ជាតិ
ប្រធានក្រុមប្រឹក្សាសហជីពជាតិកម្ពុជាថ្មី ស្នើឲ្យ EU និងសហរដ្ឋអាមេរិកយោគយល់ពីបញ្ហានៅកម្ពុជា
× ភ្នំពេញ៖ ប្រធានក្រុមប្រឹក្សាសហជីពជាតិកម្ពុជាថ្មី ស្នើឲ្យសហភាពអឺរ៉ុប (EU) និងសហរដ្ឋអាមេរិកយោគយល់ពីបញ្ហានៅកម្ពុជា ដោយងាកមកបន្តការទិញទំនិញបន្ថែម និងផ្ដល់កូតាផ្សេងៗ ដែលជាអត្ថប្រយោជន៍សម្រាប់ជួយដល់ការអភិវឌ្ឍប្រទេសកម្ពុជា។ ការអំពាវនាវរបស់ប្រធានក្រុមប្រឹក្សាសហជីពជាតិកម្ពុជានេះ ធ្វើឡើងក្រោយពីសហភាពអឺរ៉ុប និងសហរដ្ឋអាមេរិក ព្រមានដកការអនុគ្រោះពន្ធទូទៅដល់ទំនិញកម្ពុជា ដែលនាំចូលទីផ្សារសេដ្ឋកិច្ចពួកគេ។
លោក សំ សឿន ដែលទើបតែទទួលតួនាទីជាប្រធានក្រុមប្រឹក្សាសហជីពជាតិកម្ពុជាអាណត្តិទី៣ (CCNU) បានស្នើឲ្យអគ្គរដ្ឋទូតនៃសហភាពអឺរ៉ុប និងអាមេរិក ពិនិត្យមើលពីស្ថានភាព និងសភាពការណ៍សេដ្ឋកិច្ចឲ្យបានច្បាស់សិន មុននឹងដាក់ទណ្ឌកម្មចំពោះវិស័យកាត់ដេនៅកម្ពុជា។ ត្រង់ចំណុចនេះលោក សំ សឿន បានរំឮកពីការដំឡើងប្រាក់ខែកម្មករ និយោជិត ១៧០ដុល្លារ និងការថែទាំសុខភាព រួមទាំងអត្ថប្រយោជន៍ផ្សេងៗ នៅក្នុងឆ្នាំ២០១៨។
លោក សំ សឿន បាននិយាយថា បញ្ហាអសកម្មដែលបានកើតឡើងកន្លងមក មិនមែនជាការទាមទារប្រាក់ឈ្នួលនោះទេ តែជាបញ្ហានយោបាយ។ ជាមួយគ្នានេះ លោកស្នើឲ្យ EU និងអាមេរិក នៅតែបន្តទិញបន្ថែម និងផ្ដល់កូតាផ្សេងៗសម្រាប់កម្ពុជា ដោយកុំយកបញ្ហានយោបាយមករឹតត្បិតដល់លំហូសេដ្ឋកិច្ចកម្ពុជា ដែលនាំចេញក្រៅប្រទេសបែបនេះ។
ប្រធានក្រុមប្រឹក្សាសហជីពជាតិកម្ពុជាថ្មីរូបនេះ បានអត្ថាធិប្បាយយ៉ាងដូច្នេះថា៖«ការទាមទារកន្លងមកដើម្បីកេងចំណេញនយោបាយរបស់ បក្ស(CNRP) ដែលមានចេតនាបង្កើតបដិវត្ដន៍ពណ៌ មានគម្រោងចលនាក្បត់ជាតិ លទ្ធិប្រជាធិបតេយ្យ និងប៉ះពាល់ផលប្រយោជន៍របស់កម្មករ»។
ការលើកឡើងរបស់ប្រធានក្រុមប្រឹក្សាសហជីពជាតិកម្ពុជានេះ ធ្វើឡើងក្រោយពីសហភាពអឺរ៉ុប និងសហរដ្ឋអាមេរិក ព្រមានដកការអនុគ្រោះពន្ធទូទៅដល់ទំនិញកម្ពុជា ដែលនាំចូលទីផ្សារសេដ្ឋកិច្ចពួកគេ។ មូលហេតុដែលនាំឲ្យសហភាពអឺរ៉ុប និងសហរដ្ឋអាមេរិក ព្រមានបែបនេះ ដោយសារភាពតានតឹងនយោបាយ នៃការរំលាយគណបក្សសង្គ្រោះជាតិ ការឃាត់ខ្លួនមេបក្ស និងផ្អាកសកម្មភាពនយោបាយបក្សប្រឆាំង និងការរឹតត្បិតសេរីភាពសង្គមស៊ីវិលជាដើម។
បើក្រឡេកមើលការនាំចេញសរុបរបស់កម្ពុជាទៅទីផ្សារសហភាពអឺរ៉ុប (EU) ក្នុងឆ្នាំ២០១៦ មានទឹកប្រាក់ចំនួន ៦២៥៩ លានដុល្លារអាមេរិក។ កម្ពុជាទទួលបានការអនុគ្រោះពន្ធទាំងស្រុងពីទីផ្សារនេះ។ ទំនិញដែលទៅទីផ្សារមួយនេះ រួមមាន សំលៀកបំពាក់ ស្រោមជើង ស្បែកជើង អង្ករ គ្រាប់ធញ្ញជាតិ វត្ថុធ្វើពីស្បែក កៅស៊ូ និងទោចក្រយាន ជាដើម។
រីឯការនាំចេញទៅសហរដ្ឋអាមេរិកវិញ គឺមានទំហំប្រាក់ ២៩១៦ លានដុល្លារ ក្នុងឆ្នាំ២០១៦ ។ ការនាំចេញរបស់កម្ពុជាទៅកាន់អាមេរិកបានបង់ពន្ធស្ទើរទាំងស្រុង លើកលែងតែផលិតផល travelling goods ដែលរដ្ឋាភិបាលអាមេរិកអនុគ្រោះដល់កម្ពុជាកាលពីចុងឆ្នាំ២០១៦ ។ ផលិតផលរបស់កម្ពុជាចូលទីផ្សារនេះរួមមាន សំលៀកបំពាក់ ស្រោមនិងស្បែកជើង ប្រដាប់ក្មេងលេង វត្ថុធ្វើពីស្បែក ស្រោមពូក និងគ្រឿងសង្ហារឹម ជាដើម។
បើមិនទទួលបានការអនុគ្រោះពន្ធទេនោះ កម្ពុជាត្រូវបង់ពន្ធចំនួន ៦៧៦ លានដុល្លារ សម្រាប់ទីផ្សារសហភាពអឺរ៉ុប ។ ចំណែកទឹកប្រាក់ដែលកម្ពុជាបានបង់ពន្ធឲ្យរដ្ឋាភិបាលអាមេរិកមានប្រមាណជាង ៣០០លានដុល្លារ (ក្នុងអត្រាពន្ធមធ្យម ១២ភាគរយ)។ ប៉ុន្តបើកម្ពុជាត្រូវបង់ប្រាក់ពន្ធលើទំនិញនេះ គឺមានទឹកប្រាក់ប្រមាណ ១០លានដុល្លារ (ក្នុងអត្រាពន្ធ ៥ភាគរយ)។ ដូច្នេះបានន័យថា កម្ពុជាទទួលបានផលចំណេញច្រើន ពីការអនុគ្រោះពន្ធរបស់សហភាពអឺរ៉ុប និងអាមេរិក៕
Tag:
សំ សឿន
សហជីពជាតិ
CCNU
© រក្សាសិទ្ធិដោយ thmeythmey.com