កិច្ចប្រជុំពេញអង្គអាយស៊ីស៊ី-អង្គរលើកទី២៤ ផ្តោតលើការងារអភិរក្ស និងបញ្ហាសំណង់ខុសច្បាប់

ជាតិ

កិច្ចប្រជុំពេញអង្គអាយស៊ីស៊ី-អង្គរលើកទី២៤ ផ្តោតលើការងារអភិរក្ស និងបញ្ហាសំណង់ខុសច្បាប់

13, Dec 2017 , 11:52 am

រូបភាព

ដោយ: អុីសា រ៉ហានី (Isa Rohany)

សៀមរាប៖ កិច្ចប្រជុំពេញអង្គលើកទី២៤ និងផ្នែកបច្ចេកទេសលើកទី២៩ នៃគណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរហៅកាត់ថាអាយស៊ីស៊ី-អង្គរ កំពុងដំណើរការ នៅព្រឹកថ្ងៃទី១៣ ខែធ្នូនេះ។ បទបង្ហាញសំខាន់ៗ ក្នុងកិច្ចប្រជុំនេះ ផ្តោតលើការងារអភិរក្ស ជួសជុល ដំណើរការរុះរើសំណង់ខុសច្បាប់។ល។

កិច្ចប្រជុំនៅថ្ងៃទី១៣ ដែលជាថ្ងៃទី១នៃកិច្ចប្រជុំអាយស៊ីស៊ី-អង្គរ គឺជាកិច្ចប្រជុំថ្នាក់បច្ចេកទេស។ កិច្ចប្រជុំបច្ចេកទេសនេះ ដើម្បីឱ្យគណៈកម្មាធិការអាយស៊ីស៊ី-អង្គរ ពិនិត្យឡើងវិញ រាល់អនុសាសន៍ ដែលដាក់ក្នុងកិច្ចប្រជុំលើកមុន ហើយអ្នកបច្ចេកទេស នឹងបង្ហាញរាល់ការអនុវត្ត និងបំពេញបន្ថែមរាល់ចំណុចខ្វះខាត។

រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរាលោកស្រី ភឿង សកុណា បានប្រាប់ក្រុម អ្នកសារព័ត៌មានថា ថ្ងៃទី២ នៃកិច្ចប្រជុំនេះ គឺអ្នកបច្ចេកទេសនឹង រាយការណ៍ពីលទ្ធផលនៃអនុសាសន៍នានា របស់គណៈកម្មាធិការអាយស៊ីស៊ី-អង្គរ រួមនឹងការ ធ្វើបទបង្ហាញមួយចំនួនទៀត រួមមាន ការលុបបំបាត់សំណង់ខុសច្បាប់ ក្នុងរមណីយដ្ឋានអង្គរ ជាដើម។

គួរបញ្ជាក់ថា បទបង្ហាញសំខាន់ៗក្នុងកិច្ចប្រជុំអាស៊ីស៊ីអង្គរលើកទី២៤ រួមមាន ការអភរិក្ស និងជួសជុលតាមប្រាសាទ មានប្រាសាទតាព្រហ្ម អកយំ បន្ទាយក្តី អង្គរវត្ត បាយ័ន។ ក្នុងនោះ ក៏មានការបង្ហាញពីគម្រោងស្រាវជ្រាវផ្លូវដឹកថ្ម នាសម័យបុរាណផងដែរ។ កិច្ចប្រជុំនេះ ធ្វើរយៈពេល២ថ្ងៃ គឺថ្ងៃទី១៣ និង១៤ ខែធ្នូ នៅស្នាក់ការអាជ្ញាធរជាតិអប្សរា ដោយមានតំណាងស្ថាប័នពាក់ព័ន្ធប្រមាណ ជាង២០០នាក់។ សហប្រធាននៃកិច្ចប្រជុំនេះ គឺលោកជំទាវ Eva NGUYEN BINH ឯកអគ្គរដ្ឋទូតបារាំងប្រចាំកម្ពុជា និង ឯកឧត្តម Hidehisa HORINOUCHI ឯកអគ្គរាជទូតជប៉ុនប្រចាំកម្ពុជា៕