អន្តរជាតិ
នយោបាយអន្តរជាតិ
រុស្ស៊ីថ្កោលទោសអាមេរិកដែលត្រៀមបំពាក់អាវុធឲ្យអ៊ុយក្រែនដើម្បីកម្ចាត់ក្រុមឧទ្ទាមភាគខាងកើត
× រដ្ឋាភិបាលរុស្ស៊ីបានថ្កោលទោសអាមេរិកដែលចង់បំពាក់អាវុធអ៊ុយក្រែនដើម្បីបន្តប្រយុទ្ធប្រឆាំងក្រុមឧទ្ទាមនៅភាគខាងកើតដែលលោកខាងលិចចោទថា ជាក្រុមដែលគាំទ្រដោយរុស្ស៊ីនោះ។ ម៉ូស្គូជឿជាក់ថា ការផ្តល់អាវុធបន្ថែមជាការជំរុញឲ្យមានការប្រើប្រាស់កម្លាំង និងបង្កសង្គ្រាមបង្ហូរឈាមគ្នាកាន់តែខ្លាំងថែមទៀតនៅពេលខាងមុខ។
កាលពីថ្ងៃសុក្រទី ២២ ខែធ្នូ ក្រសួងការបរទេសអាមេរិកបានប្រកាសថា សហរដ្ឋអាមេរិកមានបំណងផ្តល់សពា្វវុធដល់រដ្ឋាភិបាលអ៊ុយក្រែនដើម្បីពង្រឹងសមត្ថភាពការពារជាតិ ស្របពេលដែលប្រទេសនេះកំពុងបន្តប្រឈមចលនាផ្តាច់ខ្លួនភាគខាងកើតនោះ។ ការប្រកាសនេះត្រូវបានរុស្ស៊ីថ្កោលទោសខ្លាំងផងដែរ។
យោងតាមទីភ្នាក់ងារព័ត៌មាន AFP អនុរដ្ឋមន្ត្រីការបរទេសរុស្ស៊ី Grigory Karasin បានចាត់ទុកការផ្គត់ផ្គង់អាវុធរបស់អាមេរិកឲ្យអ៊ុយក្រែនជារឿងអាក្រក់បំផុតមួយព្រោះវាប្រៀបបានដូចជាជំរុញឲ្យអ៊ុយក្រែនប្រើប្រាស់កម្លាំងបន្ថែមដើម្បីធ្វើសង្គ្រាមដូច្នេះដែរ។ មន្ត្រីជាន់ខ្ពស់រូបនេះសង្កត់ធ្ងន់ថា អ៊ុយក្រែននឹងមិនរារែកក្នុងការប្រើកម្លាំងបាយឡើយ ហើយវាក៏បំផ្លាញដំណើរការកសាងសន្តិភាពដែលមានចែងក្នុងកិច្ចព្រមព្រៀងសន្តិភាពទីក្រុង Minsk ដែលចូលជាធរមានដើមឆ្នាំ ២០១៥ផងដែរ។
ដោយឡែកសមាជិកព្រឹទ្ធសភារុស្ស៊ី Franz Klintsevich ដែលជាសមាជិកគណៈកម្មការធិការសន្តិសុខសភាផងនោះបានលើកឡើងថា អ៊ុយក្រែននឹងឈានទៅប្រើកម្លាំងធ្វើសង្គ្រាម ដោយសារការគាំទ្រផ្នែកសព្វាវុធពីក្រុងវ៉ាស៊ីនតោនបែបនេះនោះ។
ត្រឡប់មកផ្តោតលើបញ្ហាអាវុធវិញ។ បើសិនជាសភាអាមេរិកយល់ព្រម សព្វាវុធច្រើនប្រភេទនឹងត្រូវផ្តល់ឲ្យរដ្ឋាភិបាលអ៊ុយក្រែនដើម្បីពង្រឹងវិស័យការពារជាតិរបស់ខ្លួននៅពេលខាងមុខ។ ក្នុងចំណោមអាវុធទាំងនោះមានកាំភ្លើងប្រឆាំងរថក្រោះ ដែលវាជាប្រភេទអាវុធដែលអ៊ុយក្រែនសុំទិញពីអាមេរិកតាំងពីពេលសង្គ្រាមផ្ទុះឡើងនៅឆ្នាំ ២០១៤មកម្ល៉េះ។ កន្លងមកអាមេរិកផ្តល់ការហ្វឹកហ្វឺនដល់កងទ័ពអ៊ុយក្រែន និងជួយផ្តល់ជំនួយជាសម្ភារយោធាធម្មតាប៉ុណ្ណោះ ហើយអ៊ុយក្រែនត្រូវទិញអាវុធពីក្រុមហ៊ុនឯកជនរបស់អាមេរិក បើសិនជាខ្លួនចង់ប្រើប្រាស់នោះ។
បើគិតមកដល់បច្ចុប្បន្ន សង្គ្រាមភាគខាងកើតប្រទេសអ៊ុយក្រែនដែលជាការប្រយុទ្ធគ្នារវាងក្រុមគាំទ្ររុស្ស៊ីនិងកម្លាំងរដ្ឋាភិបាលនោះបានអូសបន្លាយជាងបីឆ្នាំមកហើយ។ មនុស្សយ៉ាងហោចណាស់ មួយម៉ឺននាក់បានស្លាប់ ខណៈមនុស្ស១,៧លាននាក់ផ្សេងទៀតនោះបានរត់ភៀសខ្លួនផងដែរ។ បើតាមរបាយការណ៍អង្គការសហប្រតិបត្តិការនិងសន្តិសុខអឺរ៉ុប ក្នុងចន្លោះពីខែមករាដល់ខែវិច្ឆិកាឆ្នាំ ២០១៧នេះ មនុស្សយ៉ាងហោចណាស់៤៥០នាក់បានស្លាប់ក្នុងសង្គ្រាមនេះ៕
Tag:
អ៊ុយក្រែន
រុស្ស៊ី
អាមេរិក
© រក្សាសិទ្ធិដោយ thmeythmey.com