ជាតិ
សមាជិកព្រឹទ្ធសភាបក្សប្រជាជនមួយរូប បង្ហាញក្តីបារម្ភខ្លាចបាត់បង់ធនធានមច្ឆជាតិ លោក សួន លន់ ថ្លែងក្នុងប្រជុំព្រឹទ្ធសភា កាលពីថ្ងៃទី ២៧ ខែតុលា
×
លោក សួន លន់ សមាជិកព្រឹទ្ធសភាគណបក្សប្រជាជនកម្ពុជា បានសម្តែងការព្រួយបារម្ភចំពោះការបាត់បង់ធនធានមច្ឆជាតិនៅតំបន់ទឹកសាប។ ការព្រួយបារម្ភរបស់លោក សួន លន់ ធ្វើឡើងកិច្ចប្រជុំលើកទី ១១ នីតិកាលទី៣ នៃព្រឹទ្ធសភា កាលពីថ្ងៃទី២៧ ខែតុលា ឆ្នាំ២០១៧ នៅវិមានព្រឹទ្ធសភា។
លោក សួន លន់ សមាជិកព្រឹទ្ធសភាគណបក្សប្រជាជនកម្ពុជា លើកឡើងពីក្តីកង្វល់ខ្លួនជុំវិញការថយចុះធនធានមច្ឆជាតិ ដោយសារលោកយល់ឃើញថា ក្នុងរយៈពេលប៉ុន្មានឆ្នាំចុងក្រោយនេះ ពូជត្រីមួយចំនួន ស្ទើរតែលែងមានវត្តមាននៅតាមទំបន់ទឹកសាបរបស់កម្ពុជាទៀតហើយ។ លោក សមាជិកព្រឹទ្ធសភាគណបក្សប្រជាជនកម្ពុជារូបនេះ បានស្នើឲ្យក្រសួងកសិកម្ម រុក្ខាប្រមាញ់ និងនេសាទ ត្រូវចាត់វិធានទប់ស្កាត់ចំពោះបទល្មើសនេសាទ ដែលនៅកើតមានជាហូរហែនៅតាមទន្លេ បឹងបួ។ នេះបើតាមទីភ្នាក់ងារសារព័ត៌មានកម្ពុជា AKP បានស្រង់សម្តីលោក សួន លុន ដែលបានថ្លែងក្នុងកិច្ចប្រជុំព្រឹទ្ធសភា ដែលពិភាក្សាលើការវិសោធនកម្មមាត្រាមួយចំនួននៃច្បាប់ស្តីពីជលផល កាលពីថ្ងៃទី ២៧ ខែតុលា។
លោក សួន លន់ បញ្ជាក់យ៉ាងនេះថា៖«ជនល្មើសបើប្រើស្បៃមុងក្រឡាល្អិតខុសពីច្បាប់កំណត់ និងប្រើប្រាស់ឧបករណ៍ឆក់ធ្វើឲ្យប៉ះពាល់ដល់ការបន្ត ពូជត្រី និងថយចុះនៃចំនួនត្រីមួយ ចំនួនដូចជាត្រី សណ្តាយ ត្រីគល់រាំង និងប្រភេទត្រីទឹកសាបជាច្រើន ប្រភេទទៀត។បើមិនចាត់វិធានការទប់ស្កាត់ទាន់ពេលវេលាទេនោះ ចំនួនបរិមាណត្រីទឹកសាប នឹងថយចុះកាន់តែច្រើនថែមទៀត ដែលមិនអាចផ្គត់ផ្គង់តម្រូវការបរិភោគរបស់ប្រជាពលរដ្ឋបានឡើយ»។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលមានវត្តមាននៅក្នុងកិច្ចប្រជុំព្រឹទ្ធសភានោះដែរ បានទទួលស្គាល់ថា ចំនួនត្រីពិតជាមានការថយចុះ និងបាត់បង់ពិតមែន។ លោកបកស្រាយថា ដោយសារតែ កត្តាធម្មជាតិ ដូចជាទឹកមិនគ្រប់គ្រាន់ ធ្វើឲ្យត្រីពិបាកពងកូន ចរាចរ និងមូលហេតុនៃការធ្វើទំនប់វារីអគ្គិសនីនៅតាមបណ្តាប្រទេសដងទន្លេមេគង្គជាដើម។ «ម្យ៉ាងវិញទៀតជនល្មើសនៅតែប្រើប្រាស់ឧបករណ៍ខុសច្បាប់ដែលត្រូវបានហាមឃាត់ ដែលបញ្ហានេះ ក្រសួងនឹងចាត់វិធានការទប់ស្កាត់ឱ្យមានប្រសិទ្ធភាព»។ លោក សាខុន លើកឡើងដូច្នេះ ក៏បន្ថែមថា កន្លងមកក្រសួងកសិកម្មបានសហការជាមួយសហគមន៍អឺរ៉ុប និងអង្គការ Jica ព្រមទាំងដៃគូពាក់ព័ន្ធ ដោយបានបង្កើនកន្លែងចិញ្ចឹមត្រីនៅទឹកសាប និងសមុទ្រ ដោយប្រើប្រាស់បច្ចេកសទេស ទំនើបៗផងដែរ៕
Tag:
សួន លន់
ត្រី
វេង សាខុន
© រក្សាសិទ្ធិដោយ thmeythmey.com