ម៉ាឡេស៊ីមិនខ្លាចអាមេរិកកាត់ជំនួយ ក្រោយបោះឆ្នោតថ្កោលទោសអាមេរិករឿងហ្ស៊េរុយសាឡិម

អន្តរជាតិ

ម៉ាឡេស៊ីមិនខ្លាចអាមេរិកកាត់ជំនួយ ក្រោយបោះឆ្នោតថ្កោលទោសអាមេរិករឿងហ្ស៊េរុយសាឡិម

23, Dec 2017 , 7:00 pm

រូបភាព

ឧបនាយករដ្ឋមន្រ្តីម៉ាឡេស៊ី Ahmad Zahid Hamidi (រូបភាព៖ Xinhua)

ដោយ: តន ចាន់រិទ្ធារ៉ា

ឧបនាយករដ្ឋមន្ត្រីម៉ាឡេស៊ី នៅថ្ងៃទី២២ ខែវិច្ឆិកា បានប្រកាសថា ម៉ាឡេស៊ីមិនញញើតការគំរាមកំហែងកាត់ជំនួយរបស់អាមេរិកឡើយ បន្ទាប់ពីបានគាំទ្រសេចក្ដីសម្រេចរបស់មហាសន្និបាតអង្គការសហប្រជាជាតិ ដែលថ្កោលទោសការសម្រេចចិត្តរបស់លោក ដូណាល់ ត្រាំ ក្នុងការទទួលស្គាល់ទីក្រុងហ្ស៊េរុយសាឡិម ជារដ្ឋធានីរបស់អ៊ីស្រាអែល។

ម៉ាឡេស៊ី ស្ថិតក្នុងចំណោមប្រទេសចំនួន១២៨ ដែលបានបោះឆ្នោតថ្កោលទោសអាមេរិក។

«ពួកគេយកលុយពីអាមេរិករាប់លាន អាចរាប់ពាន់លានដុល្លារទៀត ហើយពួកគេនាំគ្នាបោះឆ្នោតប្រឆាំងយើង។ ល្អ! យើងកំពុងរង់ចាំមើលការបោះឆ្នោត។ ឲ្យពួកគេបោះឆ្នោតប្រឆាំងយើងទៅ។ យើងនឹងសន្សំលុយបានច្រើន។ យើងមិនដែលខ្វល់ឡើយ»។ នេះជាសម្តីព្រមានរបស់ប្រធានាធិបតីអាមេរិកលោក ដូណាល់ ត្រាំ មុនការបោះឆ្នោតនៅមហាសន្និបាតអង្គការសហប្រជាជាតិ។ ប៉ុន្តែសម្ដីគំរាមនេះមិនទទួលបានផលទេ ដោយប្រទេសចំនួន១២៨បានរិះគន់ការសម្រេចចិត្តរបស់អាមេរិក។

ម៉ាឡេស៊ី ដែលចេញមុខរិះគន់អាមេរិកតាំងពីលោក ត្រាំ ប្រកាសទទួលស្គាល់ទីក្រុងហ្ស៊េរុយសាឡិម ជារដ្ឋធានីរបស់អ៊ីស្រាអែលមកនោះ ក៏បោះឆ្នោតគាំទ្រដែរ និងមិនខ្វល់ខ្វាយខាតបង់ជំនួយទឹកប្រាក់របស់អាមេរិកឡើយ។ ឧបនាយករដ្ឋមន្ត្រីម៉ាឡេស៊ី Ahmad Zahid Hamidi បានប្រកាសថា ការគំរាមផ្ដាច់ជំនួយរបស់អាមេរិក មិនអាចធ្វើឲ្យម៉ាឡេស៊ីព្រឺព្រួចឡើយ ទោះជាម៉ាឡេស៊ីទទួលជំនួយបច្ចេកទេសយោធាពីអាមេរិកក្ដី។

ថ្លែងនាឱកាសការជួបជុំបង្ហាញសាមគ្គីភាពជាមួយប៉ាឡេស្ទីននៅថ្ងៃទី២២ ខែធ្នូ លោក Hamidi អះអាងថា ម៉ាឡេស៊ីមិនមែនជាប្រទេសទទួលជំនួយធំដុំរបស់អាមេរិកឡើយ ទោះជាបានទទួលជំនួយផ្នែកសន្តិសុខ និងវិស័យការពារជាតិក៏ដោយចុះ។ «អាមេរិកមិនគួរប្រើប្រាស់ការគំរាមដូច្នេះឡើយ ព្រោះសេចក្ដីសម្រេចរបស់មហាសន្និបាតជាគំនិតរបស់សហគមន៍អន្តរជាតិទាំងមូល ហើយសមាជិកទាំងអស់គួរតែគោរពតាម»។ នេះជាសម្ដីរបស់លោក Hamidi ផ្សាយដោយសារព័ត៌មាន Bernama។

នាថ្ងៃព្រហស្បតិ៍ទី ២១ ខែធ្នូ សមាជិកអង្គការសហប្រជាជាតិចំនួន ១២៨ បានបោះឆ្នោតអនុម័តដំណោះស្រាយប្រឆាំងការសម្រេចចិត្តរបស់អាមេរិកដែលទទួលស្គាល់ហ្ស៊េរុយសាឡិមជារដ្ឋធានីរបស់អ៊ីស្រាអែល។ ប្រទេសចំនួនប្រាំបួនមានអាមេរិក និងអ៊ីស្រាអែលផងនោះបានបោះឆ្នោតប្រឆាំងដំណោះស្រាយនេះ។ ប្រទេសដែលបោះឆ្នោតប្រឆាំងសេចក្ដីសម្រេចទាំងនោះ គឺជាប្រទេសកោះតូចៗ ក្រីក្រ ហើយពឹងផ្អែកលើជំនួយអាមេរិកយ៉ាងខ្លាំង។

ប្រទេស៣៥នាំគ្នាបោះអនុប្បវាទក្នុងនោះមានសម្ព័ន្ធមិត្តអាមេរិកដូចជាកាណាដា និងអូស្ត្រាលីផងដែរ។ ប្រទេសនៅសេសសល់ គឺអវត្តមានពីកិច្ចប្រជុំបន្ទាន់តែម្ដង។ ទោះជាសេចក្ដីសម្រេចនេះគ្មានអំណាចចាប់បង្ខំឲ្យអនុវត្តក្ដី តែវាបានបង្ហាញពីការមិនពេញរបស់សហគមន៍អន្តរជាតិចំពោះការប្រកាសរបស់លោក ត្រាំ ដែលកំពុងបង្កជាហិង្សាកាន់តែខ្លាំង៕