កីឡាជាតិ
ជាតិ
បឹងកេតរក្សាតំណែងជើងឯកលីគកំពូល ក្រោយលទ្ធផលប៉េណាល់ទី ១០-៩
× បឹងកេតរក្សាតំណែងជើងឯកក្របខណ្ឌមិត្តហ្វូនខេមបូឌានលីក ក្រោយឈ្នះក្រសួងការពារជាតិ ដោយគ្រាប់បាល់ប៉េណាល់ទីសម្រេចក្តីក្នុងជំនួបវគ្គផ្តាច់ព្រ័ត្រដ៏រកាំរកូស និងតឹងតែងនាល្ងាចថ្ងៃសៅរ៍ ទី៣០ ខែធ្នូ នៅពហុកីឡដ្ឋានជាតិអូឡាំពិក។ សុខ សុវណ្ណ បានស៊ុតបាល់បញ្ចូលទីនាំមុខសម្រាប់បឹងកេតនៅនាទី១៤ ហើយ Kim Kyong-hun តាមស្មើ ១-១ នៅតង់ទីពីរ។ ការបន្ថែមម៉ោង១៥នាទីពីរដងគ្មានការស៊ុតបាល់បញ្ចូលទីឡើយ ដែលនាំឲ្យមានការទាត់បាល់ប៉េណាល់ទីសម្រេចក្តី។
ទីបំផុត បានយកឈ្នះក្នុងលទ្ធផល ១០-៩ ក្រោយការស៊ុតម្ខាង១៣គ្រាប់រៀងៗខ្លួន។
ការប្រកួតដែលមានអ្នកទស្សនាសរុបជាង៤០០០នាក់ ត្រូវបានពន្យាពេលរហូតដល់ទៅ៤៥នាទី ដោយសារតែបឹងកេត តវ៉ាចំពោះការអនុញ្ញាតឲ្យកីឡាករពីររូបរបស់ក្រសួងការពារជាតិមានឈ្មោះក្នុងបញ្ជី។ តាមលិខិតដែលចុះហត្ថលេខានៅថ្ងៃទី២៨ ខែធ្នូ លោក ម៉ៃ តុលា អគ្គលេខាធិការស្តីទីសហព័ន្ធកីឡាបាល់ទាត់កម្ពុជា (FFC) បានប្រាប់ទៅក្រុមក្រសួងការពារជាតិថា ខ្សែប្រយុទ្ធកូរ៉េខាងជើង Choe Myong-ho និងខ្សែការពារ រឿម ចាន់រឿន មិនអាចលេងនៅវគ្គផ្តាច់ព្រ័ត្រឡើយ ដោយសារតែពួកគេទទួលបានកាតលឿងជាប់ៗ នាការប្រកួតពីរលើកចុងក្រោយជាមួយអគ្គិសនីកម្ពុជា និងព្រះខ័នរាជស្វាយរៀង។
ប៉ុន្តែមួយថ្ងៃក្រោយមក លោក ឆាំង ពិសិដ្ឋ លេខាប្រតិបត្តិនៃគណៈកម្មការប្រកួតបាល់ទាត់កម្ពុជា (CNCC) បានចេញសេចក្តីជូនដំណឹងទៅក្លិបទាំងពីរ អំពីការលុបចោលកាតលឿងចំនួន១ពីការប្រកួតសន្សំពិន្ទុក្នុងប្រព័ន្ធលីគ ដែលជាការអនុវត្តន៍តាមអនុសាសន៍របស់ប្រធានសហព័ន្ធ។ គោលបំណងដ៏សំខាន់គឺដើម្បីទាក់ទាញការចាប់អារម្មណ៍ពីសំណាក់ទស្សនិកជន។
ដោយសារតែឃើញ Choe Myong-ho ស្ថិតក្នុងជម្រើសដំបូង ហើយ រឿម ចាន់រឿន ស្ថិតក្នុងចំណោមកីឡាករបម្រុង ថ្នាក់ដឹកនាំបឹងកេតបានធ្វើការតវ៉ា ដែលនាំឲ្យមានការពន្យាពេលរហូតដល់ទៅ៤៥នាទី មុនពេលដែលពួកគេសម្រេចចូលកាន់ទីលានវិញ។
ទោះបីជាយ៉ាងណា ការប្រកួតបានដំណើរការធម្មតា ដោយក្នុងជំនួប១២០នាទី បញ្ចប់ក្នុងលទ្ធផលស្មើ ១-១។ ឈានដល់ការទាត់បាល់ប៉េណាល់ទី ក្រុមទាំងពីរ បានស៊ុតម្ខាង១៣គ្រាប់រៀងខ្លួន ហើយការស៊ុតចុងខុសគោលដៅរបស់ Choe Myong-ho នាំឲ្យបឹងកេតទទួលជ័យជម្នះក្នុងលទ្ធផល ១០ ទល់នឹង៩ ៕
Tag:
Cambodian League 2017
បឹងកេត
ការពារជាតិ
© រក្សាសិទ្ធិដោយ thmeythmey.com