កីឡាអន្តរជាតិ
អន្តរជាតិ
Felipe Massa ចូលនិវត្តន៍ពី Formula 1 នៅចុងរដូវកាលនេះ
× កីឡាករប្រណាំងរថយន្ត Formula 1, Felipe Massa បានប្រកាសចូលនិវត្តន៍នៅចុងរដូវកាលនេះ។ បើតាមការផ្សាយរបស់ BBC កីឡាករប្រេស៊ីលវ័យ៣៦ឆ្នាំរូបនេះ បានអះអាងពីជំហរដ៏ច្បាស់លាស់របស់ខ្លួន។
Felipe Massa ធ្លាប់បានបង្ហាញពីបំណងចូលនិវត្តន៍ម្តងរួចហើយនៅឆ្នាំ២០១៦ ប៉ុន្តែបានសម្រេចវិលត្រឡប់ទៅកាន់ក្រុម Williams វិញ បន្ទាប់ពី Valtteri Bottas ផ្ទេរទៅកាន់ Mercedes ខណៈជើងឯកពិភពលោក Nico Rosberg ឈប់ពីអាជីព។
Massa ដែលបានឈ្នះ Grand Prix ១១លើក បានបញ្ជាក់ថា ការចូលនិវត្តន៍លើកនេះ គឺពិតប្រកដ១០០ភាគរយ ហើយបានអះអាងថា គាត់មានអនុស្សារីយ៍យ៉ាងល្អជាមួយក្រុម Williams នារយៈពេល៤ឆ្នាំចុងក្រោយនេះ។
Massa បានប្រឡូកក្នុងកីឡាប្រណាំងរថយន្ត F1 លើកដំបូងនៅឆ្នាំ២០០២ ជាមួយក្រុម Sauber ប៉ុន្តែបានជោគជ័យយ៉ាងធំធេងក្នុងអាជីពក្រោយចូលរួមជាមួយក្រុម Ferrari នៅឆ្នាំ២០០៦ ដោយមាន Michael Schumacher ជាមិត្តរួមក្រុម។
កីឡាករប្រេស៊ីលរូបនេះ នៅជាមួយ Ferrari រហូតដល់ឆ្នាំ២០១៣ ក្នុងនាមជាអ្នកបើកបរជំនួយរបស់ Alonso មុនពេលទៅចូលរួមជាមួយ Williams ក្នុងឆ្នាំ២០១៤ ៕
Tag:
Formula 1
Felipe Massa
© រក្សាសិទ្ធិដោយ thmeythmey.com