អន្តរជាតិ
ត្រាំ សរសើរទំនាក់ទំនងជាមួយជប៉ុន ទោះជាមិនពេញចិត្តឱនភាពពាណិជ្ជកម្ម
× ប្រធានាធិបតីអាមេរិក ដូណាល់ ត្រាំ បាននិយាយលើកសរសើរទំនាក់ទំនងរវាងអាមេរិក និងជប៉ុន ដែលលោកចាត់ទុកថា មានលក្ខណៈប្រសើរជាងពេលណាទាំងអស់។ ប៉ុន្តែលោក ត្រាំ ក៏បានបង្ហាញការមិនពេញចិត្តនៃជញ្ជីងពាណិជ្ជកម្មទ្វេភាគី ដែលផ្អៀងខ្លាំងទៅរកខាងជប៉ុន។ ប្រធានាធិបតីអាមេរិកសន្យាជំរុញទំនាក់ទំនងពាណិជ្ជកម្មនេះឲ្យមានតុល្យភាពឡើងវិញ តាមរយៈការប្រើប្រាស់យុទ្ធសាស្ត្រចំណេញទាំងសងខាង។
កំពុងស្ថិតនៅទឹកដីជប៉ុនក្នុងដំណើរទស្សនកិច្ចពីរថ្ងៃ ប្រធានាធិបតីអាមេរិក ដូណាល់ ត្រាំ បានប្រកាសថា ក្រុងវ៉ាស៊ីនតោន នឹងធ្វើការជាមួយក្រុងតូក្យូដើម្បីដោះស្រាយបញ្ហាឱនភាពពាណិជ្ជកម្មទ្វេភាគី។ លោក ត្រាំ ហាក់ប្រុងប្រយ័ត្នក្នុងការបង្ហាញការមិនសប្បាយចិត្តនឹងរឿងជញ្ជីងពាណិជ្ជកម្មនេះ ទាំងដឹងថាជប៉ុនចំណេញកប់ក្ដោងក្ដី ព្រោះជប៉ុនជាសម្ព័ន្ធមិត្ត និងជាដៃគូពាណិជ្ជកម្មដ៏សំខាន់របស់អាមេរិក។
យោងតាមទីភ្នាក់ងារព័ត៌មាន Xinhua ក្នុងជំនួបជាមួយអ្នកជំនួញអាមេរិក និងជប៉ុននៅថ្ងៃទី៦ ខែវិច្ឆិកា លោក ត្រាំ បានបញ្ជាក់ច្បាស់ថា អាមេរិកបានរងឱនភាពពាណិជ្ជកម្មយ៉ាងធំធេងដោយស្នាដៃជប៉ុនអស់ពេលរាប់សិបឆ្នាំ ហើយឡានជប៉ុនជាច្រើនលានគ្រឿងត្រូវបាននាំចូលទៅអាមេរិក។ ក្នុងន័យនេះ ប្រធានាធិបតីអាមេរិករូបនេះចង់បានទំនាក់ទំនងពាណិជ្ជកម្មសេរីមួយដែលចំណេញទាំងអស់គ្នា ហើយអាមេរិកនឹងចាត់វិធានការឲ្យឆាប់បំផុតតាមរយៈវិធីសាស្ត្រមិត្តភាព។
ជប៉ុនដែលជាមហាអំណាចសេដ្ឋកិច្ចលំដាប់ទីបី គឺជាដៃគូរកស៊ីដ៏ធំមួយរបស់អាមេរិក ដែលជាមហាអំណាចសេដ្ឋកិច្ចធំជាងគេ។ បើតាមទិន្ន័យក្រសួងការរតនាគារអាមេរិក ក្នុងមួយឆ្នាំៗ ជញ្ជីងពាណិជ្ជកម្មទ្វេភាគីតែងតែផ្អៀងទៅកាន់ជប៉ុន ដោយកាលពីឆ្នាំ២០១៦ ជប៉ុនមានទំហំពាណិជ្ជកម្មលើសអាមេរិកចំនួន៦៩ពាន់លានដុល្លារឯណោះ។ បញ្ហានេះធ្វើឲ្យលោក ត្រាំ មិនសប្បាយចិត្តរហូតមក និងប្រកាសរកដំណោះស្រាយផង។
កន្លងមក ក្រុងតូក្យូក៏បានឆ្លើយតបការចោទប្រកាន់របស់ក្រុងវ៉ាស៊ិនតោនដែរ ដោយអះអាងថាឱនភាពពាណិជ្ជកម្មរបស់អាមេរិក គ្រាន់តែជាចំណែកតូចមួយនៃឱនភាពពាណិជ្ជកម្មទាំងអស់របស់អាមេរិក។ មន្ត្រីជប៉ុនក៏បានចង្អុលមុខចិនថាជាម្ចាស់ឱនភាពាណិជ្ជកម្មដ៏ធំរបស់អាមេរិក។ រដ្ឋាភិបាលប្រទេសសម្ព័ន្ធមិត្តចាក់ទឹកមិនលិចទាំងពីរនេះ ក៏បានចរចារួចម្ដហើយលើបញ្ហានេះ ប៉ុន្តែមិនអាចស្វែងរកច្រកចេញបានដដែល។
ជុំវិញកិច្ចព្រមព្រៀងពាណិជ្ជកម្មសេរីវិញ លោក ត្រាំ នៅតែប្រកាន់ជំហរដើរចេញពីកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) ដដែល ខណៈដែលរដ្ឋាភិបាលនាយករដ្ឋមន្ត្រី ស៊ិនហ្សូ អាបេ បានប្រកាសដាច់ខាតហើយថា ជប៉ុនមិនចាកចេញពី TPP ជាដាច់ខាតតែម្ដង និងរួមដៃគ្នាជាមួយរដ្ឋសមាជិកសេសសល់១០ផ្សេងទៀតដើម្បីសម្រេចឲ្យបានកិច្ចព្រមព្រៀងមួយ ទោះជាគ្មានវត្តមានអាមេរិកក្ដី៕
Tag:
អាមេរិក
ជប៉ុន
ដូណាល់ ត្រាំ
© រក្សាសិទ្ធិដោយ thmeythmey.com