អន្តរជាតិ
អាមេរិកដើរចេញពីការចរចាអន្តរជាតិស្ដីពីជនចំណាកស្រុក អគ្គរដ្ឋទូតអាមេរិក Nikki Haley ក្នុងកិច្ចប្រជុំក្រុមប្រឹក្សាសន្តិសុខ (រូបភាព៖ Xinhua)
× រដ្ឋបាលប្រធានាធិបតី ដូណាល់ ត្រាំ បានប្រកាសដើរចេញពីការចរចាអន្តរជាតិស្ដីពីការការពារជនចំណាកស្រុក និងជនភៀសខ្លួន ដោយអះអាងថា យន្តការពិភពលោកនេះប៉ះពាល់អធិបតេយ្យរបស់អាមេរិក។ ជំនួសមកវិញ អាមេរិកនឹងដោះស្រាយបញ្ហានេះដោយខ្លួនឯង ដោយរក្សាបានផលប្រយោជន៍ជាតិផង។ ការដើរចេញរបស់អាមេរិក រងការរិះគន់ខ្លាំងពីអង្គការសហប្រជាជាតិ ដែលកំពុងដឹកនាំការចរចានេះ។
មិនត្រឹមហាមឃាត់ជនភៀសខ្លួនមកពីប្រទេសខ្លះចូលទឹកដីអាមេរិក រឹតបន្តឹងការផ្ដល់ទិដ្ឋាការ និងចង់សាងសង់ជញ្ជាំងតាមព្រំដែន ពេលនេះអាមេរិកបានដើរចេញពីការចរចាលើបញ្ហាជនភៀសខ្លួនថែមទៀត។ អគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Nikki Haley បានជូនដំណឹងពីការដើរចេញនៅយប់ថ្ងៃទី២ ខែធ្នូ ដោយបានបញ្ជាក់ថា លោកប្រធានាធិបតី ដូណាល់ ត្រាំ ជាអ្នកសម្រេចចិត្តដោយផ្ទាល់។
អាមេរិកបានក្លាយជាសមាជិកនៃសេចក្ដីថ្លែងការណ៍ញូវយ៉កស្ដីពីជនភៀសខ្លួន និងទេសន្តប្រវេសន៍ ដែលត្រូវបានអនុម័តដោយមហាសន្និបាតអង្គការសហប្រជាជាតិក្នុងឆ្នាំ២០១៦ ។ រដ្ឋបាលក្រុងវ៉ាស៊ិនតោន ដែលស្ថិតក្រោមការដឹកនាំរបស់លោក បារ៉ាក់ អូបាម៉ា បានគាំទ្រសេចក្ដីថ្លែងការណ៍នេះ ដែលបានស្នើឲ្យមានការចរចាជាអន្តរជាតិដើម្បីបង្កើតកិច្ចព្រមព្រៀងសកលនៅត្រឹមឆ្នាំ២០១៨ ខាងមុខ។ កិច្ចព្រមព្រៀងនេះមានគោលដៅការពារសិទ្ធិជនភៀសខ្លួន និងទេសន្តប្រវេសន៍។
ក្នុងសេចក្ដីប្រកាសរបស់ខ្លួន លោកស្រី Haley និយាយថា យន្តការសកលក្នុងសេចក្ដីថ្លែងការណ៍ញូវយ៉ក មិនស្របតាមអធិបតេយ្យអាមេរិកឡើយ។ ជុំវិញបញ្ហានេះ តំណាងអាមេរិកបញ្ជាក់ថា គ្មានប្រទេសណាជួយច្រើនជាងអាមេរិក ហើយអាមេរិកនឹងបន្តសមានចិត្តរបស់ខ្លួន។ ប៉ុន្តែអាមេរិកនឹងអនុវត្តនយោបាយអន្តោប្រវេសន៍ដោយខ្លួនឯងតែម្នាក់គត់។ ពោល គឺអាមេរិកនឹងសម្រេចចិត្តការពារព្រំដែនរបស់ខ្លួន និងកំណត់ថា អ្នកណាមានសិទ្ធិជាន់ទឹកដីអាមេរិក។
អង្គការសហប្រជាជាតិបានប្រតិកម្មយ៉ាងខ្លាំងទៅនឹងការដកខ្លួនរបស់រដ្ឋបាលលោក ត្រាំ លើកនេះ។ ប្រធានមហាសន្និបាតអង្គការសហប្រជាជាតិលោក Miroslav Lajcak បានសរសេរលើ Twitter ថា លោកសោកស្ដាយដែលអាមេរិកមិនចូលរួមក្នុងការចរចាដើម្បីកិច្ចព្រមព្រៀងសកលដែលអនុវត្តតាមគោលការណ៍ស្ម័គ្រចិត្ត។ ឯអគ្គលេខាធិការអង្គការសហប្រជាជាតិ អង់តូនីញ៉ូ ហ្គូតេរ៉េស ក៏បង្ហាញការខកចិត្តដែរ តែក៏សង្ឃឺមថា អាមេរិកនឹងចូលរួមជាមួយគេឯងវិញ។
ចាប់តាំងពីកាន់តំណែងកាលពីដើមឆ្នាំំមកនោះ លោក ត្រាំ បានចេញបញ្ជារឹតត្បិតការធ្វើដំណើររបស់ប្រជាជននៃប្រទេសមួយចំនួនចូលទឹកដីអាមេរិក និងចាប់បណ្ដេញជនភៀសខ្លួនជាច្រើនបញ្ជូនទៅប្រទេសដើមវិញផង។ នេះជាការសន្យារបស់លោក ត្រាំ ក្នុងពេលឃោសនារកសំឡេងឆ្នោត សំដៅដោះស្រាយបញ្ហាអន្តោប្រវេសន៍ និងឧក្រិដ្ឋកម្មក្នុងស្រុក។ ប៉ុន្តែវិធានការណ៍នេះរងការរិះគន់ខ្លាំងពីមជ្ឈដ្ឋានជាច្រើន ដោយហៅថាជាការបំពានសិទ្ធិមនុស្សទៀតផង៕
Tag:
អាមេរិក
ជនភៀសខ្លួន
ដូណាល់ ត្រាំ
© រក្សាសិទ្ធិដោយ thmeythmey.com