គ.ជ.ប បង្កើតក្រុមប្រតិកម្មរហ័ស ដើម្បីទប់ទល់នឹងការវាយប្រហារបង្ខូចឈ្មោះខ្លួន

ជាតិ

គ.ជ.ប បង្កើតក្រុមប្រតិកម្មរហ័ស ដើម្បីទប់ទល់នឹងការវាយប្រហារបង្ខូចឈ្មោះខ្លួន

06, Dec 2017 , 7:39 pm

រូបភាព

លោក សោម សូរីដា ក្លាយជាប្រធានក្រុមប្រតិកម្មរហ័សរបស់គ.ជ.ប

ដោយ: ថ្មីៗ

ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្តីសម្រេចមួយ ស្តីពីការបង្កើតក្រុមប្រតិកម្មរហ័ស ដើម្បីទប់ស្កាត់និងវាយបករាល់ចំណុចអវិជ្ជមាន។ ក្រុមប្រតិកម្មរហ័សនេះ មានលោក សោម សូរីដា ដែលបច្ចុប្បន្នមានឋានៈជាអគ្គលេខាធិការរងគ.ជ.ប ធ្វើជាប្រធាន រួមទាំងអនុប្រប្រធាន១រូប និងសមាជិក៥រូបទៀត។

ភារកិច្ចចម្បងរបស់ក្រុមប្រតិកម្មរហ័ស គឺការប្រមូលព័ត៌មាន ដែលចុះផ្សព្វផ្សាយជាសាធារណៈ ដើម្បីយកទៅវិភាគ ហើយស្វែងរកចំណុចអវិជ្ជមានទាំងឡាយ ដូចជា ការការបង្ខូចកិត្តិយសគ.ជ.ប រួមទាំងការធ្វើឲ្យមានការយល់ច្រឡំ ការបំភ័ន្ធសាធារណមតិ ការធ្វើឲ្យមហាជនមានការសង្ស័យ និងមិនទុកចិត្ត លើការរៀបចំការបោះឆ្នោត។ ក្រោយទទួលបានព័ត៌មាន អវិជ្ជមានបែបនេះហើយ ក្រុមប្រតិកម្មរហ័ស ត្រូវបំភ្លឺត្រឡប់ទៅវិញ។

ក្រុមប្រតិកម្មរហ័សនេះ ត្រូវបានបង្កើតឡើង ក្រោយមានការវាយប្រហារពីមជ្ឈដ្ឋាននានា ទៅលើគ.ជ.ប ក្នុងរយៈពេលចុងក្រោយនេះ។ សាធារណជនមួយចំនួន ជាពិសេសអ្នកប្រើប្រាស់បណ្តាញសង្គមហ្វេសប៊ុក បានបង្ហោះនិងចែករំលាយព័ត៌មាននានា ដោយរិះគន់ថា គ.ជ.ប លែងមានឯករាជ្យទៀតហើយ ហើយក៏មិនអាចរៀបចំការបោះឆ្នោតក្នុងឆ្នាំ២0១៨ ឲ្យបានត្រឹមត្រូវនិងយុត្តិធម៌ដែរ ដោយសារអនុប្រធានគ.ជ.ប លោក គួយ ប៊ុនរឿន និងសមាជិក២រូប គឺលោក រ៉ុង ឈុន និងលោកស្រី តែ ម៉ានីរ៉ុង ដែលមកពីអតីតគណបក្សសង្គ្រោះជាតិ បានលាលែង។

មិនយូរប៉ុន្មាន គ.ជ.ប ក៏ចេញសេចក្តីប្រកាសព័ត៌មាន ដើម្បីឆ្លើយតបនឹងការវាយប្រហារនេះ។ សេចក្តីប្រកាសព័ត៌មាននោះ បញ្ជាក់ថា គ.ជ.ប នៅតែមានឯករាជ្យ ទោះជាសមាជិកណា លាលែងក៏ដោយ។ តាមរយៈសេចក្តីប្រកាសព័ត៌មាន គ.ជ.ប ប្រកាសថា នឹងរៀបចំការបោះឆ្នោតឲ្យបានត្រឹមត្រូវបំផុត ដោយគ្មានបុគ្គលឬស្ថាប័នណាមួយ អាចបង្គាប់បញ្ជាខ្លួនបានឡើយ៕