ជាតិ
ឆ្នាំ២០១៧ កម្ពុជាមានព្រះសង្ឃជិត៧ម៉ឺនអង្គ និងវត្តជិត៥ពាន់ រូបភាព៖ មន្រ្តីសង្ឃទូទាំងប្រទេស ចូលរួមក្នុងអនុសំវច្ឆរមហាសន្និបាតលើកទី២៦ កាលពីថ្ងៃទី១៤ ខែធ្នូ ឆ្នាំ២០១៧
× នាពេលបច្ចុប្បន្ន ប្រទេសកម្ពុជា មានព្រះសង្ឃចំនួន ៦៩១៩៩អង្គ ក្នុងនោះគណៈមហានិកាយ មានចំនួន ៦៤៤០៧អង្គ ហើយគណៈធម្មយុត្តិកនិកាយមានចំនួន ៤៧៩២អង្គ។ រីឯ វត្តមានចំនួន ៤៨៧២ ក្នុងនោះវត្តខាងគណៈមហានិកាយ មានចំនួន ៤៦៥៦ និងវត្តខាងគណៈធម្មយុត្តិកនិកាយ មានចំនួន ២១៦។
ចំណែក វិស័យអប់រំផ្នែកព្រះពុទ្ធសាសនា មានតាំងពីថ្នាក់ពុទ្ធិកបឋមសិក្សា រហូតដល់ថ្នាក់ពុទ្ធិកឧត្តមសិក្សា។ ពុទ្ធិកបឋមសិក្សាមានជាង៧រយ ពុទ្ធិកអនុវិទ្យាល័យមានប្រមាណ៤០ ពុទ្ធិកវិទ្យាល័យមានជិត២០ និងពុទ្ធិកសាកលវិទ្យាល័យមានចំនួន៣។
ពុទ្ធិកសិក្សា គឺជាសាលាសម្រាប់អប់រំនិងបណ្តុះបណ្តាលព្រះសង្ឃក្នុងព្រះពុទ្ធសាសនា។ វិស័យអប់រំផ្នែកពុទ្ធចក្រនេះ មានលក្ខណៈ និងប្រព័ន្ធដូចវិស័យអប់រំខាងអាណាចក្រ ពោលគឺ ពុទ្ធិកបឋមសិក្សា, ពុទ្ធិកអនុវិទ្យាល័យ, ពុទ្ធិកវិទ្យាល័យ, និងពុទ្ធិកសាកលវិទ្យាល័យ ស្មើនឹងបឋមសិក្សា, អនុវិទ្យាល័យ, វិទ្យាល័យ, សាលកវិទ្យាល័យ ខាងគ្រហស្ថដែរ។ ប៉ុន្តែអ្វីដែលខុសប្លែកនោះគឺ កម្រិតបឋមសិក្សាខាងព្រះសង្ឃ គឺសិក្សាតែរយៈពេល៣ឆ្នាំប៉ុណ្ណោះ ចំណែកខាងគ្រហស្ថវិញ ត្រូវសិក្សារយៈពេល ៦ឆ្នាំ។ ម្យ៉ាងទៀត ប្រព័ន្ធអប់រំខាងព្រះសង្ឃ មានមុខវិទ្យាច្រើនជាងគ្រហស្ថមួយចំនួន ដូចភាសាបាលី ភាសាសំស្ក្រឹត និងមុខវិទ្យាផ្នែកសាសនា ជាដើម។
ទិន្នន័យខាងលើ ស្តីពីចំនួនព្រះសង្ឃ វត្តអារាម និងសាលារៀនផ្នែកពុទ្ធចក្រ ត្រូវបានផ្សព្វផ្សាយ ក្នុងអនុសំវច្ឆរមហាសន្និបាតលើកទី២៦ កាលពីថ្ងៃទី១៤ ខែធ្នូ ឆ្នាំ២០១៧។ អនុសំវច្ចរមហាសន្និបាត គឺសំដៅដល់កិច្ចប្រជុំរបស់ព្រះសង្ឃទូទាំងប្រទេស ដែលតែងតែត្រូវបានរៀបចំឡើងជារៀលរាល់ឆ្នាំ៕
© រក្សាសិទ្ធិដោយ thmeythmey.com