អន្តរជាតិ
ត្រាំ មិនបន្ទោសចិនរឿងឱនភាពពាណិជ្ជកម្ម ក្រោយចុះកិច្ចព្រមព្រៀងតម្លៃ២៥០ពាន់លានដុល្លារ
× ប្រធានាធិបតីអាមេរិក ដូណាល់ ត្រាំ មិនបានបន្ទោសចិនជុំវិញឱនភាពពាណិជ្ជកម្មឡើយ ទោះជាលោកមិនពេញចិត្តជញ្ជីងពាណិជ្ជកម្មទ្វេភាគីដែលផ្អៀងខ្លាំងទៅរកចិនក្ដី។ ប៉ុន្តែលោក ត្រាំ ក៏ប្រកាសថា នឹងរកវិធីសាស្ត្រដើម្បីដោះស្រាយបញ្ហានេះឲ្យបានតាមរយៈកិច្ចសហប្រតិបត្តិការឈ្នះ-ឈ្នះ។ ប្រធានាធិបតីអាមេរិកថ្លែងបែបនេះ អំឡុងពេលទស្សនកិច្ចបីថ្ងៃនៅទីក្រុងប៉េកាំង ដែលជាផ្នែកនៃទស្សនកិច្ច១២ថ្ងៃនៅតំបន់អាស៊ី។
នាពេលកន្លងមក ប្រធានាធិបតី ដូណាល់ ត្រាំ បានរិះគន់ទំនាក់ទំនងពាណិជ្ជកម្មទ្វេភាគីជាមួយចិនយ៉ាងខ្លាំង ព្រោះតែអាមេរិកប្រឈមមុខទំហំឱនភាពពាណិជ្ជកម្មដ៏ធំ។ ប៉ុន្តែពេលទៅដល់ទឹកដីចិន លោក ត្រាំ បែរជានិយាយបែបសរសើរចិនលើរឿងពាណិជ្ជកម្មនេះទៅវិញ ហើយថា លោកមិនទម្លាក់កំហុសលើចិនជុំវិញបញ្ហានេះឡើយ។ លោក ត្រាំ និយាយបែបនេះនៅថ្ងៃទី២ នៃដំណើរទស្សនកិច្ចផ្លូវរដ្ឋនៅចិន។
ការបន្ទន់ជំហររបស់លោក ត្រាំ ធ្វើឡើងក្រោយជំនួបជាងពីរម៉ោងជាមួយសមភាគីចិន ស៊ី ជិនភីង ក្នុងវិមានប្រជាជនចិននៅថ្ងៃទី៩ ខែវិច្ឆិកា។ មេដឹកនាំទាំងពីរក៏បានធ្វើសាក្សីពិធីចុះហត្ថលេខាលើកិច្ចព្រមព្រៀងរវាងក្រុមហ៊ុនធំៗរបស់អាមេរិក ដូចជា ក្រុមហ៊ុនផលិតយន្តហោះ Boeing, ក្រុមហ៊ុនរថយន្ត General Electric Co និងក្រុមហ៊ុនផលិតឈីប Qualcomm Inc ជាមួយនិងក្រុមហ៊ុនចិន ដែលតម្លៃច្រើនជាង២៥០ពាន់លានដុល្លារឯណោះ។
ក្នុងជំនួបជាមួយពាណិជ្ជករអាមេរិក និងចិន លោក ត្រាំ បញ្ជាក់ថា លោកមិនបន្ទោសចិនឡើយ ព្រោះលោកបន្ទោសប្រទេសមួយដែលព្យាយាមទាញយកផលប្រយោជន៍ដើម្បីប្រជាជនខ្លួនឯងនោះ ហើយលោកសរសើរចិនចំពោះរឿងនេះ។ ប្រធានាធិបតីក៏បានប្រាប់សមភាគីដែរថា អាមេរិកចង់បានការរកស៊ីដែលផ្ដល់ការចំណេញទៅមក និងមានយុត្តិធម៌ ហើយអាមេរិកនឹងចរចាជាមួយចិនដើម្បីបញ្ចប់បញ្ហានេះ។
ដោយឡែក លោក ស៊ី ជិនភីង វិញបានបង្ហាញទឹកមុខញញឹមពេលលោក ត្រាំ មិនបន្ទោសចិន។ យោងតាមទីភ្នាក់ងារព័ត៌មាន Xinhua ប្រធានាធិបតីចិនរូបនេះក៏និយាយដែរថា ទំនាក់ទំនងចិន និងអាមេរិក គួរជាការបំពេញឲ្យគ្នាទៅវិញទៅមក មិនការប្រជែងគ្នាឡើយ។ លោក ស៊ី បន្តថា បញ្ហាតែងកើតមានជានិច្ច ពេលសេដ្ឋកិច្ចកើនឡើងខ្លាំង ដូចនេះភាគីទាំងសងខាង ត្រូវប្រកានខ្ជាប់គោលការណ៍ស្មើភាព គោរពផលប្រយោជន៍គ្នា និងដោះស្រាយបញ្ហាតាមផ្លូវការពិភាក្សាគ្នា។
ជំនួសឲ្យការដាក់បន្ទុកលើក្រុងប៉េកាំងនោះ លោក ត្រាំ បែរបន្ទោសរដ្ឋបាលប្រធានាធិបតីអាមេរិកមុនៗ ដែលបណ្ដែតបណ្ដោយឲ្យអាមេរិកត្រូវខាតបង់ក្នុងការធ្វើជំនួញជាមួយចិន។ ក្រោយការឡើងកាន់តំណែងកាលពីដើមឆ្នាំមក លោក ត្រាំ ក៏បញ្ជាឲ្យសើរើទំនាក់ទំនងពាណិជ្ជកម្មជាមួយចិន ជាពិសេសបានស៊ើបអង្កេតការអនុវត្តរបស់ចិនលើវិស័យកម្មសិទ្ធិបញ្ញា ក៏ដូចជាឧស្សាហកម្មដែក និងអាលុយមីញ៉ូមផងដែរ៕
Tag:
អាមេរិក
ចិន
ដូណាល់ ត្រាំ
© រក្សាសិទ្ធិដោយ thmeythmey.com