វិបត្តិកូរ៉េខាងជើង៖ ជប៉ុនស្នើចិនចាត់វិធានការថែមទៀត តែចិនឆ្លើយវិញថា «កុំមកប្រដៅ»

អន្តរជាតិ

វិបត្តិកូរ៉េខាងជើង៖ ជប៉ុនស្នើចិនចាត់វិធានការថែមទៀត តែចិនឆ្លើយវិញថា «កុំមកប្រដៅ»

07, Nov 2017 , 8:19 pm

រូបភាព

ដោយ: តន ចាន់រិទ្ធារ៉ា

វិបត្តិនុយក្លេអ៊ែរកូរ៉េខាងជើង គឺជាប្រធានបទសំខាន់មួយក្នុងជំនួបពិភាក្សារវាងប្រធានាធិបតីអាមេរិក ដូណាល់ ត្រាំ និងនាយករដ្ឋមន្ត្រីជប៉ុន ស៊ិនហ្សូ អាបេ ។ ក្នុងសន្និសីទកាសែតរួមគ្នានៅថ្ងៃទី៦ ខែវិច្ឆិកា លោក អាបេ បាននិយាយថា ចិនគួរដើរតួនាទីឲ្យបានច្រើនថែមទៀតក្នុងការដោះស្រាយបញ្ហានុយក្លេអ៊ែរនៅឧបទ្វីបកូរ៉េ។ ប៉ុន្តែចិនបានលើកឡើងវិញថា ខ្លួនធ្វើការងារច្រើនណាស់ហើយទាក់ទងបញ្ហានេះ ហើយក៏មិនត្រូវការនរណាមកណែនាំដែរ។

មីស៊ីលពីរគ្រាប់របស់កូរ៉េខាងជើងដែលហោះរំលងដែនអាកាសជប៉ុន ធ្វើឲ្យជប៉ុនខ្វាយខ្វល់យ៉ាងខ្លាំង និងអំពាវនាវឲ្យមានការចាត់វិធានការតឹងរ៉ឺងប្រឆាំងរដ្ឋក្បាលមួយរឹងមួយនេះ។ នាយករដ្ឋមន្ត្រីជប៉ុន ស៊ិនហ្សូ អាបេ បានស្នើជាថ្មីម្ដងទៀតឲ្យចិនជួយរកច្រកចេញសំណុំរឿងនុយក្លេអ៊ែរកូរ៉េខាងជើង។ លោក អាបេ ស្នើបែបនេះ ក្នុងសន្និសីទសារព័ត៌មានជាមួយប្រធានាធិបតីអាមេរិក ដូណាល់ ត្រាំ ដែលសន្យាឈរជាមួយជប៉ុន១០០ភាគរយដើម្បីទប់ទល់កូរ៉េខាងជើង។

សំណើរបស់នាយករដ្ឋមន្ត្រីជប៉ុនខាងលើនេះ មិនទទួលបានចម្លើយដូចចិត្តឡើយ និងត្រូវរងប្រតិកម្មពីមន្ត្រីចិនទៅទៀត។ អ្នកនាំពាក្យក្រសួងការបរទេសចិន Hua Chunying បាននិយាយថា ចិនមិនត្រូវការនរណាមកប្រាប់ខ្លួនឲ្យធ្វើនេះ ធ្វើនោះឡើយលើបញ្ហានុយក្លេអ៊ែរនៅឧបទ្វីបកូរ៉េ។ បើតាមលោកស្រី Hua Chunying ចិនបានបំពេញតួនាទីជាច្រើនដោយឥតនឿយហត់អ្វីទាំងអស់ក្នុងការដោះស្រាយបញ្ហានេះដោយសន្តិវិធីតាមផ្លូវនយោបាយ និងការទូត។

ក្នុងសន្និសីទសារព័ត៌មាននៅថ្ងៃទី៦ ខែវិច្ឆិកា អ្នកនាំពាក្យដដែលនេះក៏បញ្ជាក់គោលជំហររបស់ចិនក្នុងការសម្រេចឲ្យបានគោលដៅរំសាយអាវុធនុយនៅឧបទ្វីបកូរ៉េ ក៏ដូចជាការរក្សាសន្តិភាព និងស្ថិរភាពក្នុងតំបន់ផងដែរ។ បន្ថែមពីលើនេះ ចិននឹងបន្តតួនាទីរបស់ខ្លួនទៀតនៅថ្ងៃអនាគត ព្រោះវាជាការទទួលខុសត្រូវរបស់ចិនក្នុងនាមជាមហាអំណាច ជាសមជិកអចិន្ត្រៃយ៍ក្រុមប្រឹក្សាសន្តិសុខ និងជាអ្នកក្បែរខាងរបស់ប្រជាជនកូរ៉េ។

បន្ទាប់ពីរៀបរាប់ការប្រឹងប្រែងរបស់ចិនក្នុងវិបត្តិអូសបន្លាយមួយនេះមក លោកស្រីអ្នកនាំពាក្យខាងលើ ក៏ឆ្លៀតបានផ្ញើសារមួយឲ្យក្រុងតូក្យូដែរ។ ដោយមិននិយាយចំឈ្មោះជប៉ុន លោកស្រី Hua Chunying សង្ឃឹមថាប្រទេសផ្សេងនឹងរៀនសូត្រតាមចិនក្នុងការដោះស្រាយបញ្ហាដោយស្មោះពីចិត្ត និងបំពេញការងាររបស់ខ្លួនឲ្យបានប្រសើរ។ លោកស្រីនិយាយបែបនេះ ដោយចង់សំដៅការអធិប្បាយរបស់លោក អាបេ ដែលថា ជប៉ុនអាចបាញ់ទម្លាក់មីស៊ីលកូរ៉េខាងជើង បើហោះកាត់ដែនអាកាសខ្លួនម្ដងទៀត។

ជុំវិញជំហររបស់ជប៉ុនវិញ ក្នុងសន្និសីទសារព័ត៌មានជាមួយលោក ត្រាំ លោក អាបេ បានអះអាងថា ជប៉ុនប្រកាន់ជំហរយ៉ាងរឹងមាំដោយគាំទ្ររដ្ឋបាលអាមេរិកដែលរក្សាទុកចំណាត់ការទាំងអស់ទាំងក្តៅនិងត្រជាក់ផងដើម្បីដោះស្រាយបញ្ហាកូរ៉េខាងជើងនោះ។ ឯលោក ត្រាំ ក៏ប្រកាសថា កម្មវិធីមីស៊ីល និងនុយក្លេអ៊ែររបស់ព្យុងយ៉ាង ជាការគំរាមកំហែងដ៏ធំសម្រាប់សន្តិភាព ស្ថិរភាព និងសន្តិសុខពិភពលោក និងគំរាមថា គោលនយោបាយអត់ធ្មត់បែបយុទ្ធសាស្ត្ររបស់អាមេរិកឈានដល់ទីបញ្ចប់ហើយ៕