អាមេរិក៖រដ្ឋាភិបាលសហព័ន្ធប្រឈមការផ្អាកដំណើរការបណ្តោះអាសន្ន ព្រោះសភាមិនអាចអនុម័តថវិកាបាន

អន្តរជាតិ

អាមេរិក៖រដ្ឋាភិបាលសហព័ន្ធប្រឈមការផ្អាកដំណើរការបណ្តោះអាសន្ន ព្រោះសភាមិនអាចអនុម័តថវិកាបាន

20, Jan 2018 , 11:54 am

រូបភាព

ដោយ: សៅ ផលនិស្ស័យ (Sao Phal Niseiy)

សេចក្តីព្រាងច្បាប់ដែលអនុញ្ញាតឲ្យមានការផ្តល់កញ្ចប់ថវិកាសម្រាប់រដ្ឋាភិបាលដំណើរការក្នុងរយៈពេលខ្លីនោះត្រូវបានព្រឹទ្ធសភាអាមេរិកបដិសេធនៅថ្ងៃសុក្រទី ១៩ ខែមករា។ ដោយសារពេលវេលាកាន់តែខើច រដ្ឋាភិបាលសហព័ន្ធអាមេរិកទំនងជាចៀសមិនរួចពីផ្អាកដំណើរការបណ្តោះអាសន្នឡើយ ទម្រាំមានការឯកភាពគ្នារវាងសមាជិកសភាក្នុងការអនុម័តច្បាប់ថវិកាគាំទ្ររដ្ឋាភិបាលឲ្យដំណើរការវិញនោះ។

ដោយសារការខ្វែងគំនិតគ្នា សមាជិកព្រឹទ្ធសភាអាមេរិកសម្រេចបដិសេធសេចក្តីព្រាងច្បាប់ផ្គត់ផ្គង់ថវិកាបណ្តោះអាសន្នដែលធានាដំណើរការប្រក្រតីនៃរដ្ឋាភិបាលសហព័ន្ធអាមេរិកនៅថ្ងៃសុក្រទី ១៩ ខែមករា។ សមាជិកសភាកំពុងខ្វែងដៃខ្វែងជើងគ្នាដើម្បីរៀបចំគម្រោងថ្មីដើម្បីដាក់ឲ្យសភាអនុម័តដើម្បីការពារការបិទដំណើរការរដ្ឋាភិបាលមួយរយៈ ខណៈកាលបរិច្ឆេទផុតកំណត់ត្រឹមពាក់កណ្តាលយប់ថ្ងៃសុក្រ។

បើតាមសារព័ត៌មានអាមេរិក Politico សេចក្តីព្រាងដែលច្បាប់សមាជិកព្រឹទ្ធសភាអាមេរិកអនុម័តមិនបាននេះត្រឹមជួយឲ្យរដ្ឋាភិបាលដំណើរការបានបួនសប្តាហ៍ទៅមុខប៉ុណ្ណោះ។ ម្យ៉ាងទៀតដើម្បីអនុម័តសេចក្តីព្រាងច្បាប់នេះបាន សមាជិកព្រឹទ្ធសភាត្រូវការសំឡេងសរុប ៦០ ប៉ុន្តែសមាជិកព្រឹទ្ធសភាបក្សសាធារណរដ្ឋត្រូវការសំឡេងសមាជិកបក្សប្រជាធិបតេយ្យយ៉ាងហោចណាស់ដប់សំឡេងដើម្បីបង្គ្រប់។

ប៉ុន្តែសមាជិកបក្សប្រជាធិបតេយ្យដែលជាក្រុមភាគតិចនោះមិនបោះគាំទ្រឡើយ។ មូលហេតុនោះគឺ ពួកគេខ្នើសចិត្តនឹងសមាជិកបក្សសាធាណរដ្ឋ និងរដ្ឋបាលលោក ដូណាល់ ត្រាំ រឿងវិធានការអនុវត្តលើជនអន្តោប្រវេសន៍។ ក្រៅពីនេះពួកគេក៏មិនពេញចិត្តចំពោះការបន្តអនុវត្តនីតិវិធីអនុម័តបទបញ្ញត្តិជួយផ្គត់ផ្គង់ហិរញ្ញវត្ថុដល់រដ្ឋាភិបាលក្នុងរយៈពេលខ្លី ជាជាងចេញវិធានការរយៈពេលវែងនិងមានស្ថិរភាពជាងបច្ចុប្បន្នដែរ។

សមាជិកសភាបក្សប្រជាធិបតេយ្យចង់ឲ្យមានកាអនុម័តបទបញ្ញត្តិថ្មីដែលការពារយុវជនដែលរស់នៅអាមេរិកមិនមានឯកសារគ្រប់គ្រាន់រាប់ពាន់នាក់ឲ្យរួចផុតពីការបណ្តេញចេញដែរ។ ដូច្នេះហើយ ពួកគេយកបញ្ហាហិរញ្ញវត្ថុផ្គត់ផ្គង់ដំណើរការរដ្ឋាភិបាលនេះដើម្បីធ្វើដាក់សម្ពាធឲ្យមានការចរចាគ្នាសិនបញ្ហាជនអន្តោប្រវេសន៍ដែលមានការឯកភាពគ្នារវាងបក្សទាំងពីរ។

តាមពិតទៅ បើសិនជាមិនមានការអនុវត្តច្បាប់ដើម្បីផ្តល់ហិរញ្ញវត្ថុគាំទ្រដំណើរការជាប្រក្រតីរបស់រដ្ឋាភិបាលតាមការកំណត់ទេ វានឹងក្លាយជាការបិទដំណើរការរដ្ឋាភិបាលជាលើកទីមួយចាប់ពីឆ្នាំ ២០១៣ អាណត្តិលោក បារ៉ាក់ អូបាម៉ា៕