អន្តរជាតិ
ទស្សនកិច្ចលោក ត្រាំ នៅកូរ៉េខាងត្បូងចោមរោមដោយសំណុំរឿងកូរ៉េខាងជើង និងពាណិជ្ជកម្ម
× ចាកចេញពីជប៉ុន ប្រធានាធិបតី ដូណាល់ ត្រាំ បានទៅដល់កូរ៉េខាងត្បូងនៅថ្ងៃទី៧ ខែវិច្ឆិកា ដោយមានសំណុំរឿងនុយក្លេអ៊ែរកូរ៉េខាងជើង និងការសើរើកិច្ចព្រមព្រៀងពាណិជ្ជកម្មទ្វេភាគីជាប្រធានសំខាន់។ ជាន់ទឹកដីកូរ៉េខាងត្បូងភ្លាម លោក ត្រាំ និយាយថា ដំណោះស្រាយលើការគំរាមកំហែងពីសំណាក់កូរ៉េខាងជើង នឹងលេចចេញមិនខាន តែលោកមិននិយាយច្បាស់ថា បញ្ហានេះអាចចេញតាមច្រកណាឡើយ។
យន្តហោះ Air Force One របស់ប្រធានាធិបតី ដូណាល់ ត្រាំ បានចុះចតនៅមូលដ្ឋានអាកាស Osan ដែលជាការចាប់ផ្ដើមទស្សនកិច្ចពីរថ្ងៃនៅកូរ៉េខាងត្បូង។ កូរ៉េខាងត្បូងជាប្រទេសទីពីរនៃទស្សនកិច្ច១២ថ្ងៃនៅតំបន់អាស៊ីរបស់លោក ត្រាំ ។ បន្តមក លោក ត្រាំ ក៏បន្តដំណើរទៅកាន់បន្ទាយទ័ព Camp Humphreys ក្បែរក្រុងសេអ៊ូល ដែលជាទីតាំងកងទ័ពអាមេរិកធំជាងគេនៅកូរ៉េខាងត្បូង។ នៅទីនោះ លោក ត្រាំ ត្រូវបានទទួលដោយផ្ទាល់ពីសំណាក់ប្រធានាធិបតី មូន ចេអ៊ីន ។
ចំពោះមុខមន្ត្រីយោធាអាមេរិក និងកូរ៉េខាងត្បូង លោក ត្រាំ បានត្រឹមអះអាងថា វិបត្តិកូរ៉េខាងជើងនឹងត្រូវបានដោះស្រាយមិនខាន តែមិនផ្ដល់ព័ត៌មានពិស្ដារឡើយ។ មុនហោះទៅកូរ៉េខាងត្បូង ប្រធានាធិបតីអាមេរិករូបនេះបាននិយាយនៅជប៉ុនថា កម្មវិធីមីស៊ីល និងនុយក្លេអ៊ែររបស់ព្យុងយ៉ាង ជាការគំរាមកំហែងដ៏ធំសម្រាប់សន្តិភាព ស្ថិរភាព និងសន្តិសុខពិភពលោក និងគំរាមថា គោលនយោបាយអត់ធ្មត់បែបយុទ្ធសាស្ត្ររបស់អាមេរិកឈានដល់ទីបញ្ចប់ហើយ។
នៅរសៀលថ្ងៃទី៧ ខែវិច្ឆិកា លោក មូន ចេអ៊ីន ក៏រៀបចំពិធីបដិសណ្ឋារកិច្ចអធិកអធមមួយសម្រាប់លោក ត្រាំ នៅវិមានប្រធានាធិបតី Cheong Wa Dae មុននឹងជំនួបផ្លូវការទ្វេភាគី។ បើតាមទីភ្នាក់ងារព័ត៌មាន Reuters លោកប្រធានាធិបតី មូន សង្ឃឹមថា ទស្សនកិច្ចរបស់លោក ត្រាំ នឹងជួយសម្រាលការភ័យបារម្ភរបស់ប្រជាជនកូរ៉េខាងត្បូង ជុំវិញការគំរាមរបស់កូរ៉េខាងជើង និងជាចំណុចរបត់ថ្មីក្នុងការស្វែងរកច្រកចេញនៃវិបត្តិនៅឧបទ្វីបកូរ៉េ។
ក្រៅពីសំណុំរឿងនុយក្លេអ៊ែរកូរ៉េខាងជើង ជំនួបទ្វេភាគីនៃមេដឹកនាំអាមេរិក និងកូរ៉េខាងត្បូង ក៏បានផ្ដោតលើទំនាក់ទំនងពាណិជ្ជកម្មផងដែរ។ លោក មូន និងសមភាគីអាមេរិក ត្រាំ បានជជែកគ្នាលើកិច្ចព្រមព្រៀងពាណិជ្ជកម្មសេរីទ្វេភាគីដែលត្រូវបានកែប្រែឡើងវិញក្នុងការចរចាកន្លងមក។ លោក ត្រាំ មិនសូវសប្បាយចិត្តឡើយ ពេលឃើញឱនភាពពាណិជ្ជកម្មរបស់អាមេរិកក្នុងការរកស៊ីជាមួយកូរ៉េខាងត្បូងនោះ ហើយលោកចង់បានកិច្ចព្រមព្រៀងថ្មីដែលកាត់បន្ថយគម្លាតនេះ។
ទាក់ទងបញ្ហានេះ លោក ត្រាំ បានបញ្ជាក់ជាមុនហើយថា ពាណិជ្ជកម្មនឹងរបៀបវារៈសំខាន់ក្នុងជំនួបជាមួយលោក មូន ។ លោកប្រធានាធិបតីអាមេរិកជឿថា អ្វីៗនឹងដោះស្រាយបានមិនខាន ដើម្បីបង្កើតការងារឲ្យបានច្រើននៅអាមេរិក ហើយនេះជាមូលហេតុដែលលោកធ្វើទស្សនកិច្ចនៅកូរ៉េខាងត្បូង។ ក្នុងជំនួបជាមួយលោក មូន លោក ត្រាំ លើកឡើងថា ការទិញអាវុធពីអាមេរិករបស់កូរ៉េខាងត្បូង នឹងជួយកាត់បន្ថយឱនភាពពាណិជ្ជកម្មមិនខាន៕
Tag:
អាមេរិក
កូរ៉េខាងត្បូង
ដូណាល់ ត្រាំ
មូន ចេអ៊ីន
© រក្សាសិទ្ធិដោយ thmeythmey.com