ប្រមុខការពារជាតិអាមេរិក៖អាមេរិកមិនជ្រៀតជ្រែកកិច្ចការប្រទេសអាស៊ី

អន្តរជាតិ

ប្រមុខការពារជាតិអាមេរិក៖អាមេរិកមិនជ្រៀតជ្រែកកិច្ចការប្រទេសអាស៊ី

22, Jan 2018 , 11:37 am

រូបភាព

ដោយ: តន ចាន់រិទ្ធារ៉ា

រដ្ឋមន្ត្រីការពារជាតិអាមេរិក ជេម ម៉ាធីស បានចាកចេញពីអាមេរិកនៅថ្ងៃទី ២១ ខែមករា ដើម្បីផ្ដើមទស្សនកិច្ចរយៈពេល៧ថ្ងៃ នៅតំបន់អាស៊ី។ លោក ម៉ាធីស គ្រោងទស្សនកិច្ចនៅរដ្ឋអាស៊ានចំនួនពីរ គឺវៀតណាម និងឥណ្ឌូណេស៊ី ក្នុងគោលដៅពង្រឹងទំនាក់ទំនងយោធាទ្វេភាគី ឲ្យកាន់តែប្រសើរឡើង ខណៈដែលចិន កំពុងពង្រីកឥទ្ធិពលយោធារបស់ខ្លួនយ៉ាងខ្លាំង ក្នុងតំបន់ប៉ាស៊ីហ្វិកនេះ ជាពិសេសនៅសមុទ្រចិនខាងត្បូង។

ប្រមុខការពារជាតិអាមេរិក ជេម ម៉ាធីស នឹងទៅដល់រដ្ឋធានីហ្សាការតា ឥណ្ឌូណេស៊ី នៅថ្ងៃទី២២ ខែមករា។ លោកនឹងជួបជាមួយប្រធានាធិបតី ចូកូ វីដូដូ និងរដ្ឋមន្ត្រីការពារជាតិ Ryamizard Ryacudu នៅថ្ងៃទី២៣ ដើម្បីពិភាក្សាពីកិច្ចសហប្រតិបត្តិការសមុទ្រ ព្រោះឥណ្ឌូណេស៊ីជាទឹកដីដ៏ធំ លាតសន្ធឹងពីមហាសមុទ្រឥណ្ឌា ដល់ទៅមហាសមុទ្រប៉ាស៊ីហ្វិកឯណោះ។ នៅវៀតណាម លោកនឹងជួបសមភាគីវៀតណាមជុំវិញសេរីភាពនាវាចរណ៍នៅសមុទ្រចិនខាងត្បូង។

ថ្លែងប្រាប់អ្នកសារព័ត៌មានលើយន្តហោះយោធាក្នុងដំណើរទៅកាន់តំបន់អាស៊ី លោក ម៉ាធីស និយាយថា៖ «យើងមានចំណែកនៅមហាសមុទ្រប៉ាស៊ីហ្វិក ដែលឈ្មោះរបស់វាមានន័យថា សន្តិភាព ។ យើងចង់ឃើញប៉ាស៊ីហ្វិកមានសន្តិភាពដើម្បីឲ្យប្រទេសទាំងអស់ដែលប្រើប្រាស់ និងរស់នៅជាមួយមហាសមុទ្រនេះរីកចម្រើន»។ នេះបើតាមទីភ្នាក់ងារព័ត៌មាន AFP ។

ទស្សនកិច្ចរបស់លោក ម៉ាធីស នៅតំបន់អាស៊ីលើកនេះ មានគោលដៅបង្ហាញប្រទេសអាស៊ីពីនយោបាយយោធារបស់អាមេរិក ដែលខុសប្លែកពីចិន និងរុស្ស៊ី។ មហាយក្សចិនមាននយោបាយការពារជាតិកោងកាចតាមរយៈការធ្វើទំនើបកម្មយោធាបន្តបន្ទាប់ និងពង្រីកអានុភាពក្នុងតំបន់សមុទ្រចិនភាគត្បូង ដែលមានជម្លោះជាមួយវៀតណាម និងឥណ្ឌូណេស៊ី។ ឯរុស្ស៊ីវិញក៏មិនធម្មតាដែរ ការលេបត្របាក់តំបន់គ្រីមេ ការលូកដៃក្នុងជម្លោះនៅភាគខាងកើតអ៊ុយក្រែន និងនៅចចជី ជាឧទាហរណ៍ស្រាប់។

រដ្ឋមន្ត្រីការពារជាតិអាមរិករូបនេះលើកឡើងពីជំហររបស់អាមេរិកថា អាមេរិកគោរពអធិបតេយ្យប្រទេសអាស៊ី ជាមួយនឹងសំឡេងអធិបតេយ្យ និងការសម្រេចចិត្តអធិបតេយ្យ។ ដោយមិននិយាយចំឈ្មោះចិន ឬរុស្ស៊ី លោក ម៉ាធីស បន្តថា ប្រទេសផ្សេងមិនគួរមានអំណាចវ៉េតូលើសេដ្ឋកិច្ច ការទូត ឬក៏ការសម្រេចចិត្តផ្នែកសន្តិសុខរបស់ប្រទេសនៅអាស៊ីឡើយ ឯអាមេរិកប្រកាន់ជំហរគោរពអធិបតេយ្យរដ្ឋទាំងនេះ។

ដូចដឹងស្រាប់ អាមេរិក និងចិនកំពុងប្រជែងឥទ្ធិពល និងអូសទាញប្រទេសអាស៊ីឲ្យចូលជំរំរៀងៗខ្លួន។ ប៉ុន្តែមួយឆ្នាំនៅក្រោមអាណត្តិលោក ដូណាល់ ត្រាំ ក្រុងវ៉ាស៊ីនតោនមិនសូវយកចិត្តទុកដាក់លើអាស៊ីឡើយ ខណៈដែលក្រុងប៉េកាំងវិញប្រឹងប្រែងបង្កើនឥទ្ធិពលរបស់ខ្លួនទាំងផ្នែកសេដ្ឋកិច្ច និងយោធា។ នៅសមុទ្រចិនខាងត្បូង ក្រុងប៉េកាំងបានពង្រីកយោធារបស់ខ្លួនខ្លាំង ដែលបង្កជាព្រួយបារម្ភដល់ប្រទេសទន់ខ្សោយក្នុងតំបន់៕