អន្តរជាតិ
យន្តហោះទម្លាក់គ្រាប់ B1 សម្ញែងសាច់ដុំហោះរំលងឧបទ្វីបកូរ៉េ
× យន្តហោះទម្លាក់គ្រាប់បែក B-1B របស់កងទ័ពអាមេរិកបានហោះរំលងឧបទ្វីបកូរ៉េនៅថ្ងៃព្រហស្បតិ៍ទី ២ ខែវិច្ឆិកាកន្លងទៅ។ យន្តហោះនេះចូលរួមក្នុងសមយុទ្ធយោធារួមគ្នាជាមួយកងទ័ពកូរ៉េខាងត្បូង និងជប៉ុន នៅមុនដំណើរទស្សនកិច្ចរបស់ប្រធានាធិបតី ដូណាល់ ត្រាំ ។
សមយុទ្ធយោធាកងទ័ពអាមេរិក ជប៉ុន កូរ៉េខាងត្បូង ចាប់ផ្តើមជាថ្មីទៀតនៅសប្តាហ៍នេះដើម្បីសម្ញែងសាច់ដុំដាក់កូរ៉េខាងជើង។ គេឃើញយន្តហោះទម្លាក់គ្រាប់បែក B-1B របស់អាមេរិកពីរគ្រឿងហោះរំលងឧបទ្វីបកូរ៉េនៅថ្ងៃព្រហស្បតិ៍ទី ២ ខែវិច្ឆិកានេះដែរ។
យោងតាមទីភ្នាក់ងារព័ត៌មាន AFP យន្តហោះទម្លាក់គ្រាប់បែកអាមេរិកនេះបង្ហាញវត្តមាននៅឧបទ្វីបកូរ៉េក្នុងសមយុទ្ធយោធានេះត្រឹមប៉ុន្មានថ្ងៃប៉ុណ្ណោះមុនលោក ដូណាល់ ត្រាំ ចាប់ផ្តើមទស្សនកិច្ចរបស់ខ្លួននៅអាស៊ីនោះ។
យ៉ាងណាមិញ ការហោះហើរយន្តហោះទម្លាក់គ្រាប់បែកយុទ្ធសាស្ត្រនេះធ្លាប់កើតឡើងជារឿយៗ កន្លងមក ហើយនៅព្រឹកថ្ងៃសុក្រនេះទៀតកូរ៉េខាងជើងក៏បានចេញទិតៀនអាមេរិកជាថ្មីទៀតរឿងសម្ញែងសាច់ដុំយោធានេះដែរ។
បើតាមសេចក្តីថ្លែងការណ៍ទីបញ្ជាការទ័ពអាកាសអាមេរិកប្រចាំតំបន់អាស៊ីប៉ាស៊ីហ្វិក យន្តហោះទាំងពីរគ្រឿងនេះហោះចេញពីមូលដ្ឋានទ័ព Andersen នៅកោះហ្គាម ហើយបានចូលរួមក្នុងសមយុទ្ធជាមួយកងទ័ពអាកាសកូរ៉េខាងត្បូង និង កងទ័ពស្វ័យការពាររបស់ជប៉ុន។
សេចក្តីថ្លែងការណ៍នោះបានបន្តថា៖ «យន្តហោះទម្លាក់គ្រាប់នេះបានចុះចតនៅកូរ៉េខាងត្បូងដោយចូលរួមជាមួយយន្តហោះចម្បាំងកូរ៉េខាងត្បូងនៅទីនោះសិន។ ក្រោយសមយុទ្ធចប់យន្តហោះទាំងនោះនឹងត្រឡប់ទៅមូលដ្ឋានរបស់ខ្លួនវិញ»។
សមយុទ្ធយោធានេះដែរគឺជាផ្នែកមួយនៃយុទ្ធនាការពង្រាយយន្តហោះទម្លាក់គ្រាប់នៅក្នុងតំបន់ប៉ាស៊ីហ្វិក ដើម្បីឆ្លើយតបស្ថានការណ៍តំបន់។
តាមពិតទៅ បញ្ហាឧបទ្វីបកូរ៉េកាន់តែតានតឹងខ្លាំង បន្ទាប់ពីកូរ៉េខាងជើងបាញ់មីស៊ីល និងសាកល្បងអាវុធនុយក្លេអ៊េរលើកទី ៦ទៀតកាលពីប៉ុន្មានខែមុន។ ស្ថានការណ៍កាន់តែតឹងតែងទៀត ដោយសារការបន្តសង្គ្រាមពាក្យសម្តីរវាងលោក ដូណាល់ ត្រាំ និងមេដឹកនាំកំពូលកូរ៉េខាងជើង គីម ជុងអ៊ុន។ ត្រាំ គំរាមប្រើប្រាស់កម្លាំងកម្ចាត់របបដឹកនាំកូរ៉េខាងជើង ស្របពេលដែលកូរ៉េខាងជើងគំរាមបាញ់មីស៊ីលចូលដីអាមេរិកទៀត៕
Tag:
B-1B
អាមេរិក
ដូណាល់ ត្រាំ
កូរ៉េខាងជើង
© រក្សាសិទ្ធិដោយ thmeythmey.com