កម្មវិធី The Perspectives Cambodia ជាវេទិកាសង្គមមួយដែលបណ្តុះស្មារតីសាមគ្គីភាព និងមានគំនិតវិជ្ជមានក្នុងសង្គម ដើម្បីឲ្យយុវជនអាចរស់នៅជាមួយគ្នា ក្នុងភាពផ្សេងគ្នា និងចម្រុះគ្នានៃគំនិត និងការយល់ឃើញប្រកបដោយសីលធម៌ គុណធម៌ និងការទទួលខុសត្រូវ។ នេះជាការបញ្ជាក់របស់ លោក ហួ តុលា សមាជិកស្ថាបនិក និងជានាយកគ្រប់គ្រងកម្មវិធីនេះ ដែលបានបន្តថាកម្មវិធី The Perspectives Cambodia រដូវកាលទី២ នឹងចាប់ផ្តើមនៅពេលឆាប់ៗ ហើយដំណើរការនៃការជ្រើសបេក្ខជន ចាប់ផ្តើមពីថ្ងៃទី១ ខែធ្នូឆ្នាំ២០១៧ ដល់ថ្ងៃទី៧ ខែមករា ឆ្នាំ២០១៨។ ក្នុងបទសម្ភាសន៍ជាមួយសារព័ត៌មានថ្មីៗ លោក ហួ តុលា បានគូសបញ្ជាក់ថា យុវជនអាចបង្កើនសមត្ថភាព និងបទពិសោធន៍របស់ខ្លួន តាមរយៈការជជែកដេញដោល តស៊ូមតិ ផ្លាស់ប្តូរគំនិត និងការស្រាវជ្រាវលើបញ្ហារួមមួយ ហើយពួកគេគឹជាអ្នកបន្តវេន និងអ្នកដឹកនាំដ៏ល្អនាថ្ងៃអនាគត។
សូមអានបទសម្ភាស រវាងលោក ទីន សុខលីម អ្នកយកព័ត៌មាន នៃសារព័ត៌មានអេឡិចត្រូនិកថ្មីៗ និងលោក ហួ តុលា ដូចតទៅ៖
លោក ទីន សុខលីម៖ ខ្ញុំចង់ឲ្យលោករៀបរាប់ខ្លះៗ ពីកត្តាដែលជំរុញឲ្យបង្កើតកម្មវិធី « The Perspectives Cambodia» នេះឡើង?
លោក ហួ តុលា៖ មានហេតុផលមួយចំនួនដែលខ្ញុំបង្កើតកម្មវិធីនេះឡើង។ ទី១. ខ្ញុំមើលឃើញថារយៈពេលប៉ុន្មានឆ្នាំចុងក្រោយនេះ យុវជនយើងកាន់តែច្រើនទៅៗបានបញ្ចេញមតិយោបល់អំពីស្ថានភាពនានាក្នុងសង្គមរបស់តាមបណ្តាញសង្គម និងតាមទម្រង់ផ្សេងៗ ប៉ុន្តែពេលខ្លះការបញ្ចេញគំនិត ឬយោបល់ទាំងនោះ មានចំណុចខ្វះខាត គឺខ្វះការគិត ការស្រាវជ្រាវ វិភាគ និងការទទួលខុសត្រូវ ពិសេសគឺការប្រើភាសាមិនសមរម្យ អសុរោះ ដែលនាំឲ្យបាត់សាមគ្គីភាព។ ទី២ ខ្ញុំចង់ឃើញសង្គមខ្មែរ ជាពិសេសយុវជនជំនាន់នេះ មានចំណេះដឹងជាមូលដ្ឋាន និងមានស្មារតីសាមគ្គីភាព និងចង់បណ្តុះគំនិតវិជ្ជមានក្នុងសង្គម ដើម្បីឲ្យពួកគាត់អាចរស់នៅជាមួយគ្នា ក្នុងភាពផ្សេងគ្នា និងចម្រុះគ្នានៃគំនិត និងការយល់ឃើញប្រកបដោយសីលធម៌ គុណធម៌ និងការទទួលខុសត្រូវខ្ពស់។ ទី៣ យើងចង់ផ្តល់ឱកាសដល់យុវជនដែលសមត្ថភាព អាចប្រើប្រាស់ គំនិត ទស្សនៈ សមត្ថភាព និងបទពិសោធរបស់ខ្លួន ចែករំលែកទៅកាន់យុវជនដូចគ្នា ក៏ដូចជាសង្គមទាំងមូល តាមរយៈការជជែកដេញដោល លើស្ថានភាព ឬវិស័យនានា ក្នុងគោលដៅផ្ញើសារជូនសាធារណជន ជាពិសេស ស្ថាប័ន ឬអង្គភាពដែលពាក់ព័ន្ធក្នុងកិច្ចអភិវឌ្ឍជាតិ បង្កើនការយកចិត្តទុកដាក់ លើការអនុវត្តគោលនយោបាយជាតិ និងសង្គម។
លោក ទីន សុខលីម៖ តើអ្វីជាលទ្ធផលនៃការរៀបចំរដូវកាលលើកទី១? ដោយឡែកសម្រាប់ការរៀបចំ« The Perspectives Cambodia » រដូវកាលលើកទី២នេះ នឹងមានអ្វីខ្លះខុសប្លែកពីឆ្នាំមុន?
លោក ហួ តុលា៖ លទ្ធផលធំ២ ក្នុងរដូវកាលទី១ ដែលយើងទទួលបាន គឺទី១យើងជាកូនខ្មែរ អាចបង្កើតឲ្យមានវេទិកាសង្គមដ៏ធំមួយ និងបានកសាង បណ្តុះសមត្ថភាពយុវជនកម្ពុជាដែលឆ្នើម មានក្លាហាន និងស័ក្តិសមជាអ្នកបន្តវេន ជាអនាគតអ្នកដឹកនាំដ៏ល្អសម្រាប់ជាតិយើងជាច្រើនរូប។ ទី២ យើងទទួលបានការគាំទ្រ និងចូលរួមឧបត្ថម្ភពីក្រសួងអប់រំ យុវជន និងកីឡា ក្រុមហ៊ុនឯកជន ជាពិសេសពីសំណាក់យុវជន និងមហាជន ដែលជាកត្តាជំរុញលើកទឹកចិត្តក្រុមការងារ ឲ្យបន្តខិតខំប្រឹងប្រែងបន្ថែម ក្នុងដំណើរបេសកកម្មរបស់ខ្លួន រៀបចំកម្មវិធីរដូវកាលទី២នេះឲ្យកាន់តែល្អ និងមានប្រយោជន៍សម្រាប់យុវជន និងសង្គមជាតិ។ ដោយឡែក រដូវកាលទី២នេះ យើងមានកម្មវិធីថ្មីប្លែក១ទៀត គឺ The Perspectives Cambodia Talk ដែលបន្ថែមលើកម្មវិធី២ដែលមានស្រាប់។ កម្មវិធី The Perspectives Cambodia Talk នឹងត្រូវបង្ហាញខ្លួន ជាមួយនឹងការរៀបចំទម្រង់ទៅតាមបទដ្ឋានតំបន់ និងពិភពលោក ដែលបេក្ខជន ក៏ដូចជាយុវជនទូទៅ នឹងទទួលបានចំណេះដឹង បទពិសោធល្អៗបន្ថែមទៀត ពីវាគ្មិនជំនាញតាមវិស័យនានា។
លោក ទីន សុខលីម៖ តើបេក្ខជនត្រូវបំពេញលក្ខខណ្ឌអ្វីខ្លះ សម្រាប់ដាក់ពាក្យប្រកួតកម្មវិធីនេះ?
លោក ហួ តុលា៖ បេក្ខជនត្រូវមានសញ្ជាតិខ្មែរ និងមានអាយុចន្លោះ ១៨ដល់២៥ឆ្នាំ មកពីស្ថាប័នសិក្សារដ្ឋ ឬឯកជន។ បេក្ខជនត្រូវគោរព និងអនុវត្តតាមលក្ខខណ្ឌកម្មវិធី ដោយប្រកាន់ខ្ជាប់នូវសីលធម៌ សុជីវធម៌ល្អ និងសេចក្តីថ្លៃថ្នូរ និងត្រូវមានឆន្ទៈខ្ពស់ និងមានស្មារតីចូលរួមជួយសង្គមជាតិពិតប្រាកដ មានសេចក្តីក្លាហាន ភាពជឿជាក់ និងសាមគ្គីភាព។
លោក ទីន សុខលីម៖ តើគម្រោងនេះ មានកម្មវិធីសំខាន់អ្វីខ្លះ?
លោក ហួ តុលា៖ ដំបូងយើងនឹងផ្សព្វផ្សាយតាមបណ្តាសកលវិទ្យានានាក្នុងរាជធានីភ្នំពេញ ដោយជ្រើសរើសយកបេក្ខជន តែ៨០នាក់ប៉ុណ្ណោះ។ បន្ទាប់មកយើងមានកម្មវិធីតម្រង់ទិស ការបណ្តុះបណ្តាលបច្ចេកទេសជជែកពិភាក្សា ការនិយាយជាសាធារណៈ និងការងារក្រុម មានកម្មវិធីបោះជំរំចិត្ត ជំរំកាយ និងជំរំសាមគ្គី រួចហើយជាកម្មវិធី The Perspectives Cambodia Talk មុននឹងឈានដល់ការប្រកួតជម្រុះ រហូតដល់វគ្គផ្តាច់ព្រ័ត្រ។
លោក ទីន សុខលីម៖ បេក្ខជនដែលបានចូលរួមការប្រកួតនេះ នឹងទទួលបានអត្ថប្រយោជន៍អ្វីខ្លះ?
លោក ហួ តុលា៖ អត្ថប្រយោជន៍ដែលបេក្ខជននឹងទទួលបាន មានធំៗ៣។ ទី១ មានទំនុកចិត្ត ភាពក្លាហាន សេចក្តីថ្លៃថ្នូរ សាមគ្គីភាព និងសីលធម៌ស័ក្កិសមជាអ្នកបន្តវេន និងជាអនាគតអ្នកដឹកនាំដ៏ល្អ។ ទី២ សមត្ថភាព និងបទពិសោធលើជំនាញតស៊ូមតិ ការនិយាយជាសាធារណៈកើនឡើង ជាមួយនឹងការសិក្សាស្រាវជ្រាវ វិភាគ ស្វែងយល់ពីមូលដ្ឋាននៃដំណោះស្រាយទៅលើបញ្ហានានាក្នុងសង្គម ពិសេស បណ្តុះផ្នត់គំនិតវិជ្ជមានក្នុងការរស់នៅជាមួយគ្នា ក្នុងភាពផ្សេងគ្នា និងចម្រុះគ្នានៃគំនិតប្រកបដោយភាពត្រឹមត្រូវ។ ទី៣ ក្លាយជ័យលាភីរបស់កម្មវិធីជាមួយនឹងរង្វាន់ពិសេសៗ ក្លាយជានិមិត្តរូប និងការទទួលបានឱកាសជាច្រើនផងដែរ។
លោក ទីន សុខលីម៖ តើលោកមានការរំពឹងទុកបែបណា ចំពោះកម្មវិធីនេះ?
លោក ហួ តុលា៖ ការរំពឹងទុករបស់យើង ក៏ដូចជាក្រុមប្រឹក្សាភិបាល ក្រុមការងាររៀបចំយុវជនស្ម័គ្រចិត្តទាំងអស់ រំពឹងថាយុវជន នឹងទទួលបានភាពជោគជ័យ ក្នុងការកសាងទំនុកចិត្ត ការជឿជាក់ និងបង្កើន សមត្ថភាពរបស់ខ្លួន ដើម្បីឆ្លើយតបទៅនឹងតម្រូវការ និងការរីកចម្រើនរបស់ប្រទេសជាតិ ស្របតាមការរីកចម្រើនក្នុងតំបន់ និងពិភពលោក។ ម្យ៉ាងទៀត ខ្ញុំសង្ឃឹមថា សង្គមខ្មែរ ពិសេសយុវជនជំនាន់នេះ មានចំណេះដឹង និងមានស្មារតីសាមគ្គីភាព ក៏ដូចជាសង្ឃឹមថាកម្មវិធីនេះ នឹងកាន់តែទទួលបានការសហការគាំទ្រកាន់តែច្រើន ដើម្បីជាការរួមចំណែកពង្រឹងសមត្ថភាព និងបទពិសោធន៍របស់យុវជនកម្ពុជា៕