លោក សំ វ៉ាន់ដេត ព្យាយាមទប់ស្កាត់ជម្លោះលើទីលាន និងអប់រំកីឡាករពីបញ្ហានេះ

កីឡាជាតិ

ជាតិ

លោក សំ វ៉ាន់ដេត ព្យាយាមទប់ស្កាត់ជម្លោះលើទីលាន និងអប់រំកីឡាករពីបញ្ហានេះ

30, Dec 2017 , 7:19 pm

រូបភាព

ដោយ:

គ្រូបង្វឹកក្រុមព្រះខ័នរាជស្វាយរៀងលោក សំ វ៉ាន់ដេត បានបញ្ជាក់ថា លោកនឹងព្យាយាមកាត់បន្ថយបញ្ហាជម្លោះនៅលើទីលានក្នុងអំឡុងពេលប្រកួត ដើម្បីសម្របខ្លួនឲ្យស្របតាមសម័យបាល់ទាត់បែបទំនើប។ ក្រៅពីកាត់បន្ថយកំហឹងខ្លួនឯង គ្រូបង្វឹករូបនេះអះអាងថា លោកនឹងពង្រឹងផ្នែកវិន័យ ក៏ដូចជាអប់រំកីឡាករឲ្យចៀសវាងមានបញ្ហានៅលើទីលានប្រកួត។

សូមស្តាប់សំឡេង៖

ការប៉ះទង្គិចគ្នាតិចតួចនៅលើទីលានប្រកួតរបស់កីឡាករត្រូវបានលោក សំ វ៉ាន់ដេត ចាត់ទុកវាជារឿងធម្មតាសម្រាប់វិស័យកីឡាបាល់ទាត់។ តែអ្វីដែលជាបញ្ហានោះ គឺការប្រើអំពើហិង្សាដោយចេតនារបស់កីឡាករ គ្រូបង្វឹក និងសមាជិកក្លិប ដែលអាចឈានដល់ការរងពិន័យផ្សេងៗពីសហព័ន្ធកីឡាបាល់ទាត់ និងក្លិបសាមី។

«កីឡាបាល់ទាត់មិនមែនជាកីឡាប្រដាល់នោះទេ ការលេងបាល់ទាត់តែងតែមានការប៉ះទង្គិចគ្រាន់តែថា ភាពច្រឡោត និងភាពឆេវឆៅតែងតែមាននៅលើទីលាន តែបើយើងអាចគ្រប់គ្រងស្ថានការណ៍នេះបានកាន់តែល្អ។ ខ្ញុំនឹងព្យាយាមឈប់មានបញ្ហានៅលើទីលាន ហើយខ្ញុំនឹងព្យាយាមអប់រំកីឡាករពីបញ្ហានេះ និងបញ្ជ្រាបចំណេះដឹងពីបាល់ទាត់ទំនើបដល់ពួកគាត់»។ នេះជាការលើកឡើងរបស់គ្រូបង្វឹកក្រុមព្រះខ័នរាជស្វាយរៀង លោក សំ វ៉ាន់ដេត ក្នុងសន្និសីទសារព័ត៌មានក្រោយការប្រកួតជាមួយក្រុមណាហ្គាវើលក្នុងវគ្គផ្តាច់ព្រ័ត្រពានរង្វាន់សម្តេច ហ៊ុន សែន ប្រចាំឆ្នាំ២០១៧។

ទន្ទឹមនេះលោក សំ វ៉ាន់ដេត ក៏បានចាត់ទុកការប៉ះទង្គិចរវាងក្រុមព្រះខ័នរាជស្វាយរៀងជាមួយក្រុមណាហ្គាវើលដែលបណ្តាលឲ្យកីឡាករ សុក សំណាង រងរបួសបាក់ក្តោងច្រមុះជារឿងធម្មតាផងដែរ។ ពោលគឺកំហុសនេះកើតចេញពីអចេតនារបស់កីឡាករមិនមានអ្នកណាម្នាក់ចង់ឲ្យបញ្ហានេះកើតឡើងនោះទេ។

ខ្សែប្រយុទ្ធព្រះខ័នរាជស្វាយរៀង សុក សំណាង ត្រូវបានបញ្ជូនទៅពិនិត្យនិងព្យាបាលភ្លាមៗនៅមន្ទីរពេទ្យកាល់ម៉ែត្រក្រោយប៉ះទង្គិចជាមួយកីឡាករណាហ្គាវើលដែលបណ្តាលឲ្យរងរបួសបាក់ក្តោងច្រមុះ។ កីឡាករ សុក សំណាង បានរកគ្រាប់បាល់ពីរគ្រាប់មុនកីឡាករ ហួយ ផល្លីន រកបានមួយគ្រាប់បន្ថែម ដើម្បីជួយឲ្យក្រុមព្រះខ័នរាជស្វាយរៀងឈ្នះពានសម្តេច ហ៊ុន សែន ប្រចាំឆ្នាំ២០១៧ ជាមួយជ័យជម្នះ ៣-០ លើក្រុមណាហ្គាវើល៕