មកអាស៊ីមួយជើង លោក ត្រាំ រកលុយពីការលក់អាវុធបានរាប់ពាន់លានដុល្លារ

អន្តរជាតិ

មកអាស៊ីមួយជើង លោក ត្រាំ រកលុយពីការលក់អាវុធបានរាប់ពាន់លានដុល្លារ

08, Nov 2017 , 3:23 pm

រូបភាព

រូបភាព៖ Xinhua

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ ទើបបញ្ចប់ទស្សនកិច្ចនៅប្រទេសតំបន់អាស៊ីចំនួនពីរ គឺជប៉ុន និងកូរ៉េខាងត្បូង។ ក្នុងដំណើរទស្សនកិច្ចប្រទេសទាំងពីរនេះ ក្រៅពីលើកឡើងការបញ្ហានុយក្លេអ៊ែរកូរ៉េខាងជើង លោក ត្រាំ បញ្ចុះបញ្ចូលសម្ព័ន្ធមិត្តខ្លួនឲ្យទិញអាវុធតម្លៃរាប់រយលានដុល្លារ។ ទាំងនៅក្រុងតូក្យូ និងនៅក្រុងសេអ៊ូល លោក ត្រាំ សុទ្ធតែនិយាយថា សព្វាវុធរបស់អាមេរិកមិនត្រឹមតែជួយការពារប្រទេសទាំងពីរពីការគំរាមកំហែងរបស់កូរ៉េខាងជើងឡើយ តែក៏ជួយបង្កើតការងារនៅអាមេរិកដែរ។

វិបត្តិនុយក្លេអ៊ែរកូរ៉េខាងជើង និងទំនាក់ទំនងពាណិជ្ជកម្មទ្វេភាគី គឺជារបៀបវារៈសំខាន់នៃដំណើរទស្សនកិច្ច១២ថ្ងៃនៅតំបន់អាស៊ីរបស់ប្រធានាធិបតី ដូណាល់ ត្រាំ ។ ទន្ទឹមនឹងការព្រមានកូរ៉េខាងជើងកុំឲ្យសាកល្បងជាមួយអាមេរិក លោក ត្រាំ ក៏បង្ហាញការមិនពេញចិត្តចំពោះឱនភាពពាណិជ្ជកម្មដ៏លើសលប់របស់អាមេរិកជាមួយជប៉ុន និងកូរ៉េខាងត្បូង។ ប៉ុន្តែលោកក៏លើកឡើងថា បញ្ហានេះអាចដោះស្រាយបាន បើសម្ព័ន្ធមិត្តទាំងពីរទិញអាវុធពីអាមេរិកដើម្បីការពារខ្លួន។

នាយករដ្ឋមន្ត្រីជប៉ុន ស៊ិនហ្សូ អាបេ និងប្រធានាធិបតីអាមេរិក ដូណាល់ ត្រាំ កំពុងត្រួតពល (រូបភាព៖ Xinhua)

ដំណើរមកកាន់អាស៊ីលើកនេះបានក្លាយជាវេទិកាសម្រាប់លោក ត្រាំ អួតអាងពីសមត្ថភាពអាវុធរបស់អាមេរិក ហើយលោកបានជំរុញឲ្យក្រុងតូក្យូ និងក្រុងសេអ៊ូលទិញអាវុធអាមេរិកឲ្យបានច្រើន។ នៅជប៉ុន លោក ត្រាំ បាននិយាយដោយត្រង់ៗថា នាយករដ្ឋមន្ត្រីជប៉ុនលោក ស៊ិនហ្សូ អាបេ នឹងសម្រេចចិត្តទិញអាវុធច្រើនសន្ធឹកសន្ធាប់ពីអាមេរិក ដោយសារអាមេរិកបន្តផលិតអាវុធល្អបំផុតមកដល់ឥឡូវនេះ ហើយវាក៏ជារឿងល្អទាំងសងខាង គឺអាមេរិក និងជប៉ុនផ្ទាល់។

លោកនាយករដ្ឋមន្ត្រី អាបេ បានបញ្ចេញគម្រោងរបស់ជប៉ុនក្នុងការទិញយន្តហោះធុន F-35 និងនាវាចម្បាំងដែលមានសមត្ថភាពខ្ពស់ អាចបំពាក់មីស៊ីលបាញ់ទម្លាក់មីស៊ីលហោះក្រៅបរិយាកាសផែនដី។ សម្រាប់លោក អាបេ ការទិញសព្វាវុធពីអាមេរិក គឺដើម្បីពង្រឹងគ្រឹះការពារខ្លួន តែសម្រាប់លោក ត្រាំ នេះគឺជាឱកាសទាក់ទាញផលប្រយោជន៍សម្រាប់អាមេរិក ហើយក៏ដើម្បីបង្កើតការងារឲ្យប្រជាជនអាមេរិកដែរ។

នៅក្រុងសេអ៊ូលឯណោះវិញ លោក ត្រាំ និងសមភាគីកូរ៉េខាងត្បូង មូន ចេអ៊ីន បានប្រកាសថា កូរ៉េខាងត្បូងនឹងទិញសម្ភារយោធាច្រើនសន្ធឹកសន្ធាប់ពីអាមេរិកដើម្បីបង្កើនសមត្ថភាពទប់ទល់ការគំរាមកំហែងរបស់កូរ៉េខាងជើង។ លោក ត្រាំ បញ្ជាក់ថា ទំហំទឹកប្រាក់រាប់ពាន់លានដុល្លារនឹងចំណាយលើគម្រោងនេះ ហើយនឹងជួយពង្រឹងអានុភាពយោធាកូរ៉េខាងត្បូង ក៏ដូចជាជួយកាត់បន្ថយឱនភាពពាណិជ្ជកម្មរបស់អាមេរិកផង។

ប្រធានាធិបតីអាមេរិក ដូណាល់ ត្រាំ ចាប់ដៃជាមួយសមភាគីកូរ៉េខាងត្បូង មូន ចេអ៊ីន (រូបភាព៖ Reuters)

បើតាមសារព័ត៌មាន Korea Joongang Daily ដែលស្រង់សម្ដីលោក Yoon Young-chan លេខាប្រធានាធិបតីកូរ៉េខាងត្បូង មេដឹកនាំទាំងពីរបានបញ្ជាឲ្យមន្ត្រីរបស់ខ្លួនចាប់ផ្ដើមការពិភាក្សាលើការទិញអាវុធរបស់កូរ៉េខាងត្បូង និងការអភិវឌ្ឍយុទ្ធោបករណ៍ទំនើបៗជាច្រើនមុខទៀត។ ក្រៅពីនេះ រដ្ឋបាលលោក មូន ក៏នឹងចរចាជាមួយអាមេរិកដើម្បីទិញសព្វាវុធផ្សេងទៀតដូចជា នាវាមុជទឹកដោយថាមពលនុយក្លេអ៊ែរ និងឧបករណ៍តាមដានស៊េរីទំនើបជាដើម។

តាមពិតទៅ ការចរចាលើកិច្ចព្រមព្រៀងទិញលក់អាវុធតែងតែជាប្រធានបទក្រោយខ្នងនៃទស្សនកិច្ចក្រៅប្រទេសរបស់លោក ត្រាំ ។ ជាក់ស្ដែងនោះ កាលពីទស្សនកិច្ចនៅអារ៉ាប៊ីសាអូឌីត ក្រុងវ៉ាស៊ិនតោន និងក្រុងរីយ៉ាដ បានព្រមព្រៀងគ្នាលើការទិញលក់អាវុធតម្លៃរាប់ពាន់លានដុល្លារឯណោះ ខណៈដែលស្ថានការណ៍នៅមជ្ឈិមបូព៌ាកំពុងកើនកម្ដៅខ្លាំង។ មិនត្រឹមតែអារ៉ាប៊ីសាអូឌីត សូម្បីតែអារ៉ាប់អេមីរ៉ាត និងកាតា ក៏បានបញ្ជាទិញសព្វាវុធថ្លៃៗរបស់អាមេរិកដូចគ្នា៕