងរយៈពេលប៉ុន្មានឆ្នាំចុងក្រោយជាពិសេសក្រោយការបោះឆ្នោតប្រធានាធិបតីខែវិច្ឆិកាឆ្នាំមុន។
ក្នុងបទសម្ភាសន៍ជាមួយសារព័ត៌មាន Fox News សប្តាហ៍នេះ ប្រធានាធិបតីលោក ដូណាល់ ត្រាំ បានកត់សម្គាល់ពីសារសំខាន់ក្នុងការស្តារ ក៏ដូចជារក្សាទំនាក់ទំនង និងកិច្ចសហប្រតិបត្តិការរវាងអាមេរិក និងរុស្ស៊ីឲ្យបានល្អ។
បើតាមការយល់ឃើញរបស់លោក ត្រាំ ទំនាក់ទំនងល្អរវាងមហាអំណាចទាំងពីរជួយឲ្យការដោះស្រាយបញ្ហាកូរ៉េខាងជើងកាន់តែងាយស្រួល និងកាត់បន្ថយភាពតានតឹងបានយ៉ាងមានប្រសិទ្ធភាព។
«ខ្ញុំគិតថា វាជារឿងល្អប្រសើរមួយ បើយើងអាចមានទំនាក់ទំនងល្អជាមួយរុស្ស៊ី។ ខ្ញុំមិនគិតថា វាជារឿងខុសឆ្គងឡើយ»។នេះជាសម្តីរបស់លោក ត្រាំ ក្នុងបទសម្ភាសន៍ដែលចេញផ្សាយថ្ងៃពុធ ទី ២៥ ខែតុលា។
លោក ត្រាំ បានបន្តថា៖« ខ្ញុំគិតថា យើងអាចមានទំនាក់ទំនងល្អជាមួយគ្នា។ ខ្ញុំក៏គិតដូចគ្នាថា ការដោះស្រាយបញ្ហាកូរ៉េខាងជើងក៏កាន់តែងាយស្រួលដោះស្រាយដូចគ្នា»។
យ៉ាងណាក៏ដោយ ទំនាក់ទំនងរវាងអាមេរិក និងរុស្ស៊ីបច្ចុប្បន្នធ្លាក់ចុះដល់កម្រិតទាបបំផុតមិនធ្លាប់មានតាំងពីក្រោយសង្គ្រាមត្រជាក់បិទបញ្ចប់ទៅ។ អាមេរិកបន្តចោទប្រកាន់ថា រុស្ស៊ីលួចចូលប្រព័ន្ធបោះឆ្នោតរបស់ខ្លួនកន្លងមកដើម្បីជួយឲ្យលោក ដូណាល់ ជាប់ឆ្នោត ហើយមហាអំណាចទាំងពីរប្រឈមមុខដាក់គ្នានៅក្នុងជម្លោះស៊ីរីផង។ គេសង្កេតឃើញមានការបណ្តេញ ឬកាត់បន្ថយមន្ត្រីការទូតទៅវិញទៅមករវាងភាគីទាំងពីរដែរកន្លងមក។
ដោយឡែក បញ្ហានុយក្លេអ៊ែរកូរ៉េខាងជើងនៅតែជារឿងចម្រូងចម្រាសនិងពិបាកដោះស្រាយបំផុតមួយសម្រាប់សហគមន៍អន្តរជាតិ។ ប្រទេសនេះបានបន្តបាញ់សាកល្បងមីស៊ីល និងអាវុធនុយក្លេអ៊ែរជាបន្តបន្ទាប់ បើទោះជាត្រូវសហគមន៍អន្តរជាតិថ្កោលទោស និងរងទណ្ឌកម្មច្រើនជំហានក៏ដោយ។
ម្យ៉ាងវិញទៀតស្ថានការណ៍នៅឧបទ្វីបកូរ៉េកាន់តែតានតឹងឡើង ហើយការប្រឈមមុខគ្នារវាងអាមេរិក និងកូរ៉េខាងជើងក៏កាន់តែក្តៅទៀតរយៈពេលចុងក្រោយ ដោយសារជម្លោះពាក្យសម្តីរបស់លោក ត្រាំ និងមេដឹកនាំក្រុងព្យុងយ៉ាង គីម ជុងអ៊ុន។ លោក ត្រាំ គំរាមប្រើប្រាស់កម្លាំងទ័ពកម្ទេចរបបដឹកនាំព្យុងយ៉ាង ឯលោក គីម ជុងអ៊ុន ចម្អកថា ខ្លួនមានអាវុធនុយក្លេអ៊ែរដែលអាចបាញ់ដល់ដីអាមេរិក។ គេថែមទាំងប្រកាសផងដែរថា បើអាមេរិកមិនប្តូរឥរិយាបថ និងឈប់បង្កើតអរិភាពទេ ខ្លួនក៏មិនយកកម្មវិធីនុយក្លេអ៊ែររបស់ខ្លួនទៅដាក់លើតុចរចាដែរ៕
Tag:
អាមេរិក
ដូណាល់ ត្រាំ
រុស្ស៊ី
កូរ៉េខាងជើង
© រក្សាសិទ្ធិដោយ thmeythmey.com