អន្តរជាតិ
ទៅដល់ជប៉ុន លោក ត្រាំ ថា អាមេរិកនឹងដើរលើផ្លូវថ្មីដើម្បីបញ្ចប់នុយក្លេអ៊ែរកូរ៉េខាងជើង
× ប្រធានាធិបតីអាមេរិក ដូណាល់ ត្រាំ បានទៅដល់ជប៉ុននៅថ្ងៃទី៥ ខែវិច្ឆិកា ក្នុងដំណើរទស្សនកិច្ចរយៈពេលវែងនៅតំបន់អាស៊ី ដោយមានបញ្ហានុយក្លេអ៊ែរកូរ៉េខាងជើងជារបៀបវារៈសំខាន់។ គ្រាន់តែជាន់ទឹកដីជប៉ុនភ្លាម លោក ត្រាំ បានការពារការប្រើវោហារសាស្ត្រខ្លាំងៗដាក់កូរ៉េខាងជើងនាពេលកន្លងមក និងនិយាយថា ដំណោះស្រាយលើបញ្ហាកូរ៉េខាងជើងនឹងចេញជារូបរាងមិនខានក្នុងជំនួបជាមួយបណ្ដាមេដឹកនាំតំបន់អាស៊ី។
ជប៉ុន គឺជាទីសំចតទីមួយរបស់ប្រធានាធិបតីអាមេរិក ដូណាល់ ត្រាំ ក្នុងដំណើរទស្សនកិច្ចរយៈពេល១២ថ្ងៃនៅទ្វីបអាស៊ី។ ក្រៅពីទំនាក់ទំនងទ្វេភាគី បញ្ហានុយក្លេអ៊ែរនៅទ្វីបកូរ៉េ គឺជាប្រធានបទធំសម្រាប់លោក ត្រាំ ដែលតែងគំរាមប្រើកម្លាំងយោធាដើម្បីបញ្ចប់បញ្ហានោះ។ កម្មវិធីនុយក្លេអ៊ែររបស់កូរ៉េខាងជើង ពិតជាធ្វើឲ្យលោក ត្រាំ រង្កៀសចិត្តខ្លាំង ខណៈដែលការចរចាជាច្រើនឆ្នាំកន្លងមកមិនបានផលដូចបំណងឡើយ។
លោក ត្រាំ ប្រាកដជាប្រើទស្សនកិច្ចនៅជប៉ុនដើម្បីបង្កើតជំហររួមគ្នាលើវិបត្តិនុយក្លេអ៊ែរកូរ៉េខាងជើង ខណៈដែលលោកជួបជាមួយនាយករដ្ឋមន្ត្រី ស៊ិនហ្សូ អាបេ ផង។ បើតាមទីភ្នាក់ងារព័ត៌មាន Reuters ប្រធានាធិបតីអាមេរិកបានប្រាប់អ្នកសារព័ត៌មានលើយន្តហោះ Air Force One ថា រដ្ឋបាលរបស់លោកកំពុងពិចារណាក្នុងការដាក់កូរ៉េខាងជើងទៅក្នុងបញ្ជីរដ្ឋគាំទ្រភេរវកម្ម ឬយ៉ាងណា។ អាមេរិកក៏ប្រុងដើរលើផ្លូវថ្មីដែរ ព្រោះវិធីសាស្ត្របច្ចុប្បន្នមិនអាចដោះស្រាយបញ្ហាបានឡើយ។
ដូចដឹងស្រាប់ លោក ត្រាំ មិនពេញចិត្តនឹងការចរចារយៈពេលរាប់សិបឆ្នាំឡើយ ដោយលោកចាត់ទុកជាការខ្ជះខ្ជាយពេលវេលាប៉ុណ្ណោះ។ «យើងចង់ដោះស្រាយបញ្ហានេះឲ្យស្រេចបាច់ ព្រោះជាការគំរាមសម្រាប់អាមេរិក និងពិភពលោក។ យើងបានចំណាយ២៥ឆ្នាំមកហើយ ហើយយើងនឹងជ្រើសរើសផ្លូវផ្សេងម្ដង។» នេះជាការបញ្ជាក់របស់លោក ត្រាំ ជុំវិញដំណោះស្រាយលើបញ្ហានុយក្លេអ៊ែរ តែលោកមិនបានរៀបរាប់ឲ្យពិស្ដារអ្វីទេ។
កាលពីកិច្ចប្រជុំមហាសន្និបាតអង្គការសហប្រជាជាតិ លោក ត្រាំ បានធ្វើឲ្យសម្ព័ន្ធមិត្តតំបន់អាស៊ីញាក់សាច់មិនតិចឡើយ ជាមួយនឹងការគំរាមកម្ទេចកូរ៉េខាងជើងទាំងស្រុង។ កូរ៉េខាងជើងក៏គំរាមឆ្លើយតបវិញ បើអាមេរិកហ៊ានធ្វើសកម្មភាពមែននោះ។ ជប៉ុន ដែលជាមិត្តអាមេរិកបារម្ភខ្លាំងនឹងសង្គ្រាមពាក្យសម្ដីនេះ ព្រោះកូរ៉េខាងជើងធ្លាប់បាញ់មីស៊ីលបាលីស្ទិកចម្ងាយមធ្យមពីរគ្រាប់ និងបានហោះរំលងដែនអាកាសជប៉ុនទៅទៀត។
ក្រៅពីជប៉ុន លោក ត្រាំ នឹងបន្តដំណើរទៅកាន់សម្ព័ន្ធមិត្តអាស៊ីមួយទៀត គឺកូរ៉េខាងត្បូង ដែលនៅទីនោះបញ្ហានុយក្លេអ៊ែរកូរ៉េខាងជើងនឹងជាសំណុំរឿងសំខាន់ដដែល។ ក្រុងសេអ៊ូលមិនសូវសប្បាយចិត្តសម្ដីគំរាមប្រើកម្លាំងទ័ពរបស់រដ្ឋបាលលោក ត្រាំ ឡើយ និងបានអះអាងថា មានតែខ្លួនប៉ុណ្ណោះទើបអាចសម្រេចចិត្តពីអនាគតប្រជាជនកូរ៉េបាន។ ភាគីទាំងពីរ នឹងពិភាក្សាគ្នារកជំហររួមគ្នាដើម្បីទប់ទល់កូរ៉េខាងជើង៕
Tag:
អាស៊ី
អាមេរិក
ជប៉ុន
កូរ៉េខាងជើង
ដូណាល់ ត្រាំ
© រក្សាសិទ្ធិដោយ thmeythmey.com