ពាក្យ«រួមគ្នាដើម្បីបាល់ទាត់»ធ្វើឲ្យបឹងកេតដែលគ្រោងបោះបង់ការប្រកួតព្រមចូលទីលានប្រកួត

កីឡាជាតិ

ជាតិ

ពាក្យ«រួមគ្នាដើម្បីបាល់ទាត់»ធ្វើឲ្យបឹងកេតដែលគ្រោងបោះបង់ការប្រកួតព្រមចូលទីលានប្រកួត

01, Jan 2018 , 2:20 pm

រូបភាព

លោក បែ មករា លើកពានក្របខណ្ឌមិត្តហ្វូនខេមបូឌានលីគឆ្នាំ២០១៧

ដោយ:

ក្រុមការពារតំណែងជើងឯកបឹងកេតបានដើរចេញពីលានប្រកួត ក្រោយមិនពេញចិត្តនឹងការសម្រេចរបស់គណៈកម្មការប្រកួតបាល់ទាត់ជាតិកម្ពុជាដែលអនុញ្ញាតឲ្យកីឡាករជាប់ពិន័យពីររូបរបស់ក្រសួងការពារជាតិមានក្នុងបញ្ជីប្រកួត។ ប៉ុន្តែពាក្យ៦ម៉ាត់របស់ថ្នាក់ដឹកនាំ«រួមគ្នាដើម្បីបាល់ទាត់»បឹងកេតបានសម្រេចដើរចូលទីលានប្រកួតវិញ។ បឹងកេតបន្តរក្សាតំណែងជើងឯកពានរង្វាន់ក្របខណ្ឌលីកកំពូលកម្ពុជាក្រោយយកឈ្នះទ័ពដោយបាល់ប៉េណាល់ទី ១០-៩ ក្នុងជំនួបវគ្គផ្តាច់ព្រ័ត្រដ៏រកាំរកូស។ ជ័យជម្នះមុខអ្នកគាំទ្រជាង៤ពាន់នាក់នៅពហុកីឡដ្ឋានជាតិនេះនាំឲ្យបឹងទទួលបានកៅអីសម្រាប់ពានរង្វាន់ AFC Cup 2018។

បើយោងតាមអ្នកចាត់ការទូទៅក្លិបបឹងកេត លោក បែ មករា ការដែលបឹងកេតសម្រេចចិត្តដើរចូលទីលានប្រកួតជាមួយក្រុមក្រសួងការពារជាតិវិញ ក៏ដោយសារតែពាក្យសម្របសម្រួល«រួមគ្នាដើម្បីបាល់ទាត់»របស់ថ្នាក់ដឹកនាំសហព័ន្ធកីឡាបាល់ទាត់កម្ពុជា។ ការសម្រេចភ្លាមៗរបស់គណៈកម្មការប្រកួតបាល់ទាត់ជាតិកម្ពុជា ក្នុងការអនុញ្ញាតឲ្យកីឡាករជាប់ពិន័យពីររូបមានក្នុងបញ្ជីរបស់ក្រុមទ័ពបានធ្វើក្រុមបឹងកេតមិនសប្បាយចិត្តរហូតដើរចេញពីលានប្រកួត។ បញ្ហារកាំរកូសនេះ បានធ្វើឲ្យការប្រកួតវគ្គផ្តាច់ព្រ័ត្រពានរង្វាន់ក្របខណ្ឌលីគកំពូលកម្ពុជាប្រចាំឆ្នាំ២០១៧ កាលពីថ្ងៃសៅរ៍ ទី៣០ ធ្នូ ដែលមានទស្សនិកជនជាង៥ពាន់នាក់នៅពហុកីឡដ្ឋានជាតិពន្យាពេលរហូត៤៥នាទី។

«ដំបូងគណៈកម្មការរៀបចំការប្រកួតបានចេញលិខិតផ្អាកកីឡាករពីររូបដែលទទួលបានកាតលឿងពីរក្នុងការប្រកួតពីរផ្សេងគ្នា។ ប៉ុន្តែក្រោយមកមុនការប្រកួតប្រហែលជា៥ទៅ៦ម៉ោង គាត់(CNCC)បានផ្ញើ Email មកថា លុបការពិន័យរបស់កីឡាករទាំងពីរនាក់នេះវិញ ដូច្នេះធ្វើឲ្យពួកយើងមានការមិនសប្បាយចិត្ត ហើយត្រឡប់ទៅពិភាក្សាគ្នារកដំណោះស្រាយ ដើម្បីបន្តការប្រកួត។ ដោយសារប្រសាសន៍របស់ឯកឧត្តមប្រធានសហព័ន្ធក្នុងការរួបរួមគ្នាដើម្បីបាល់ទាត់ យើងក៏សុខចិត្តលេងវិញ»។ នេះជាហេតុផលរបស់លោក បែ មករា ដែលបឹងកេតសម្រេចដើរចូលទីលានប្រកួតវិញ។

តាមលិខិតដែលចុះហត្ថលេខាដោយ លោក ម៉ៃ តុលា អគ្គលេខាធិការស្តីទីសហព័ន្ធកីឡាបាល់ទាត់កម្ពុជា (FFC) កាលពីថ្ងៃទី២៨ ខែធ្នូ ខ្សែប្រយុទ្ធកូរ៉េខាងជើង Choe Myong-ho និងខ្សែការពារ រឿម ចាន់រឿន មិនអាចលេងនៅវគ្គផ្តាច់ព្រ័ត្រឡើយ ដោយសារតែពួកគេទទួលបានកាតលឿងពីរជាប់ៗ ពីរប្រកួតចុងក្រោយជាមួយអគ្គិសនីកម្ពុជា និងព្រះខ័នរាជស្វាយរៀង។

ប៉ុន្តែមួយថ្ងៃក្រោយមក លោក ឆាំង ពិសិដ្ឋ លេខាប្រតិបត្តិនៃគណៈកម្មការប្រកួតបាល់ទាត់កម្ពុជា (CNCC) បានចេញសេចក្តីជូនដំណឹងទៅក្លិបទាំងពីរអំពីការលុបចោលកាតលឿងចំនួន១ពីការប្រកួតសន្សំពិន្ទុក្នុងប្រព័ន្ធលីគ ដែលជាការអនុវត្តតាមអនុសាសន៍របស់ប្រធានសហព័ន្ធ។ គោលបំណងដ៏សំខាន់ គឺដើម្បីទាក់ទាញការចាប់អារម្មណ៍ពីសំណាក់ទស្សនិកជន។

ទោះបីមានការពន្យាពេលជិត១ម៉ោងក៏ដោយ តែការប្រកួតក្រោមភាពរកាំរកូសមួយនេះបានប្រព្រឹត្តទៅដោយរលូន ជាមួយការប្រកួតប្រជែងដ៏តានតឹង ដែលធ្វើឲ្យការប្រកួតទទួលបានការចាប់អារម្មណ៍ខ្លាំងពីអ្នកគាំទ្រជាង៤ពាន់នាក់ដែលមកទស្សនាផ្ទាល់នៅពហុកីឡដ្ឋានជាតិ។ កីឡករ សុខ សុវណ្ណ បានស៊ុតបាល់បញ្ចូលទីនាំមុខសម្រាប់បឹងកេតនៅនាទីទី១៤ មុនខ្សែការពារកូរ៉េខាងជើង Kim Kyong-hun រកគ្រាប់បាល់តាមស្មើ ១-១ សម្រាប់ក្រសួងការពារជាតិនៅនាទីទី៦៨។ ក្រុមទាំងពីរបានរក្សាលទ្ធផលនេះរហូតចប់ការប្រកួត១២០នាទី ដែលនាំឲ្យក្រុមទាំងពីរត្រូវស៊ុតបាល់ប៉េណាល់ទីដើម្បីកាត់សេចក្តី។

នាការស៊ុតបាល់ប៉េណាល់ទីកាត់សេចក្តីម្ខាង១៣នាក់ក្រុមបឹងកេតបានយកឈ្នះក្រុមក្រសួងការពារជាតិក្នុងលទ្ធផល ១០-៩ ក្រោយកីឡាករ ស៊ូ យ៉ាទី ជួយសង្គ្រោះគ្រាប់បាល់ចុងក្រោយរបស់កីឡាករ Choe Myong-ho បានសម្រេច។ ជ័យជម្នះពីការស៊ុតបាល់ប៉េណាល់ទីដោយស្វិតស្វាញនេះ មិនត្រឹមតែជួយឲ្យបឹងកេតអាចរក្សាតំណែងជើងឯកនោះទេ ថែមទាំងជួយក្រុមនេះទទួលបានកៅអីឡើងទៅលេងវគ្គ Group Stage នៃពានរង្វាន់ AFC Cup 2018 ដោយស្វ័យប្រវត្តិទៀតផង។

សម្រាប់ប្រាក់រង្វាន់លើកទឹកចិត្តក្រុមជើងឯកបឹងកេតទទួលបាន៦០លានរៀល ក្រសួងការពារជាតិបាន៤៦លានរៀល ក្រុមលេខ៣ស្វាយរៀងបាន៣៦លានរៀល និងក្រុមណាហ្គាវើលទទួលបាន៣០លានរៀល៕