អន្តរជាតិ
ការចរចារវាងកូរ៉េទាំងពីរអាចនាំដល់ការជួបគ្នារវាងកូរ៉េខាងជើងនិងអាមេរិក?
× អាមេរិក និងកូរ៉េខាងជើងអាចជួបគ្នានៅថ្ងៃអនាគត? នេះជាសំណួរមិនទាន់មានចម្លើយ ក្រោយជំនួបកម្ររវាងកូរ៉េទាំងពីរនៅថ្ងៃទី៩ ខែមករា ។ ទោះជាប្រធានបទសំខាន់ក្នុងជំនួបរវាងកូរ៉េខាងត្បូង និងខាងជើងផ្ដោតលើវិស័យកីឡាក្ដី ជំនួបនេះអាចជាទ្វារទៅកាន់ការចរចាលើបញ្ហាផ្សេងទៀត ឬក៏ឈានដល់ជំនួបរវាងអាមេរិក និងកូរ៉េខាងជើងក៏ថាបាន។ កន្លងមក ប្រធានាធិបតី ដូណាល់ ត្រាំ ក៏អះអាងថា បើកាលៈទេសៈមកដល់ អាមេរិកនឹងចរចាជាមួយកូរ៉េខាងជើង។
ជំនួបអន្តរកូរ៉េលើកដំបូងក្នុងពេលជាងពីរឆ្នាំ ក្លាយជាចំណុចរបត់ថ្មីនៅឧបទ្វីបកូរ៉េ ដែលចោមរោមដោយសង្គ្រាមពាក្យសម្ដី ការគំរាមកំហែង និងសមយុទ្ធយោធា។ គ្រប់គ្នាគិតថា ជំនួបរវាងកូរ៉េទាំងពីរ ដែលហុចផលវិជ្ជមានជាច្រើននេះ ក្លាយជាកាំជណ្ដើរទីមួយដើម្បីឈានដល់ការចរចាស្ដីពីការរំសាយនុយក្លេអ៊ែរនៅឧបទ្វីបមួយនេះ។ ស្របគ្នានឹងការបន្ទន់ឥរិយាបថរបស់កូរ៉េខាងជើង ការវិវដ្ដថ្មីទៀតអាចនឹងកើតឡើងជាបន្តបន្ទាប់។
ប្រធានាធិបតីអាមេរិក ដូណាល់ ត្រាំ បានជជែកតាមទូរសព្ទជាមួយសមភាគីកូរ៉េខាងត្បូង មូន ចេអ៊ីន នៅថ្ងៃទី១០ ខែមករា ជុំវិញការចរចារវាងកូរ៉េទាំងពីរ។ លោក មូន ចេអ៊ីន បានប្រាប់លោក ត្រាំ ពីដំណើការរលូននៃការចរចា ដែលក្នុងនោះកូរ៉េខាងជើងនឹងបញ្ជូនប្រតិភូ និងអត្តពលិកចូលរួមព្រឹត្តិការណ៍អូឡាំពិករដូវរងារឆ្នាំ២០១៨ ។ កូរ៉េខាងជើងក៏បានបើកប្រព័ន្ធទំនាក់ទំនងយោធាជាមួយកូរ៉េខាងត្បូងឡើងវិញផងដែរ។
ការចរចាលើកដំបូងចាប់តាំងពីឆ្នាំ២០១៥ មកហើយទទួលបានលទ្ធផលប្រសើរបែបនេះ ធ្វើឲ្យក្ដីរំពឹងនៃការចរចាលើសំណុំរឿងនុយក្លេអ៊ែរកូរ៉េខាងជើងមានដង្ហើមម្ដងទៀត។ មានអ្នកខ្លះក៏លួចគិតថា ជំនួបអន្តរកូរ៉េពេលនេះ នឹងនាំដល់ការជួបគ្នារវាងអាមេរិក និងកូរ៉េខាងជើងផង។ នេះក៏ព្រោះតែកន្លងមក អាមរិកក៏ធ្លាប់បានប្រកាន់ជំហរចរចាដែរ បើពេលវេលាសក្តិសមមកដល់។ តើការប្ដូរឥរិយាបថរបស់កូរ៉េខាងជើងពេលនេះជាពេលសក្តិសម?
ចំពោះលទ្ធភាពជួបទល់មុខគ្នាជាមួយកូរ៉េខាងជើង លោក ត្រាំ ដែលធ្លាប់គំរាមកម្ទេចកូរ៉េខាងជើងក្លាយជាផេះផង មិនបាននិយាយឲ្យច្បាស់ឡើយ។ ក្រោយនិយាយទូរសព្ទជាមួយលោក មូន ចេអ៊ីន លោក ត្រាំ បានត្រឹមលើកឡើងថា៖ «នរណាទៅដឹងថាវា (ជំនួបកូរ៉េទាំងពីរ) នឹងនាំទៅរកអ្វីទៀត?» ។ ប៉ុន្តែលោកសង្ឃឹមថា ជំនួបនេះនឹងនាំទៅរកជោគជ័យសម្រាប់សន្តិភាព ហើយនឹងរង់ចាំមើលស្ថានការណ៍បន្តនៅសប្ដាហ៍ និងខែក្រោយៗទៀត។
កាលពីចុងសប្ដាហ៍មុន លោកប្រធានាធិបតីអាមេរិកក៏បានបង្ហាញជំហរចង់ចរចាជាមួយមេដឹកនាំកូរ៉េខាងជើង គីម ជុងអ៊ុន ប៉ុន្តែមានលក្ខខណ្ឌ។ លក្ខខណ្ឌនោះ គឺកូរ៉េខាងជើងត្រូវបោះបង់កម្មវិធីនុយក្លេអ៊ែររបស់ខ្លួន ដែលអាមេរិកចាត់ទុកជាគំរាមកំហែងសន្តិសុខ។ យ៉ាងណាមិញ កូរ៉េខាងជើងក៏បានអះអាងជាច្រើនលើកដែរថា ផ្លូវចរចានៅតែមាន តែកម្មវិធីអភិវឌ្ឍនុយក្លេអ៊ែររបស់ខ្លួនមិនមែនសម្រាប់ចរចាឡើយ៕
Tag:
កូរ៉េខាងជើង
កូរ៉េខាងត្បូង
អាមេរិក
© រក្សាសិទ្ធិដោយ thmeythmey.com