អន្តរជាតិ
ក្រុងប៉េកាំងទទូចឲ្យរដ្ឋបាល ត្រាំ បន្តជួយដោះស្រាយបញ្ហាប្រែប្រួលអាកាសធាតុពិភពលោក រូបភាព៖ BBC
× តំណាងមហាអំណាចចិនដែលទទួលបន្ទុកចរចារឿងប្រែប្រួលអាកាស បានអំពាវនាវឲ្យរដ្ឋបាលអាមេរិកពិចារណាជាថ្មីកុំដកខ្លួនចេញពីកិច្ចព្រមព្រៀងអាកាសធាតុដែលមានគោលដៅសង្គ្រោះផែនដីនេះ។ ចិនចង់ឃើញអាមេរិកបន្តចូលរួមកាត់បន្ថយការបញ្ចេញឧស្ម័នកាបូនិច និងបន្តផ្តល់ជំនួយហិរញ្ញវត្ថុដល់ប្រទេសកំពុងអភិវឌ្ឍដើម្បីដោះស្រាយបញ្ហាប្រែប្រួលអាកាសធាតុនេះផង។
ប្រធានក្រុមចរចារបស់ក្រុងប៉េកាំងក្នុងកិច្ចព្រមព្រៀងអាកាសធាតុក្រុងប៉ារីសឆ្នាំ ២០១៥ លោក Xie Zhenhua បានថ្លែងនៅថ្ងៃអង្គារនេះថា រដ្ឋាភិបាលចិននៅតែរំពឹងថា អាមេរិកនឹងបន្តសហការជាមួយប្រទេសដទៃដើម្បីបន្តចរចាលើការប្រែប្រួលអាកាសធាតុនេះ។
សារព័ត៌មាន South China Morning Post បានស្រង់សម្តីលោក Xie ក្នុងសន្និសីទសារព័ត៌មាននៅក្រុងប៉េកាំងដូច្នេះថា៖«យើងសង្ឃឹមថាអាមេរិកនឹងត្រឡប់មកចូលរួមក្នុងកិច្ចព្រមព្រៀងអាកាសធាតុក្រុងប៉ារីស ហើយចាប់ផ្តើមរួមចំណែកក្នុងការការពារផែនដីរបស់យើងផង។ទោះអ្វីកើតឡើងក៏ដោយ ចិននឹងបន្តអនុវត្តកិច្ចព្រមព្រៀងអាកាសធាតុក្រុងប៉ារីសឲ្យបាន ១០០ភាគរយផង»។
ក្រោយចូលកាន់តំណែងចុងខែមករាកន្លងមក លោក ដូណាល់ ត្រាំបានប្រកាសដកអាមេរិកចេញពីកិច្ចព្រមព្រៀងអាកាសធាតុ ដោយលោកអះអាងថា ការប្រែប្រួលអាកាសធាតុជារឿងបោកប្រាស ហើយកិច្ចព្រមព្រៀងនេះកម្រិតសិទ្ធិអាមេរិក និងប៉ះពាល់ដល់សេដ្ឋកិច្ចអាមេរិកផង។
ដោយឡែក មេដឹកនាំចិនលោក ស៊ី ជិនភីង បានបង្ហាញឆន្ទៈពេញលេញក្នុងការបន្តគាំទ្រកិច្ចព្រមព្រៀងអន្តរជាតិនេះ និងប្រឆាំងដាច់ខាតការប្រែប្រួលអាកាសធាតុ ទោះជាអាមេរិកដកខ្លួនចេញក៏ដោយ។ ក្នុងនាមជាប្រទេសមួយដែលបំពុលបរិយាកាសខ្លាំងជាងគេ ចិនថែមទាំងអំពាវនាវទៅកាន់ប្រទេសអភិវឌ្ឍទាំងអស់ឲ្យដាក់ចិត្តដាក់កាយកាត់បន្ថយការបញ្ចេញឧស្ម័នកាបូនិច និងផ្តល់ជំនួយហិរញ្ញវត្ថុ និងបច្ចេកទេសដល់ប្រទេសតូចៗ និងប្រទេសកំពុងអភិវឌ្ឍ។
ទោះបីជាយ៉ាងណាក៏ដោយ ចិនប្រឈមបញ្ហាច្រើនទៀតក្នុងការអនុវត្តកិច្ចព្រមព្រៀងប៉ារីស និងកាត់បន្ថយការបញ្ចេញឧស្ម័នកាបូនិច។ នោះក៏ដោយសាររោងចក្ររបស់ចិនជាច្រើននៅបន្តប្រើប្រាស់ថាមពលច្រើនដើម្បីដំណើរការសកម្មភាពរបស់ខ្លួនផងនៅតំបន់មួយចំនួន។
សូមបញ្ជាក់បន្តិចថា នៅសប្តាហ៍នេះ សន្និសីទពិភពលោកស្តីពីការប្រែប្រួលអាកាសធាតុនឹងត្រូវរៀបចំឡើងនៅទីក្រុង Bonn ប្រទេសអាល្លឺម៉ង់ ហើយតំណាងប្រទេសជិត ២០០ នឹងចូលរួមផងដែរ។ តំណាងប្រទេសទាំងនេះនឹងចរចាគ្នាដើម្បីស្វែងរកវិធានការដើម្បីធានាការអនុវត្តកិច្ចព្រមព្រៀងអាកាសធាតុនេះឲ្យបានជោគជ័យ។
Tag:
អាមេរិក
ចិន
ដូណាល់ ត្រាំ
Xie Zhenhua
© រក្សាសិទ្ធិដោយ thmeythmey.com