អន្តរជាតិ
រដ្ឋមន្ត្រីការបរទេសកូរ៉េខាងត្បូងថា សេអ៊ូលយល់ពីព្យុងយ៉ាងជាងនរណាទាំងអស់ រដ្ឋមន្រ្តីការបរទេសកូរ៉េខាងត្បូងលោកស្រី កាង ឃ្យុងវ៉ា (រូបភាព៖ AFP)
× ទន្ទឹមនឹងការចរចាជាបន្តបន្ទាប់រវាងកូរ៉េទាំងពីរ ប្រទេសជាច្រើននិយាយឲ្យចំអាមេរិក និងជប៉ុន បានបង្ហាញការសង្ស័យលើអាកប្បកិរិយាទន់ភ្លន់ខុសប្លែករបស់កូរ៉េខាងជើង និងចាត់ទុកជាការពង្វាងភ្នែកអន្តរជាតិឲ្យឆ្ងាយពីកម្មវិធីនុយក្លេអ៊ែរប៉ុណ្ណោះ។ ប៉ុន្តែប្រមុខការទូតកូរ៉េខាងត្បូង កាង ឃ្យុងវ៉ា និយាយថា ការចរចានឹងបន្តទៅមុខទៀត ហើយកូរ៉េខាងត្បូងក៏មានភ្នែកភ្លឺ ដែលអាចយល់ដឹងជំហររបស់កូរ៉េខាងជើងបាន។
ចាប់តាំងពីជួបគ្នាលើកដំបូងនៅថ្ងៃទី៩ ខែមករា កូរ៉េទាំងពីរបានជួបគ្នាបីដងហើយ ដោយបានពិភាក្សាលើការចូលរួមរបស់កូរ៉េខាងជើងក្នុងព្រឹត្តិការណ៍អូឡាំពិករដូវរងារឆ្នាំ២០១៨ ។ ការបន្ទន់ជំហរភ្លាមៗរបស់កូរ៉េខាងជើង បង្កជាការសង្ស័យជាច្រើន និងចាត់ទុកសកម្មភាពកូរ៉េខាងជើង គឺជាការបិទបាំងមហិច្ឆតានុយក្លេអ៊ែររបស់ខ្លួន។ អាមេរិក និងជប៉ុន បានស្នើឲ្យកូរ៉េខាងត្បូងប្រុងប្រយ័ត្នចំពោះកូរ៉េខាងជើងទៀតផង។
ចំពោះមុខការផ្លាស់ប្ដូរឥរិយាបថរបស់កូរ៉េខាងជើង កូរ៉េខាងត្បូងពិតជារីករាយ និងបានចរចាជាមួយបងប្អូនកូរ៉េរបស់ខ្លួន ដោយទទួលបានលទ្ធផលវិជ្ជមានជាច្រើន។ រដ្ឋមន្ត្រីការបរទេសកូរ៉េខាងត្បូង កាង ឃ្យុងវ៉ា បានប្រាប់ទីភ្នាក់ងារព័ត៌មាន BBC ថា កូរ៉េខាងត្បូងនឹងប្រើប្រាស់ឱកាសពេលនេះឲ្យបានច្រើនបំផុត ព្រោះវាជាឱកាសកម្រដែលកូរ៉េខាងជើងកែប្រែជំហររឹងរូស ហើយសុខចិត្តជ្រើសរើសផ្លូវចរចាឡើងវិញ។
«ខ្ញុំគិតថា យើងយល់ពីកូរ៉េខាងជើងជាងនរណាទាំងអស់ ព្រោះធ្លាប់ជួបចរចាជាមួយកូរ៉េខាងជើងរាប់ទសវត្សរ៍ ខណៈការចរចាខ្លះទៅមុខ ខ្លះថយក្រោយក៏មាន»។ នេះជាសម្ដីរបស់លោកស្រី កាង ដែលទំនងជាឆ្លើយតបទៅនឹងការសង្ស័យរបស់អន្តរជាតិលើការចរចារវាងកូរ៉េទាំងពីរ។ លោកស្រីក៏ទទួលស្គាល់ថា មានការគន់គូរលើសកម្មភាពរបស់កូរ៉េខាងជើងដែលសម្រេចចិត្តចូលតុចរចាវិញ តែចុងក្រោយកូរ៉េខាងត្បូងត្រូវតែចាប់យកឱកាសនេះ។
យ៉ាងណាមិញ ប្រមុខការទូតកូរ៉េខាងត្បូងរូបនេះក៏បញ្ជាក់ដែរថា ជំហររបស់ក្រុងសេអ៊ូលមិនមានការផ្លាស់ប្ដូរឡើយ គឺនៅតែបន្តដើរលើផ្លូវជាមួយសហគមន៍អន្តរជាតិដើម្បីលុបបំបាត់នុយក្លេអ៊ែរពីឧបទ្វីបកូរ៉េ។ ការដាក់ទណ្ឌកម្មនឹងនៅតែបន្តធ្វើតាមយន្តការក្រុមប្រឹក្សាសន្តិសុខ និងយន្តការឯកតោភាគី សំដៅបង្ខំឲ្យកូរ៉េខាងជើងបោះបង់មហិច្ឆតាអភិវឌ្ឍនុយក្លេអ៊ែររបស់ខ្លួន និងងាកចូលតុចរចាជាមួយអន្តរជាតិវិញផងដែរ។
ងាកទៅរឿងចរចារវាងកូរ៉េទាំងពីរបន្តិច កូរ៉េខាងជើងប្រកាសហើយថា ខ្លួននឹងបញ្ជូនប្រតិភូ និងអត្តពលិកខ្ទង់រយនាក់ចូលរួមកម្មវិធីអូឡាំពិកនៅទីក្រងព្យុងឆាង ចាប់ពីថ្ងៃទី៩ ដល់ថ្ងៃទី២៥ ខែកុម្ភៈ។ កូរ៉េទាំងពីរនឹងប្រើទង់រួមគ្នាក្នុងពិធីបើកកម្មវិធី ហើយបង្កើតក្រុមកីឡាហុកគីស្ដ្រីរួមដើម្បីប្រជែងក្នុងនាមកូរ៉េតែមួយ។ ប៉ុន្តែគេក៏ត្រូវរង់ចាំការសម្រេចចិត្តរបស់គណៈកម្មាធិការអូឡាំពិកអន្តរជាតិសិនដែរ ព្រោះកូរ៉េខាងជើងមិនបានចុះឈ្មោះ ហើយអត្តពលិកខ្លះគ្មានសិទ្ធិប្រកួតឡើយ៕
Tag:
កូរ៉េខាងត្បូង
កូរ៉េខាងជើង
អាមេរិក
Kang Kyung-wha
© រក្សាសិទ្ធិដោយ thmeythmey.com