អន្តរជាតិ
មន្ទីរបញ្ចកោណ៖ ផ្លូវតែមួយដើម្បីកម្ទេចនុយក្លេអ៊ែរកូរ៉េខាងជើង គឺសង្គ្រាមផ្លូវគោក កងទ័ពអាមេរិកប្រចាំការនៅកូរ៉េខាងត្បូង (រូបភាព៖ Xinhua)
× ក្រសួងការពារជាតិអាមេរិកបានវាយតម្លៃថា ផ្លូវតែមួយគត់ដែលអាចកម្ទេចនុយក្លេអ៊ែរកូរ៉េខាងជើងទាំងស្រុងបាន គឺការឈ្លានពានតាមផ្លូវគោក។ ប៉ុន្តែក្នុងករណីសង្គ្រាមផ្ទុះឡើងមែននោះ កូរ៉េខាងជើងប្រាកដជាឆ្លើយតបវិញមិនខាន ជាមួយនឹងការប្រើប្រាស់អាវុធគីមី ព្រមគ្នានឹងសព្វាវុធផ្សេងទៀត។ កូរ៉េខាងត្បូង និងជប៉ុន គឺជាមុខសញ្ញាធំនៃការវាយបករបស់កូរ៉េខាងជើង ជាពិសេសក្រុងសេអ៊ូលដែលនៅមិនឆ្ងាយពីព្រំដែន នឹងរងគ្រោះខ្លាំងជាងគេ។
ការឆ្លើយឆ្លងពាក្យសម្ដីរវាងប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន នាពេលកន្លងមក ធ្វើឲ្យគេបារម្ភថា សង្គ្រាមអាចកើតឡើងដោយចៀសមិនផុត ព្រោះមេដឹកនាំទាំងពីរជាមនុស្សចិត្តស្រាល និងពិបាកវាស់ស្ទង់ដូចគ្នា។ មន្ទីរបញ្ចកោណបានសិក្សាលើសេណារីយ៉ូជាច្រើនក្នុងករណីជម្លោះប្រដាប់អាវុធកើតឡើងមែនដូចជាការកម្ទេចគ្រាប់នុយក្លេអ៊ែរកូរ៉េខាងជើង ការផ្ដល់ជំនួយ និងការប្រតិបត្តិការយោធាផង។
ក្នុងលិខិតឆ្លើយតបទៅកាន់សមាជិកសភាអាមេរិកចុះថ្ងៃទី២៧ ខែតុលា នាយរងសេនាធិការចម្រុះកងទ័ពឧត្តមសេនីយ៍ Michael Dumont បានរៀបរាប់ពីលទ្ធភាពដែលសង្គ្រាមកើតមាន យុទ្ធសាស្ត្រកងទ័ព និងការប៉ាន់ស្មានការខូចខាត។ បើតាមទីភ្នាក់ងារព័ត៌មាន Yonhap លោក Dumont និយាយថា វិធីតែមួយគត់ដែលអាចស្វែងរកទីតាំងនុយក្លេអ៊ែរកូរ៉េខាងជើងដើម្បីកម្ទេចចោលទាំងស្រុង គឺសង្គ្រាមផ្លូវគោក។
យ៉ាងណាមិញ មន្ត្រីយោធាជាន់ខ្ពស់រូបនេះក៏អះអាងថា ការវាយតម្លៃស្ថានការណ៍ ក៏ដូចជាលទ្ធផលនៃសង្គ្រាម គឺជាបញ្ហាប្រឈមមួយ។ នេះក៏ព្រោះតែកូរ៉េខាងជើងនឹងមិននៅស្ងៀមឡើយ ហើយប្រុងប្រៀបរួចស្រេចដើម្បីវាយបកវិញ។ លិខិតខាងលើបញ្ជាក់ថា ក្រុងព្យុងយ៉ាងនឹងប្រើប្រាស់គ្រប់អាវុធដែលខ្លួនមានដើម្បីប្រយុទ្ធ រាប់ទាំងអាវុធគីមី អាវុធជីវសាស្ត្រ មីស៊ីលបាលីស្ទិក និងកាំភ្លើងធំរាប់ពាន់គ្រឿងរបស់ខ្លួន។
ជុំវិញបញ្ហានេះ ក្រសួងការពារជាតិអាមេរិកកំពុងវាយតម្លៃសមត្ថភាពរបស់កូរ៉េខាងជើងក្នុងការវាយប្រហារលើកូរ៉េខាងត្បូង ជប៉ុន និងកោះហ្គាម។ ច្បាស់ណាស់ថា រដ្ឋធានីសេអ៊ូល នឹងក្លាយជាផេះផង់មិនខាន បើមានសង្គ្រាមមែននោះ ព្រោះទីក្រុងមានប្រជាជនជាង២៥លាននាក់នេះ នៅក្បែរព្រំដែនខណ្ឌចែងកូរ៉េទាំងពីរ ហើយកាំភ្លើងធំ និងគ្រាប់រ៉ុក្កែតរាប់ពាន់គ្រឿងបានដំឡើងរួចស្រេចនៅខាងជើងខ្សែស្របទី៣៨ ។
អ្វីគួរឲ្យកត់សម្គាល់នោះ លោកឧត្តមសេនីយ៍ Dumont ក៏បានប្រាប់សមាជិកសភាអាមេរិកពីផែនការផ្សេងទៀតក្នុងករណីចិន និងរុស្ស៊ី ជំទាស់ការប្រើប្រាស់យោធាដោះស្រាយបញ្ហានេះ។ តាំងពីដើមមកនោះ ក្រុងប៉េកាំង និងក្រុងមូស្គូមិនយល់ស្របការប្រើកម្លាំងបាយលើរបបដឹកនាំក្រុងព្យុងយ៉ាងឡើយ និងនៅតែប្រកាន់ជំហរដោះស្រាយវិបត្តិនុយក្លេអ៊ែរនេះដោយសន្តិវិធី។ ម្យ៉ាងទៀតនោះ ជម្លោះប្រដាប់នៅឧបទ្វីបកូរ៉េក៏បង្កបញ្ហាដល់ប្រទេសជាមិត្តរបស់កូរ៉េខាងជើងដែរ៕
Tag:
អាមេរិក
កូរ៉េខាងជើង
នុយក្លេអ៊ែរ
© រក្សាសិទ្ធិដោយ thmeythmey.com