ប្រមុខការទូតអាល្លឺម៉ង់៖ ឋានៈបងធំពិភពលោករបស់អាមេរិកកំពុងរសាត់ឆ្ងាយ ដោយសារ ត្រាំ

អន្តរជាតិ

ប្រមុខការទូតអាល្លឺម៉ង់៖ ឋានៈបងធំពិភពលោករបស់អាមេរិកកំពុងរសាត់ឆ្ងាយ ដោយសារ ត្រាំ

06, Dec 2017 , 3:39 pm

រូបភាព

ដោយ: តន ចាន់រិទ្ធារ៉ា

រដ្ឋមន្ត្រីការបរទេសអាល្លឺម៉ង់ នៅថ្ងៃទី៥ ខែធ្នូ បាននិយាយថា សណ្ដាប់ធ្នាប់ពិភពលោកបានប្រែប្រួលអស់ហើយ ចាប់តាំងពីការឡើងកាន់អំណាចរបស់លោក ដូណាល់ ត្រាំ ។ ចំណែកឯឋានៈបងធំពិភពលោករបស់អាមេរិកក៏រសាត់ទៅឆ្ងាយដែរដោយសារនយោបាយរបស់រដ្ឋបាលលោក ត្រាំ ដែលឲ្យតម្លៃខ្លាំងពេកលើផលប្រយោជន៍អាមេរិក មិនគិតប្រយោជន៍រួម និងភ្លេចតួនាទីជាមហាអំណាច។ ក្នុងន័យនេះ ប្រមុខការទូតអាល្លឺម៉ង់អះអាងថា អាល្លឺម៉ង់ត្រូវតែមានជំហរខ្លួនឯង។

ក្រោយការឡើងកាន់តំណែងជាប្រធានាធិបតីអាមេរិករបស់លោក ដូណាល់ ត្រាំ បង្កជាការផ្លាស់ប្ដូរដ៏ធំលើពិភពលោក។ អាមេរិកចាប់ផ្ដើមគិតតែពីប្រយោជន៍ខ្លួនឯង ដើរចេញពីកិច្ចព្រមព្រៀងទីក្រុងប៉ារីសស្ដីពីបម្រែបម្រួលអាកាសធាតុ ដកខ្លួនពីការចរចាអន្តរជាតិស្ដីពីសិទ្ធិជនចំណាកស្រុក បោះបង់កិច្ចព្រមព្រៀងភាពជាដៃគូអន្តរប៉ាស៊ីហ្វិក។ ក្រោមរដ្ឋបាលលោក ត្រាំ អាមេរិកលែងសូវគិតប្រយោជន៍រួម ដែលនេះបង្កការបារម្ភខ្លាំងក្នុងចំណោមសម្ព័ន្ធមិត្តអាមេរិក។

អាល្លឺម៉ង់ ដែលជាសម្ព័ន្ធមិត្តតំបន់អឺរ៉ុបរបស់អាមេរិក ក៏ហាក់អស់ជំនឿលើមិត្តរបស់ខ្លួនដែរ និងមើលឃើញពីការធ្លាក់ចុះឥទ្ធិពលអាមេរិកលើឆាកអន្តរជាតិ។ នាឱកាសវេទិកាគោលនយោបាយការបរទេសក្នុងទីក្រុងបែរឡាំង ថ្ងៃទី៥ ខែធ្នូ ប្រមុខការទូតអាល្លឺម៉ង់ Sigmar Gabriel និយាយថា ឧត្តមានុភាពរបស់អាមេរិកកំពុងក្លាយជាប្រវត្តិសាស្ត្រហើយក្រោមការដឹកនាំរបស់លោក ត្រាំ ។ នេះបើតាមសារព័ត៌មាន RT ។

ប្រមុខការទូតអាល្លឺម៉ង់រូបនេះបញ្ជាក់ថា ការដកខ្លួនរបស់អាមេរិកពីតួនាទីដ៏សំខាន់ជាអ្នកធានាយន្តការពហុភាគីលោកខាងលិច ជំរុញឲ្យមានការផ្លាស់ប្ដូរសណ្ដាប់ធ្នាប់ពិភពលោក ដែលបង្កផលប៉ះពាល់ភ្លាមៗដល់អាល្លឺម៉ង់ និងអឺរ៉ុប។ ដោយហេតុនេះ លោក Gabriel អះអាងថា អាល្លឺម៉ង់លែងអាចញាក់តាមអាមេរិកទៀត តែត្រូវមាននយោបាយផ្ទាល់ខ្លួន។ បើតាមសម្ដីនេះ អាល្លឺម៉ង់នឹងគិតប្រយោជន៍ខ្លួនសិន ទោះជាវាអាចប៉ះពាល់អាមេរិកក្ដី។

ជាមួយគ្នានោះ មន្ត្រីការទូតជាន់ខ្ពស់ដដែលនេះ ក៏ចោទអាមេរិកថា ឈប់មើលឃើញពិភពលោកសហគមន៍សកលទៀតហើយ តែជាសង្វៀនប្រយុទ្ធ ដែលប្រទេសទាំងអស់គិតតែពីប្រយោជន៍ផ្ទាល់ខ្លួន។ លោក Gabriel បានស្នើឲ្យអឺរ៉ុបមានជំហររបស់ខ្លួន ដើម្បីការពារប្រយោជន៍រួម និងក្លាយជាមហាអំណាចមួយ ដ្បិតអង្គការតំបន់នេះហាក់លែងមានទឹកមាត់ប្រៃដែរ សូម្បីតែក្នុងចំណោមសមាជិករបស់ខ្លួនក៏ដោយ។

តាមពិតទៅនោះ ទំនាក់ទំនងរវាងអាមេរិក និងសម្ព័ន្ធមិត្តតំបន់អឺរ៉ុបចាប់ផ្ដើមរង្គោះរង្គើខ្លាំង តាំងពីលោក ត្រាំ ចូលដឹកនាំអាមេរិក។ ជាការសន្យាពេលឃោសនារកសំឡេងឆ្នោត លោក ត្រាំ បានទាមទារឲ្យសមាជិកសម្ព័ន្ធយោធាណាតូមកពីអឺរ៉ុប បង់ប្រាក់សម្រាប់ការចំណាយរបស់អង្គការយោធានេះ ព្រោះអាមេរិកចេញថ្លៃចំណាយច្រើនជាងគេរហូតមក។ លោក ត្រាំ ក៏ប្រុងហែកកិច្ចព្រមព្រៀងនុយក្លេអ៊ែរជាមួយអ៊ីរ៉ង់ ដែលអឺរ៉ុបគាំទ្រទៀតផង៕