អន្តរជាតិ
ត្រាំ ខកចិត្ត ដ្បិតចិនបន្តនាំចូលប្រេងទៅកូរ៉េខាងជើង ប្រធានាធិបតីចិន ស៊ី ជីនភីង អមដំណើរសមភាគីអាមេរិក ដូណាល់ ត្រាំ (រូបភាព៖ Xinhua)
× ប្រធានាធិបតីអាមេរិក ដូណាល់ ត្រាំ បានបង្ហាញការខកចិត្តខ្លាំងចំពោះចិន ដែលលោកអះអាងថា បន្តនាំចូលប្រេងទៅកាន់កូរ៉េខាងជើង ផ្ទុយពីដំណោះស្រាយរបស់ក្រុមប្រឹក្សាសន្តិសុខសំដៅកាត់ផ្ដាច់ការផ្គត់ផ្គង់ប្រេងរបស់ប្រទេសនេះ។ ទង្វើបែបនេះរបស់ចិន នឹងក្លាយជាឧបសគ្គក្នុងការដោះស្រាយវិបត្តិនុយក្លេអ៊ែរនៅឧបទ្វីបកូរ៉េមិនខាន។ នេះបើតាមការសំណេរលើបណ្ដាញសង្គម Twitter របស់លោក ត្រាំ ។
ការផ្ដាច់ការនាំចូលប្រេងទៅកាន់កូរ៉េខាងជើង គឺជាវិធានការធ្ងន់មួយរបស់ក្រុមប្រឹក្សាសន្តិសុខក្នុងការបង្ខំឲ្យកូរ៉េខាងជើងបោះបង់មហិច្ឆតាអភិវឌ្ឍនុយក្លេអ៊ែរ និងងាកចូលតុចរចាជាមួយគេឯងវិញ។ ប៉ុន្តែវិធានការមួយនេះ ត្រូវគេមើលឃើញថា មិនសូវមានប្រសិទ្ធភាពឡើយ ព្រោះគេឃើញមានការនាំចូលប្រេងខុសច្បាប់ទៅកាន់កូរ៉េខាងជើងដដែល។ ប្រធានាធិបតីអាមេរិក ដូណាល់ ត្រាំ បានចង្អុលមុខចិនចំៗតែម្ដងចំពោះរឿងនេះ។
«ចាប់បាននៅហ្នឹងកន្លែង។ ពិតជាខកចិត្តខ្លាំងណាស់ដែលចិនបន្តអនុញ្ញាតឲ្យប្រេងហូរចូលកូរ៉េខាងជើង។ ដំណោះស្រាយល្អប្រសើរមួយនឹងមិនអាចកើតឡើងទេ បើសកម្មភាពនេះបន្តទៀត»។ នេះសំណេររបៀបអន់ចិត្តនៅលើ Twitter របស់ប្រធានាធិបតីអាមេរិកនៅថ្ងៃទី ២៨ ខែធ្នូ។
នៅក្នុងសប្ដាហ៍នេះ ប្រព័ន្ធផ្សព្វផ្សាយកូរ៉េខាងត្បូងបានស្រង់ប្រភពមន្ត្រីរដ្ឋាភិបាលថា ផ្កាយរណបរបស់អាមេរិកចាប់បានសញ្ញាកប៉ាល់ចិនបានផ្ទេរប្រេងរាប់សិបតោនទៅឲ្យកប៉ាល់កូរ៉េខាងជើង។ ទោះជាព័ត៌មានលម្អិតមិនអាចបញ្ជាក់ឲ្យបានច្បាស់ក្ដី មន្ត្រីក្រុងវ៉ាស៊ីនតោនអះអាងថា សកម្មភាពនៃកប៉ាល់ចិនអាចកើតមានមែន។ ខាងក្រុងប៉េកាំងឯណេះវិញបានចេញមកបកស្រាយហើយថា កប៉ាល់ខ្លួនមិនបានបំពានដំណោះស្រាយរបស់ក្រុមប្រឹក្សាសន្តិសុខឡើយ។
កាលពីសប្ដាហ៍មុន ក្រុមប្រឹក្សាសន្តិសុខបានអនុម័តទណ្ឌកម្មថ្មីមួយទៀតលើកូរ៉េខាងជើង ដែលមានគោលដៅរឹតត្បិតបរិមាណប្រេងឆៅ និងប្រេងចម្រាញ់រួចរបស់កូរ៉េខាងជើង។ រដ្ឋបាលក្រុងវ៉ាស៊ីនតោនជាអ្នកស្នើទណ្ឌកម្មលើកនេះ ដើម្បីឆ្លើយតបទៅនឹងការប្រឹងប្រែងរបស់ក្រុងព្យុងយ៉ាងក្នុងការផលិតមីស៊ីលបាលីស្ទិកដែលអាចបាញ់ដល់ទឹកដីអាមេរិក។ ក្រុងវ៉ាស៊ីនតោនក៏ទទូចឲ្យក្រុងប៉េកាំងចូលរួមអនុវត្តទណ្ឌកម្មឲ្យពេញលេញផងដែរ ព្រោះជាសម្ព័ន្ធមិត្តជិតស្និទ្ធរបស់ព្យុងយ៉ាង។
ចំណែកឯចិនវិញ ក៏បាននិយាយម្ដងហើយម្ដងទៀតថា ខ្លួនកំពុងអនុវត្តដំណោះស្រាយរបស់ក្រុមប្រឹក្សាសន្តិសុខយ៉ាងយកចិត្តទុកដាក់ តែអាមេរិក ជប៉ុន និងកូរ៉េខាងត្បូងសង្ស័យថា ចន្លោះប្រហោងនៅតែមាន។ ជុំវិញរឿងនាំចូលប្រេងខុសច្បាប់ទៅកូរ៉េខាងជើង អ្នកនាំពាក្យក្រសួងការពារជាតិចិនម្នាក់លើកឡើងថា ករណីបែបនេះមិនមានកើតឡើងទេ ហើយទាំងរដ្ឋាភិបាលស៊ីវិល ទាំងយោធាចិនសុទ្ធតែគោរពការសម្រេចចិត្តរបស់ក្រុមប្រឹក្សាសន្តិសុខរហូត៕
Tag:
អាមេរិក
ចិន
កូរ៉េខាងជើង
ដូណាល់ ត្រាំ
© រក្សាសិទ្ធិដោយ thmeythmey.com