ភ្នំពេញ៖ ព្រោះតែមានវិបត្តិផ្លូវចិត្ត ដោយសារបែកបាក់មិត្តភក្តិ និងមានបញ្ហាក្នុងគ្រួសារ កុមារី ជួង ច័ន្ទលក្ខិណា អាយុ១៥ឆ្នាំ បានសរសេរសៀវភៅមួយក្បាលដែលមានចំណងជើងថា “Behind the perfect smile (នៅពីក្រោយស្នាមញញឹមដ៏ឥតខ្ចោះមួយ)” ។ សៀវភៅនេះបានដាក់លក់នៅក្នុងថ្ងៃតាំងពិព័រណ៍សៀវភៅថ្នាក់ជាតិលើកទី៦ កន្លងទៅនេះ និងទទួលបានចំណាប់អារម្មណ៍យ៉ាងច្រើនពីអ្នកទិញ។
ក្រោយពីមានការលើកទឹកចិត្តពីប្រធានក្រុមអ្នកនិពន្ធវ័យក្មេង ឱ្យបោះពុម្ពជាសៀរភៅ កុមារី ជួង ច័ន្ទលក្ខិណា ក៏បានផ្តើមចងក្រងសំណៅដើមឱ្យចេញជាសៀវភៅតែម្ដង។ នាងរៀបរៀងសៀវភៅនេះឡើង ក្រោយពីមានវិបត្តិគ្រួសារ និងក្រោយមកបានរងសម្ពាធពីការបែកបាក់មិត្តភក្តិដ៏ល្អរបស់នាង។ អនុស្សាវរីយល្អៗ និងការឈឺចាប់ទាំងឡាយត្រូវបានកត់ត្រាទុកនៅក្នុងកូនសៀវភៅប្រចាំថ្ងៃរបស់នាង។ "ខ្ញុំបានកត់រឿងរ៉ាវដែលខ្ញុំចាំហូរហែ។ ខ្ញុំរងសម្ពាធច្រើនណាស់។ ប៉ាម៉ាក់ខ្ញុំលែងលះគ្នា មិត្តភក្តិដ៏ល្អ ក៏បែកបាក់ ហើយកាលណោះ គ្រូក៏ធ្វើបាបខ្ញុំខ្លាំងទៀត ខ្ញុំពិតជាពិបាកចិត្តខ្លាំងណាស់”។
ដើមហេតុចំបងដែលធ្វើឱ្យក្មេងស្រីម្នាក់នេះ សរសេរសៀវភៅ“Behind the perfect smile នេះឡើងគឺដោយសារនាងបែកពីមិត្តស្រីរបស់នាង។ មិត្តម្នាក់នោះរស់នៅសហរដ្ឋអាមេរិកមានអាយុស្រករនឹងនាងដែរ។ ហើយមូលហេតុនៅពីក្រោយការបែកបាក់គ្នានេះ កុមារីរៀនថ្នាក់ទី១០រូបនេះ មិនបានដឹងពីមូលហេតុច្បាស់លាស់នោះទេ។ នាងដឹងត្រឹមថា មិត្តល្អរបស់នាង មានមិត្តថ្មីម្នាក់ទៀត ហើយមិត្តថ្មីនោះ មិនចូលចិត្តនាង ជាហេតុធ្វើឱ្យមិត្តរបស់នាងត្រូវដើរចេញពីនាង។ "ខ្ញុំអត់បានដឹងមូលហេតុច្បាស់ ខ្ញុំបានព្យាយាមសួរគាត់ដែរ តែគាត់គ្រាន់តែប្រាប់ថា មិត្តថ្មីរបស់គាត់មិនចូលចិត្តខ្ញុំទេ។ ខ្ញុំគិតថាប្រាកដជាមានរឿងនៅពីក្រោយហ្នឹងទៀត តែខ្ញុំមិនដឹងថារឿងអី"។
សៀវភៅ “Behind the perfect smile” បាននិយាយអំពី សេចក្តីស្រលាញ់ ការលើកទឹកចិត្ត មិត្តភាព និងការងប់ងល់។ កុមារីដែលមានស្រុកកំណើតនៅខេត្តបាត់ដំបងរូបនេះបាននិយាយថា៖"សៀវភៅនេះចង់បង្ហាញថា អ្វីដែលយើងគិតវាមិនសុទ្ធតែត្រូវទេ ហើយពេលដែលមានរឿងមិនល្អកើតលើខ្លួនយើងផ្ទួនៗក៏ដោយ យើងត្រូវជម្នះគ្រប់យ៉ាង។ ត្រូវគិតថា ស្ថានភាពលំបាកយ៉ាងណា ក៏នៅតែមានច្រកចេញមួយដ៏ប្រសើរដែរ»។
លោក លី ដារា ប្រធានក្រុមអ្នកនិពន្ធវ័យក្មេង និងជាអ្នកកែសម្រួលសៀវភៅ “Behind the perfect smile” បានឱ្យដឹងថា អត្ថន័យក្នុងសៀវភៅមួយក្បាលនេះ ត្រូវនឹងយុវវ័យភាគច្រើន។ លោកទទួលស្គាល់ថា តាំងពីលោកអានសៀវភៅបានប្រមាណ ៧៧៩ ក្បាលមក សៀវភៅមួយក្បាលនេះ លោកស្រួលអានជាងគេ ហើយធ្វើឱ្យលោកចង់ដឹងថារឿងនោះនឹងបញ្ចប់ដោយរបៀបណា។
ថ្វីដ្បិតតែលក្ខិណាត្រូវរស់ក្នុងស្ថានភាពគ្រួសារមានវិបត្តិ មិនបានរស់ក្បែរម្ដាយឪពុក ដោយនៅជាមួយជីដូន និងត្រូវបែកបាក់មិត្តភក្តិ ព្រមទាំងមានសម្ភាធពីសាលាក៏ដោយ ក៏ក្មេងស្រីវ័យ១៥ឆ្នាំរូបនេះ នៅតែមិនបោះបង់ចោលការសិក្សា ហើយថែមទាំងខឹតខំប្រឹងប្រែងទ្វេដង។ ជាងនេះទៅទៀតនាងបានកំណត់គោលដៅក្នុងជីវិត និងការសិក្សាបានយ៉ាងច្បាស់លាស់។
លក្ខិណា បញ្ជាក់ថា នាងចង់បានអាហារូបករណ៍ទៅសិក្សានៅប្រទេស សិង្ហបុរី ថ្នាក់វិទ្យាល័យក្នុងឆ្នាំ២០១៨ខាងមុខនេះ។ នាងបានស្រាវជ្រាវពីតម្រូវការខាងសាលាចង់បាន និងព្យាយាមពង្រឹងចំណេះដឹងផ្នែកគណិតវិទ្យារហូតប្រឡងជាប់សិស្សពូកែគណិតវិទ្យា ទូទាំងរាជធានីក្នុងឆ្នាំ២០១៦ ក្នុងចំណាត់ថ្នាក់លេខ៤ ។ នាងក៏ទើបតែបញ្ចប់ការសិក្សាភាសាអង់គ្លេសវគ្គខ្លី នៅមជ្ឈមណ្ឌលបណ្ដុះបណ្ដាលភាសាអង់គ្លេស ACEផងដែរ។
កុមារីដែលមានឪពុកជាមន្ត្រីរាជការ និងម្ដាយជាជនជាតិខ្មែរកាត់ថៃរូបនេះបន្ថែមថា តាំងពីតូចមកជីដូនតែងតែប្រាប់ឱ្យនាងខំរៀន។ "ខ្ញុំរៀនថ្នាក់ទី១ដល់ថ្នាក់ទី៦ ជាប់លេខ១រហូត ហើយពីថ្នាក់ទី៧ ដល់ទី១០នេះ ខ្ញុំជាប់ចំណាត់ថ្នាក់ចន្លោះពីលេខ១ដល់លេខ៤ឆ្លាស់គ្នា។ ខ្ញុំរៀនបានលទ្ធផលបែបនេះដោយសារតែ យាយរបស់ខ្ញុំគាត់តែងតែប្រាប់ខ្ញុំឱ្យខំរៀន ហើយពន្យល់ពីផលប្រយោជន៍នៃការសិក្សា"។ លក្ខិណារំឮកពីការសិក្សារបស់នាង។
ពេលទំនេរ លក្ខិណាចូលចិត្តអានសៀវភៅវិទ្យាសាស្ត្រដែលទាក់ទងនឹងភពផែនដី ប្រលោមលោក ស្ដាប់ចម្រៀង ជាភាសាអង់គ្លេស។ ប៉ុន្តែលក្ខិណា បញ្ជាក់ថាទៅថ្ងៃអនាគត នាងមានបំណងចង់ធ្វើការផ្នែកសុខាភិបាល៕