ឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Nikki Haley បានការពារការសម្រេចចិត្តរបស់រដ្ឋបាលលោក ដូណាល់ ត្រាំ រឿងប្តូរទីតាំងស្ថានទូតពីក្រុង Tel Aviv ទៅកាន់ក្រុងហ្ស៊េរុយសាឡិម។ លោកស្រីផ្តាំប្រទេសដែលរិះគន់អាមេរិកថា មិនចាំបាច់នាំគ្នាបង្រៀនអាមេរិកទេរឿងដោះស្រាយបញ្ហាប៉ាឡេស្ទីន និងអ៊ីស្រាអែល។
ប្រទេសជាច្រើនលើពិភពលោកបន្តថ្កោលទោសអាមេរិក និងស្នើឲ្យមហាអំណាចមួយនេះពិចារណាឡើងវិញរឿងប្តូរទីតាំងស្ថានទូតរបស់ខ្លួនពីក្រុង Tel Aviv ទៅកាន់ក្រុងហ្ស៊េរុយសាឡិមនោះ។ ទោះជាមានការថ្កោលទោសក្តី អាមេរិកមិនបានទទួលយកពាក្យស្នើសុំ និងពិចារណាពីការថ្កោលទោសរបស់សហគមន៍អន្តរជាតិនេះឡើយ។
បេសកជនពិសេសរបស់អាមេរិកប្រចាំអង្គការសហប្រជាជាតិលោកស្រី Nikki Haley បានព្យាយាមការពារការសម្រេចចិត្តរបស់ប្រធានាធិបតីដូណាល់ ត្រាំ ក្នុងកិច្ចប្រជុំបន្ទាន់នៃក្រុមប្រឹក្សាសន្តិសុខអង្គការសហប្រជាជាតិនៅថ្ងៃសុក្រ ទី ៨ ខែធ្នូ។ មិនត្រឹមតែប៉ុណ្ណោះ លោកស្រីបានព្យាយាមវាយប្រហារអង្គការសហប្រជាជាតិ និងប្រទេសដែលរិះគន់អាមេរិកវិញទៀត។
តំណាងក្រុងវ៉ាស៊ីនតោនក្នុងអង្គការសហប្រជាជាតិរូបនេះបានអះអាងថា វាជារឿងធម្មតាសម្រាប់ការដាក់តាំងទីស្ថានទូតនៅរដ្ឋធានីរបស់ប្រទេសផ្សេងទៀតជាមិត្ត ហើយបើនិយាយពីបញ្ហាកសាងសន្តិភាពអ៊ីស្រាអែល និងប៉ាឡេស្ទីន អង្គការសហប្រជាជាតិឯណោះទេដែលបង្កផលប៉ះពាល់ខ្លាំងជាងគេ។
លោកស្រី Haley បានបញ្ជាក់ដូច្នេះ៖«អង្គការសហប្រជាជាតិបានធ្វើឲ្យខូចខាតដល់ដំណើរកសាងសន្តិភាពនៅមជ្ឈិមបូព៌ាច្រើនជាងជួយជ្រោមជ្រែង។ អង្គការសហប្រជាជាតិបានក្លាយកម្លាំងអរីភាពមួយដែលប្រឆាំងអ៊ីស្រាអែលខ្លាំងជាងគេលើពិភពលោក»។
ក្រៅពីរិះគន់អង្គការសហប្រជាជាតិ លោកស្រីបានងាកទៅរិះគន់ប្រទេសឯទៀតដែលថ្កោលទោសអាមេរិកវិញម្តង ហើយលោកស្រីបញ្ជាក់ថា អាមេរិកមិនត្រូវការអ្នកបង្រៀនឡើយពាក់ព័ន្ធនឹងជម្លោះអ៊ីស្រាអែល និងប៉ាឡេស្ទីននោះ។
«អាមេរិកមិនត្រូវការការបង្រៀន ឬណែនាំពីបណ្តាប្រទេសដែលមិនមានការជឿទុកចិត្តពេលនិយាយដល់រឿងដោះស្រាយបញ្ហាជាមួយអ៊ីស្រាអែលនិងប៉ាឡេស្ទីនប្រកបដោយយុត្តិធម៌នោះ»។ លោកស្រី Haley បានប្រកាសដូច្នេះ។
តាមពិតទៅការសម្រេចចិត្តរបស់ប្រធានាធិបតីអាមេរិកបានបង្កឲ្យមានការខឹងសម្បារខ្លាំងក្នុងចំណោមប្រជាជនប៉ាឡេស្ទីន។ ប្រធានាធិបតីប៉ាឡេស្ទីន បានប្រកាសថា ប៉ាឡេស្ទីនឈប់ទទួលអាមេរិកជាសន្ធានការីឥតមានលម្អៀងទៀតហើយ ហើយប៉ាឡេស្ទីលែងនិយាយជាមួយអាមេរិករហូតដល់មានការសម្រេចចិត្ត។
ក្រៅពីនេះគេឃើញមានចលនាបាតុកម្មរបស់ប្រជាជនប៉ាឡេស្ទីនផងដែរនៅលើទឹកដីប៉ាឡេស្ទីនដែលត្រូវបានកាន់កាប់ដោយអ៊ីស្រាអែល។ ប្រជាជនប៉ាឡេស្ទីនយ៉ាងហោចណាស់ម្នាក់ត្រូវបានទាហានអ៊ីស្រាអែលបាញ់ស្លាប់ក្នុងពេលបាតុម្ម ហើយជាច្រើននាក់ផ្សេងទៀតបានរងរបួស៕