អន្តរជាតិ
ត្រាំ មិនចេញបញ្ជាវាយកូរ៉េខាងជើងឡើយ បើគ្មានការគំរាមកំហែងធ្ងន់ធ្ងរ រដ្ឋមន្រ្តីការពារជាតិអាមេរិក ជេម ម៉ាធីស និងរដ្ឋមន្រ្តីការបរទេស រិច ធីល័រសិន (រូបភាព៖ AFP)
× រដ្ឋមន្ត្រីការពារជាតិអាមេរិក ជេម ម៉ាធីស និងរដ្ឋមន្ត្រីការបរទេស រិច ធីល័រសិន បានប្រកាសរួមគ្នាថា ប្រធានាធិបតី ដូណាល់ ត្រាំ នឹងមិនចេញបញ្ជាវាយប្រហារកូរ៉េខាងជើងឡើយ បើរដ្ឋកុម្មុយនីស្តមួយនេះមិនបង្កការគំរាមកំហែងធ្ងន់ធ្ងរដាក់អាមេរិកទេនោះ។ រដ្ឋមន្ត្រីទាំងពីរនេះមិនបញ្ជាក់ថា ការគំរាមកំហែងធ្ងន់ធ្ងរកម្រិតណា ទើបលោក ត្រាំ ចេញបញ្ជាប្រយុទ្ធទេ តែបានព្រលយពាក្យថា អ្វីៗស្ថិតលើស្ថានភាពជាក់ស្ដែង។
មហិច្ឆតាអភិវឌ្ឍកម្មវិធីនុយក្លេអ៊ែររបស់កូរ៉េខាងជើង ត្រូវអាមេរិកចាត់ទុកជាការគំរាមកំហែងសន្តិសុខរបស់ខ្លួន ប៉ុន្តែការគំរាមនេះមិនទាន់ដល់កម្រិតដែលប្រធានាធិបតី ដូណាល់ ត្រាំ ប្រកាសសង្គ្រាមជាមួយកូរ៉េខាងជើងឡើយ។ នេះបើតាមការបញ្ជាក់របស់ប្រមុខការពារជាតិអាមេរិក ជេម ម៉ាធីស និងប្រមុខការទូត រិច ធីល័រសិន ក្នុងកិច្ចប្រជុំជាមួយគណៈកម្មាធិការការបរទេសនៃព្រឹទ្ធសភាអាមេរិកនៅថ្ងៃទី៣០ ខែតុលា ។
រដ្ឋមន្ត្រីទាំងពីរនៃរដ្ឋបាលលោក ត្រាំ បានប្រាប់សមាជិកព្រឹទ្ធសភាថា តាមរដ្ឋធម្មនុញ្ញអាមេរិក សិទ្ធិនៃការប្រកាសសង្គ្រាមស្ថិតក្នុងដៃសភា ក្នុងករណីគ្មានការគំរាមដោយដោយផ្ទាល់ ឬធ្ងន់ធ្ងរទេនោះ។ យ៉ាងណាមិញ លោក ធីល័រសិន ក៏បញ្ជាក់ដែរថា ការសម្រេចចិត្តចុងក្រោយរបស់ប្រធានាធិបតី គឺអាស្រ័យទៅតាមស្ថានការណ៍ការពិតជាក់ស្ដែង។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។
ជាមួយគ្នានេះ លោក ម៉ាធីស ក៏បង្ហាញការយល់ឃើញដូចគ្នានេះដែរ ដោយបានសង្កត់ថា លោក ត្រាំ នឹងពិភាក្សាជាមួយសភាក្នុងករណីមានការគំរាមធ្ងន់ធ្ងរណាមួយនោះ។ រដ្ឋមន្ត្រីការពារជាតិអាមេរិករូបនេះបានលើកយកករណីវាយប្រហារមូលដ្ឋានអាកាសស៊ីរី Shayrat ដែលពេលនោះរដ្ឋបាលលោក ត្រាំ បានជូនដំណឹងភ្លាមៗទៅកាន់សភា។ បើតាមលោក ម៉ាធីស លោក ត្រាំ ទំនងធ្វើរឿងដូចគ្នានេះដែរចំពោះសំណុំរឿងកូរ៉េខាងជើង។
ចំពោះករណីកូរ៉េខាងជើងនេះដែរ អាមេរិកមិនទាន់កំណត់ច្បាស់ពីកម្រិតនៃការគំរាមនៅឡើយទេ ទោះជាកូរ៉េខាងជើងមាននុយក្លេអ៊ែរ និងគំរាមបាញ់មីស៊ីលសំដៅទឹកដីអាមេរិកក្ដី។ លោក ធីល័រសិន ផ្ទាល់បានបង្ហាញការស្ទាក់ស្ទើរក្នុងករណីនេះ។ លោកលើកឡើងថា កូរ៉េខាងជើងអាចមាននុយក្លេអ៊ែរក្នុងឃ្លាំង ឬក៏បំពាក់រួចស្រេចលើជើងទម្រ ឬក៏កំពុងត្រៀមបាញ់ជាដើម ដូច្នេះវាពឹងផ្អែកលើការពិតជាក់ស្ដែងដើម្បីកំណត់ថាក្រុងព្យុងយ៉ាងបង្កការគំរាមកំហែងធ្ងន់ធ្ងរឬអត់។
នាពេលកន្លងមក អាមេរិក និងកូរ៉េខាងជើងបានផ្លោងសម្ដីគំរាមដាក់គ្នាទៅវិញទៅមក ដោយអាមេរិកគំរាមកម្ទេចកូរ៉េខាងជើងបើបន្តគំរាមបាញ់មីស៊ីលដាក់ខ្លួន ឯកូរ៉េខាងជើងវិញក៏នៅមិនស្ងៀមដែរ និងបានគំរាមអាមេរិកដូចគ្នា។ ការគំរាមគ្នាទៅវិញទៅមកធ្វើឲ្យមានការព្រួយបារម្ភថា សង្គ្រាមអាចផ្ទុះឡើងនៅឧបទ្វីបកូរ៉េ ព្រោះទាំងលោក ត្រាំ ទាំងលោក គីម ជុងអ៊ុន សុទ្ធតែជាមេដឹកនាំពិបាកស្មាន និងធ្វើការដោយប្រើអារម្មណ៍ផងនោះ៕
Tag:
អាមេរិក
កូរ៉េខាងជើង
ជេម ម៉ាធីស
រិច ធីល័រសិន
© រក្សាសិទ្ធិដោយ thmeythmey.com